Anestesia epidural
L'anestesia epidural u anestesia peridural ye a introducción d'anestesico local en o espacio epidural, bloqueyando asinas as terminacions niervosas en a suya salida d'o miollo espinal. Por lo tanto, a suya distribución será metamerica, ye decir, s'anestesiará a zona d'o cuerpo que corresponde a os niérvols que han estau alcanzaus por l'anestesico local inchectau.
Se considera lenguache coloquial abreviar a exprisión como epidural (por eixemplo "meter a epidural").[1]
Historia
editarO neurologo estausunidense James Leonard Corning (1855-1923) estió o primero en realizar un bloqueyo neuraxial en 1885 cuando inchectó 111 mg de cocaína en o espacio epidural d'un voluntario.[2][3] En 1921 o ciruchano militar aragonés Fidel Pagés (1886–1923) la desarrolló convertindo-se asinas en o inventor d'ista tecnica, d'alcuerdo a la sociedat cientifica internacional. Amás desarrolló l'anestesia lumbar epidural d'inchección unica que dimpués popularizó o ciruchano italiano Achille Mario Dogliotti (1897–1966). O primer uso d'una anestesia de cabal contino mientres un parto estió en 1942 y fue desarrollau por Robert Andrew Hingson (1913-1996) y Waldo B. Edwards. En 1947, o cubano Manuel Martínez Curbelo (1906–1962) describió a colocación d'un catéter lumbar epidural.
Indicacions
editarO suyo uso mas común ye pa bloqueyar a dolor mientres o parto, encara que tamién se fa servir en intervencions quirurchicas como operacions d'as garras, pelvis u chenitals.
En o parto
editarL'analchesia epidural permite l'alivio d'a sensación de dolor mientres o parto y rebaixa o livel d'ansiedat d'a mai. Tamién posibilita tecnicas instrumentals (fórceps u ventosa) sin que siga menester aplicar atra mena d'anestesia.
Contraindicacions
editarL'anestesia epidural ye contraindicada en os casos de parto en os que a dilatación ye masiau abanzada, en os casos de tatuaches en a zona lumbar en función d'a suya localización y en pacients que sufren cualques malautías como obesidat u cardiopatías.
Tecnica
editarA tecnica de punción epidural se reyaliza con o pacient posau u en posición de decubito lateral y se punciona o espacio entre as dos apofisis espinosas d'a vertebra. O livel de punción ye en función d'a zona que se deseya anestesiar. A punción lumbar, que ye a mas frecuent, se reyaliza en os espacios vertebrals entre dos vertebras lumbars y s'anestesia a zona abdominal.
L'anestesia peridural se reyaliza a traviés de cuantas tecnicas. Todas ellas consisten en a busqueda d'o espacio epidural. Iste ye un espacio virtual que se troba por difuera d'a duramadre. Por meyo d'anestesia d'a piel en o puesto de punción, se i fica una agulla conectada a una xeringa con poca resistencia plena d'aire u augua. Se va ficando l'agulla y se va pretando l'embolo d'a xeringa. Mientres se travesa musclo u ligamentos se produce una resistencia en pretar l'embolo. En plegar ta o espacio epidural ista resistencia desapareixe y permite eslimbiar l'aire u l'augua. Isto ye o signo de que s'ha arribau ta o espacio epidural. En iste puesto se mete o farmaco que se va a administrar y o catéter si cal.
L'anestesia epidural ye indicada pa realizar aquellas intervencions en abdomen, mas que mas a livel infraumbilical, como son esvinzaduras, intervencions en testiclos, vuixiga u partos. L'apendicitis que corresponde a ista zona no ye una buena indicación ya que, encara que a piel si corresponde a la zona, l'apendiz y o bodiello adchacent son innervaus por niérvols de livels superiors a la zona anestesiada y, en traccionar o bodiello, puet producir-se dolor.
Una modificación d'ista tecnica pende en ficar un catéter en o espacio epidural por o que se pueden reinchectar farmacos, u bien instaurar una perfusión pa producir una anestesia contina y prolongada, útil pa intervencions luengas u pa analgesia postoperatoria. Os farmacos que s'inchectan en o espacio epidural son cuantos, pero mas que mas son os anestesicos locals. Istos producen un efecto en función d'a dosi administrada. En chicotas dosis bloqueyan as fibras que transmiten a dolor. A mas altas dosis producen bloqueyo de l'actividad muscular y una paralisis. Y a mayors dosis encara un bloqueyo sensitivo. Atros farmacos emplegaus son diferents derivaus morfinicos. En l'actualidad s'han publicau cuantos treballos sobre a inchección de diferents farmacos por vía peridural como a clonidina u a ketamina, farmacos d'utilización endovenosa pero que s'ha visto que tamién actúan a livel d'a fibra niervosa. L'asociación por vía epidural de dos farmacos potencia l'acción d'os dos minimizando os suyos efectos segundarios en permitir reducir a dosi.
En os zaguers anyos se ye emplegando muito l'anestesia peridural toracica que consiste en a mesma tecnica pero a livel d'as vertebras toracicas. D'ista manera se produce l'analchesia de zonas superiors a las alcanzadas con a peridural lumbar y s'emplega mas que mas pa analchesia postoperatoria de cirurchía abdominal alta u cirurchía toracica.
Se veiga también
editarReferencias
editar- ↑ (es) Real Academia Nacional de Medicina. Diccionario de términos médicos. Madrid: Panamericana; 2012.
- ↑ (es) "Spinal anaesthesia and local medication of the cord". J.L. Corning. New York Medical Journal. Volumen 42. 1885. Pachinas 483–5.
- ↑ (es) "The first spinal anesthesia. Who deserves the laurels?". G.F. Marx. Regional Anesthesia. Volumen 19, numero 6, 1994. Pachinas 429–30. PMID 7848956
Vinclos externos
editar
Se veigan as imáchens de Commons sobre l'anestesia epidural.- (en) Anestesia epidural MedlinePlus, NIH.
Datos: Q841215- Multimedia: Epidural anaesthesia / Q841215