Felipe VI

Felipe VI (* 30 Januarie 1968 in Madrid as Felipe Juan Pablo y Alfonso de Todos los Santos de Borbón y Grecia), prins van Asturië en Gerona, is ná die abdikasie van sy vader, Juan Carlos I, op 19 Junie 2014 tot koning van Spanje uitgeroep.

Felipe VI
Koning van Spanje
Felipe VI
Dinastie	Huis van Bourbon (Spaans: Borbón)
Bewind	19 Junie 2014
Gebore	30 Januarie 1968
	Madrid, Spanje
Voorganger	Juan Carlos I
Gade	Letizia Ortiz Rocasolano
Kinders	Leonor, prinses van Asturië; prinses Sofia
Vader	Juan Carlos I
Moeder	Sofía van Griekeland en Denemarke

Biografie

Vroeë lewe

Felipe VI is op 30 Januarie 1968 in die Madridse hospitaal Clínica de Nuestra Señora de Loreto as derde kind en enigste seun van koning Juan Carlos I en sy gade, koningin Sofía, gebore. Sy volle geboortenaam is Felipe Juan Pablo Alfonso de Todos los Santos de Borbón y de Grecia. Met dié naam, wat hy op 8 Februarie 1968 in die Zarzuela-paleis tydens sy doop deur die destydse aartsbiskop van Madrid, Monseñor Casimiro Morcillo González, ontvang het, is die prins volgens 'n tradisie in die Huis van Borbón na die eerste Spaanse koning uit die Huis Borbón (Filips of Felipe V), sy grootvaders (Juan, graaf van Barcelona en koning Paul van Griekeland), sy oergrootvader koning Alfonso XII van Spanje en alle heiliges vernoem. Sy peetouers was sy grootvader aan vaderskant, Infante Juan de Borbón y Battenberg, graaf van Barcelona, en sy oergrootmoeder aan vaderskant, koningin-weduwee Victoria Eugénie van Battenberg.

Kort ná sy geboorte het hy die titel en adellike rang van Infante ontvang wat in die Spaanse koninkryk tradisioneel aan die seun van die heersende monarg gegee word, alhoewel sy vader indertyd nog nie as koning ingehuldig was nie en Felipe sodoende ook nog nie die amptelike troonvolger was nie. Enkele maande voor Felipe se agtste verjaardag is die heersende diktator, generaal Francisco Franco, oorlede, en twee dae later is Juan Carlos I as koning van Spanje uitgeroep.

Op 30 Januarie 1986 het Felipe in die ouderdom van 18 in die Spaanse parlement die eed van getrouheid aan die Spaanse grondwet en die koning afgelê en sodoende sy grondwetlike rol as troonopvolger aanvaar.

Die nag van 23 Februarie 1981

Die staatsgreep van 23 Februarie 1981 was 'n mislukte poging van lede van die Guardia Civil en die Spaanse leër om die demokratiese bestel omver te werp en 'n nuwe diktatuur te vestig. Felipe VI se vader het politieke weestand teen die reaksionêre militariste gebied. In die nag van 23 Februarie het hy in sy werkkamer ure lank met offisiere oor die staatsgreep beraadslaag. Van die dertienjarige prins is verwag om die vergadering by te woon.

Snags het die koning, wat in die uniform van opperbevelhebber van Spanje se gewapende magte geklee was, in 'n regstreekse televisiestoespraak sy steun vir die demokratiese bedeling bevestig. Eers nadat die staatsgrepers hul wapens neergelê het, is die jong prins deur sy pa bed toe gestuur. Ná 'n kort nag het Felipe op die volgende dag soos gewoon skoolgegaan. In 'n latere onderhoud het Juan Carlos I sy opvoedkundige maatreël verduidelik. Volgens hom was dit vir Felipe belangrik om met eie oë te aanskou hoe sy vader as koning 'n moeilike situasie moes handhaaf.

Opleiding

Prins Felipe het sy skoolloopbaan in die Colegio Santa María de los Rosales in Madrid begin en dit in 1985 by die Kanadese Lakefield College School in Toronto, Ontario voltooi. Tussen 1985 en 1988 het hy diensplig by verskillende afdelings van die Spaanse leër, vloot en lugmag gedoen.

Sy akademiese opleiding het Felipe aan die Universiteit Complutense Madrid, waar hy tussen 1988 en 1993 in die regte gestudeer en ook kursusse in ekonomie gevolg het, en aan die Georgetown University, 'n Amerikaanse elite-universiteit wat deur die Jesuïete-orde bestuur word, ontvang. Aan die laasgenoemde instelling het in 1995 'n meestersgraad in Internasionale Betrekkinge behaal. As student in Georgetown het Felipe 'n koshuiskamer met sy neef, Pavlos van Griekeland, gedeel. Hy is die eerste Spaanse koning met 'n akademiese agtergrond.

Huwelik

Felipe van Spanje saam met sy gade Letizia in 2010

Op 22 Mei 2004 het prins Felipe in Madrid met Letizia Ortiz Rocasolano, die dogter van 'n Spaanse joernalis en 'n verpleegster, getrou. Letizia was vroeër reeds getroud. Uit die huwelik is twee dogters gebore, Leonor (* 31 Oktober 2005, tans as Leonor van Spanje die wettige troonopvolger) en Sofia (* 29 April 2007). Sofia, die tweede wettige troonopvolger, is na haar grootmoeder, koningin Sofia, vernoem.

Twee ander vriendinne van prins Felipe uit die tyd voor sy huwelik het hulle as huwelikskandidate gediskwalifiseer, waaronder die Noorse onderklere-model Eva Sannum.