أيل لأطلس
أيْل لأطلس (السمية لعيلمية: Cervus elaphus barbarus، سيرڤوس إلافوس بارباروس)، هو نوع فرعي ديال لأيل لحمر، مستوطن أصلي ف جبال لأطلس ف لمغريب و شمال إفريقيا. هو النوع د لأيل لوحيد لي باقي مستوطن إفريقيا. هاد لحيوان كاين ب عداد قليلة ف شي محميات ف لمغرب بحال تازݣة و كايتعتابر من لحيوانات لمهددة ب لنقيراض.[1]
أيل لأطلس
| ||
معلومات عامة | ||
سمية لعيلمية | Cervus elaphus barbarus (إدوارد تورنر بينيت، 1833) | |
لخاصية د ترتاب | نوع تحتاني | |
تابع ل | أيل حمر |
لوصف
أيل لأطلس صغير ب لموقارنة معا لأيل لحمر لعادي. لکسدة ديالو ملونة ب لقهوي غالق معا شوية د النقاط بويض ف كرشو و ضهرو. مقارنة ب لأيل لحمر، لݣرون د لأيل لأطلسي صغار.
لموفتاريسات د لأيل لأطلسي
لموفتاريسات د أيل لأطلس منها، ولا كان منها، سبع لأطلس، دب لأطلس، نمر لأطلس (ليوپار)، و الديب لإفريقي ولا كيف ما كانعيطو ليه الديب. ولكن آپار من الديب لإفريقي، ݣاع هاد لموفتاريسات مهددة ب لنقيراض ولا ديجا نقارضو بحال الدب لأطلسي، ف لمناطيق لي كايكون فيها لأيل لأطلسي.
لمحافضة على النوع
نقارض لأيل لأطلسي من لمغريب ف اللخر د لقرن 19،[2] منين جاو الصبليون ف الشمال د لمغريب، جابو معاهوم نوع قريب ليهوم جينيا هو لأيل لأوروپي.
عام 1994، كلّفات لمندوبية السامية ل لمياه و لغابات شركة مغريبية-آلمانية، ب تخصاص ݣطار و نص مسيّج ف لمحمية د تازݣة (لي مساحتها تقريبا 14 لألف ݣطار). جابو 8 من لأيايل لأطلسية لمنقحة جينيا من تونس، 2 دكور و 6 د النتوات، و طلقوهوم ف ديك لرض لمسيّجة لمخصوصة ليهوم، موراها بعام جابو 10 خرين و طلعو لݣطارات، حتى بداو كايكترو ل 71 راس ف عام 2005.
ف عام 2019، كاين تقريبا 250 راس ف محمية تازݣة، و محمية الصخيرات و محميات أخرى، بحال محمية جبل بوهاشم (تقريبا 8000 ݣطار) لي تطلق فيها هاد النوع ف 2020،[3] بعد ما نقارض منها 150 عام قبل. بدات لعملية ب قنص ݣاع لي بقى من لأيايل لأوروپية لي مامأصلاش ف لمغريب، باش يقدرو يمنعو لمجاوجة بينات لأيايل لأطلسية و لوروپية، لي غاتودي لتكرويزات بينات النواع ب جوج.
أخطار على لأيل لأطلسي
أبرز موسبيب د لموت ل أيل لأطلس هوما لقناصة ب السلاح. وقفو الجونضارم لملكي د إقليم تازة، ف 21 ماي 2023، عيصابة ف حالة تالبوس، و هوما كايسلخو واحد لأيل مورا ما دبحوه و قنصوه ب السلاح.[3]
عيون لكلام
- ^ "Barbary stag (Cervus elaphus barbarus)". U.S. Fish and Wildlife Service (ب نڭليزية).
- ^ "إطلاق مجموعة من الأيائل البربرية بمحمية بوهاشم بإقليم تطوان". Map Ecology (ب لعربية). 2020-12-25. تطّالع عليه ب تاريخ 2024-07-04.
- ^ a b الشكوري، كمال (2023-05-22). "صيد الأيل البربري يوقع 4 أشخاص في قبضة الدرك الملكي بواد أمليل". خبايا نيوز (ب لعربية). تطّالع عليه ب تاريخ 2024-07-04.