Lu Xun

Lu Xun 鲁迅
Lu Xun omstreeks 1930
Gebore	25 September 1881 Sjaoxing, Zhejiang, China
Sterf	19 Oktober 1936 (op 55) Peking (nou Beijing), Republiek China
Beroep	Skrywer, kritikus en essayis

Lu Xun (Vereenvoudigde Chinees: 魯迅, Tradisionele Chinees: 鲁迅, Pinyin: Lǔ Xùn) of Lu Hsün (volgens die fonetiese Wade-Giles-transkripsie), was die skrywersnaam van Zhou Shuren (Vereenvoudigde Chinees: 周樹人, Tradisionele Chinees: 周树人, Pinyin: Zhōu Shùrén en Chou Shu-jen volgens Wade-Giles; * 25 September 1881,; † 19 Oktober 1936) was een van die belangrikste 20ste eeuse skrywers in China. Dikwels word na hom as die grondlegger van die moderne Chinese literatuur verwys. Hy het sy werke sowel in baihua (白話), die huidige Chinese omgangstaal, asook in klassieke Chinees geskryf.

Hy was een van die invloedryke intellektuele wat die sogenaamde 4 Mei-beweging gesteun het wat aan Beijing se Beida-universiteit in die lewe geroep is, en het saam met ander intellektuele ook aan die Baihua-beweging deelgeneem wat hom met kwessies rakende literêre styl en genre bemoei het.

Lu Xun was 'n skrywer van kortverhale, uitgewer, vertaler, kritikus, essayis en digter. In die 1930's het hy die titulêre leier van die Chinese Liga van Linkse Skrywers in Sjanghai geword. Ná die 4 Mei-beweging het hy met sy werke baie groot invloed in China uitgeoefen en is deur die Kommunistiese bewind ná 1949 as een van die Volksrepubliek China se beduidendste persoonlikhede vereer. Mao Zedong was sy hele lewe lank 'n groot bewonderaar van Lu Xun se literêre werk.

Maar ondanks die simpatie wat Lu Xun vir linkse politieke ideale getoon het, het hy self nooit by die Kommunistiese Party van China aangesluit nie. Danksy vertalings in onder meer Engels (waaronder Selected Stories of Lu Hsun deur Yang Hsien-yi en Gladys Yang) het sy werke ook in die Weste bekendheid verwerf.

Verwysings

• Lu Xun. (2008). Encyclopædia Britannica. Deluxe Edition. Chicago: Encyclopædia Britannica.