Anna Jordaan
Anna Jordaan (1926–2011) was ’n Afrikaanse skrywer.
Lewe en werk
[wysig | wysig bron]Anna Maria Jordaan is op 10 Julie 1926 op Sutherland in die Roggeveld gebore as een van vyf kinders. Die skrywer Datei (wyle Pieter Cornelius Johannes Jordaan) was een van haar broers. Sy begin haar skoolloopbaan in 1932 op haar geboortedorp en matrikuleer in 1943 aan die Hoërskool Sutherland. Hierna ondergaan sy algemene verpleegstersopleiding in die Groote Schuur Hospitaal in Kaapstad. Teen die einde van 1947 trou sy met Willem Johannes de Villiers, wat op daardie tydstip onderwys gee aan die Hoërskool Sutherland. Uit die huwelik word twee dogters en twee seuns gebore. Vir drie en ’n halwe jaar gaan hulle na Paleisheuwel, waar haar man skoolhoof is van die tweemanskool, maar keer dan terug na Sutherland wanneer haar man die pos as skoolhoof van die hoërskool aanvaar. Na aftrede verhuis hulle na Hermanus. Sy is op 26 Mei 2011 aan ’n hartaanval oorlede.
Skryfwerk
[wysig | wysig bron]Eers op 43-jarige ouderdom begin sy skryf, maar behaal onmiddellik sukses wanneer haar kortverhale deur die tydskrif Sarie Marais aanvaar word. Haar humoristiese sketse oor tant Breggie, ’n Roggeveldse tante met ’n skerp tong, wat ook in Sarie verskyn het, word gekeur en saamgebundel in[1] “Iemand soos Tant Breggie”.[2] Van hierdie sketse word ook opgeneem in die versamelbundel “Op Afrikaanse werf”. “Hou-den-bek” is ’n spanningsverhaal, wat eers as vervolgverhaal in Sarie gepubliseer is. Suster Magriet Steyn moet ’n ou man op ’n Roggeveldse plaas oppas vir ’n baie goeie salaris. Op die plaas is dinge egter anders, want snags loop die duiwel geharnas rond en volg die dood op die vreemdste maniere.
Publikasies
[wysig | wysig bron]Jaar | Publikasies |
---|---|
1976 | Iemand soos Tant Breggie |
1982 | Hou-den-bek |
Bronnelys
[wysig | wysig bron]Boeke
[wysig | wysig bron]- Kannemeyer, J.C. “Geskiedenis van die Afrikaanse literatuur 2” Academica, Pretoria, Kaapstad en Johannesburg Eerste uitgawe Eerste druk 1983
- Schwerdtfeger, A en Snyman, N.J. “Op Afrikaanse werf” Tafelberg-Uitgewers Beperk Kaapstad Tweede uitgawe 1988
- Van Coller, H.P. (red.) “Perspektief en Profiel Deel 2” J.L. van Schaik-Uitgewers Pretoria Eerste uitgawe 1999
Tydskrifte en koerante
[wysig | wysig bron]- Botha, Danie “Skepper van tant Breggie oorlede” “Die Burger” 1 Junie 2011
Internet
[wysig | wysig bron]- Botha, Danie Die Burger: http://152.111.1.87/argief/berigte/dieburger/2011/06/01/SK/10/annajordaan.html
Ongepubliseerde dokumente
[wysig | wysig bron]- Jordaan, Anna “Biografiese skets” Nasionale Afrikaanse Letterkundige Museum en Navorsingsentrum (NALN) Bloemfontein