Royal Lodge
Die Royal Lodge is ’n woning op die dorp Old Windsor, 4,8 km suid van Windsor-kasteel. Dit was die Windsor-tuiste van koningin Elizabeth, die koninginmoeder, van 1952 tot met haar dood in 2002. Sedert 2004 is dit die amptelike tuiste van prins Andrew.
Die Lodge dateer oorspronklik van die middel 17de eeu. Teen 1750 het daar ’n klein steenhuis in die koningin Anna-styl op die terrein gestaan. Dit is teen 1792 vergroot.
George, die Prins van Wallis (later koning George IV) het tydelik daar gebly terwyl hy die groter, nabygeleë Cumberland Lodge wou laat herbou. Later is dit vergroot en was dit ’n groot huis met ’n grasdak, verandas en ’n kweekhuis. Die prins het in 1815 daar gaan bly en die herbouing van Cumberland Lodge laat vaar. Aanbouings is na 1820 gedoen en dit het bekend geword as die Royal Lodge.
Die huis het sedert die 1840's broksgewys gegroei, maar is steeds relatief klein en informeel. Op die terrein is die miniatuur-kothuis Y Bwthyn Bach, ’n geskenk in 1932 van die mense van Wallis aan die destydse prinses Elizabeth. Daar is ook ’n kapel wat steeds deur koningin Elizabeth en ander lede van die koningshuis gebruik word.
In 1931 het koning George V die lodge aan die destydse Hertog en Hertogin van York (later koning George VI en koningin Elizabeth) toegeken as ’n landelike rusplek.
Ná die dood van George VI in 1952 het die koninginmoeder steeds die huis gebruik as ’n rusplek tot met haar dood in 2002. Ná uitgebreide restourasiewerk het prins Andrew in 2004 uit Sunninghill Park daar ingetrek[1] en dit is steeds sy amptelike tuiste.
Verwysings
[wysig | wysig bron]- ↑ The fall of the house of York: Why has the mansion sold by Duke in mystery £15m deal gone to ruin? Daily Mail. 24 Februarie 2009
Hierdie artikel is vertaal uit die Engelse Wikipedia
