This text is part of:
Click on a word to bring up parses, dictionary entries, and frequency statistics
41.
Fine anni arcus propter aedem Saturni ob recepta
signa cum Varo amissa ductu Germanici, auspiciis Tiberii,
et aedes Fortis Fortunae Tiberim iuxta in hortis, quos
Caesar dictator populo Romano legaverat, sacrarium genti
Iuliae effigiesque divo Augusto apud Bovillas dicantur.
C. Caelio L. Pomponio consulibus Germanicus Caesar
a. d. VII. Kal. Iunias triumphavit de Cheruscis Chattisque
et Angrivariis quaeque aliae nationes usque ad Albim
colunt. vecta spolia, captivi, simulacra montium, fluminum,
proeliorum; bellumque, quia conficere prohibitus erat, pro
confecto accipiebatur. augebat intuentium visus eximia
ipsius species currusque quinque liberis onustus. sed
suberat occulta formido, reputantibus haud prosperum in
Druso patre eius favorem vulgi, avunculum eiusdem Marcellum flagrantibus plebis studiis intra iuventam ereptum,
brevis et infaustos populi Romani amores.
Annales ab excessu divi Augusti. Cornelius Tacitus. Charles Dennis Fisher. Clarendon Press. Oxford. 1906.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.