تعديل لإمبراطورية لبيزنطية

{{مقالة ناقصينها عيون لكلام}}
{{معلومات دولة|صورة=Justinian555AD.png}}
'''لإمبراطورية البيزنطية''' ([[ليونانية|باليونانية]] Βασιλεία Ῥωμαίων) و كتسمى حتى '''لإمبراطورية الرومانية الشرقية''' هي دولة كاتمتّل لإستمرارية ديال [[لإمبراطورية الرومانية]] ف لمناطق الشرقية ديالها، بعدما كانت طاحت [[لإمبراطورية الرومانية لغربية]]، و لعاصمة ديالها [[لقسطنطينية]] لي هي دابا [[إسطنبول]]. كانت لإمبراطورية لبيزنطية هي مركز نتاع تطور و لفن و الأدب لمسيحي و كانت كتمثل لحضارة و الثقافة المسيحية الشرقية الأورثودكسية و عتامدو البيزنطيين على نظام ؤطوقراطي، و كان ف السلطة التشريعية ل مجلس نتاع الشيوخ لبيزنطي.

[[فيشي:Red flag with Chi Rho attributed to the Byzantine Empire.png|تصغير|كيتعتابر هاد رمز هو شعار نتاع دولة بيزنطة و رمز لمسيحية الأورثودكسية]]

== أصل د سمية ==
كيرجع الاصل نتاع سمية لكلمة " بيزنطة" لي هي سمية لقديمة لمدينة لقسطنطينية قبل ما يولي قسطنطين هو الامبراطور ، و كانت الإمبراطورية البيزنطية ف ديك الوقت غالبا ما كانوش كيسميوها بهاد سمية حيتاش سكان غالبا ما كانوا كيعيطو ليها " [[لإمبراطورية الرومانية|لإمبراطورية رومانية]] " Βασιλεία τῶν Ῥωμαίων و لا " لجمهورية الرومانية " Πολιτεία τῶν Ῥωμαίων و كانوا كيقولو ليها حتى " [[ليونان]] " Γραικία ، و كانوا لإورپيين لي ف [[ؤروپا|اوروپا]] لغربية كيقولو ليها " لإمبراطورية ليونانية " و لامبراطور لبيزنطي كان سميتو" امبراطور نتاع ليونان "باش يقدرو يفرقوا ما بينهم و بين دولة رومانية لمقدسة لي فالغرب ، و كان لعالم لمسلم من عرب و فرس و [[أمازيغ]] كيسميوهم ب مصطلح " رومي " ولا " روم " و الرومي هو اي شخص عندو علاقة بدولة لبيزنطية ولا [[مسيحية|مسيحي]] كيتبع مذهب الارثودكسي البيزنطي

== تاريخ ==
=== لقسطنطينية عاصمة نتاع دولة رومانية ===
بدا تاريخ نتاع بيزنطة منين قسطنطين بدل لعاصمة نتاع دولة الرومانية ل لقسطنطينية عام 330 م و ختارها باش تكون [[روما]] جاوجة ! و حيتاش هي جات فواحد الموقع لي استراتيجي و تجاري مهم بين [[أسيا|اسيا]] و اوروپا و [[لبحر لكحل]] و [[لبحر لبيض لمتوسط]] و دار قسطنطين بزاف نتاع تعديلات لتنمية نتاع لمدينة
[[فيشي:Eastern Roman Empire, Justinian the Great period(AD550).jpg|تصغير|خريطة نتاع بيزنطة ف لقرن رابع]]

=== لمسيحية ف لإمبراطورية لبيزنطية ===
قسطنطين كان من لحكام لي عطاو حقوق كثيرة [[مسيحية|لمسيحيين]] و عطاهم بزاف نتاع لميزات مور ما تعرضو لقمع لي طويل ف عهد بزاف نتاع لحكام [[لإمبراطورية الرومانية|رومانيين]] و من نهنا غا تبدا [[مسيحية|لمسيحية]] بالانتشار بواحد شكل لي كبير ف لإمبراطورية و لكن منين وصل لإمبراطور يوليان لحكم عام 361 م حاول انه ينقص من نفود نتاع لمسيحية لي زادت بشكل كبير و بغا يرجع قيمة لوثنية لهلنستية ف لإمبراطورية من جديد و لكنيسة لي سمات عليه " يوليان لكافر " و لكن رجعات لمسيحية بقوة من جديد من مات يوليان مقتول عام 363 م حتى ولات الدين رسمي مور 3 نتاع لقرون ديال الاضطهاد

=== نهاية نتاع لامبراطورية رومانية لغربية ===
و ف لقرن لخامس تسمع خبار ان لإمبراطورية رومانية لغربية طاحت و منين كانت الإمبراطورية لبيزنطية شرقية ف لقرن 5 تتمتع بجو من سلمية و غادية فوتيرة نتاع تقدم مستمر كانت جارتها لغربية ف حالة لي كتدل على انها ما بقا ليها والو و تطيح و سبب كيرجع لغزوات و لاستعمارات لي كترات عليها من لقبايل نتاع لجرمان حيتاش ف عام 476 م جا لقائد لجرماني أودواكر و قتل الامبراطور روماني لغربي رومولوس و هادشي لي ادى ف تالي لنهاية نتاع دولة رومانية لغربية

=== لحروب نتاع بيزنطة مع لجرمان و لقوط ===
ف لقرن سادس بدات بيزنطة كتدخل لحروب مع لقوط و لجرمان لي ولا عندهم نفود كبير ف اوروپا لغربية و كان نزاع لي بين بيزنطيين و لجرمان هو نزاع سياسي و مدهبي ، و نزاع سياسي لي بدا منين حاولت دولة بيزنطية تاخد اراضي ف [[ؤروپا|اوروپا]] لغربية حيتاش ف عام 535 نجحو لبيزنطيين ف سيطرة على [[صقلية]] و هادشي لي خلا لقوط يقاوموا هاد لغزو بيزنطي و قدرو لبيزنطيين يحاصرو ناپولي و روما و جنوب نتاع طاليان عام 536 و لملك نتاع لقوط شرقيين صيفط لبابا ثيوداهاد ل مدينة نتاع لقسطنطينية باش يطلبهم يخرجوا من [[روما]] و جنوب [[الطاليان|طاليان]] و صقلية و لكن لبيزنطيين رفضوا و ف عام 546 لقوط شرقيين دخلوا ل روما و لكن في تالي لبيزنطيين جابوا جيش كبير لي وصل لعدد ديالو ل 35.000 واحد و لي قاموا بمعركة ضد توتيلا لي هو زعيم قوطي و خسر ف لمعركة ضد لبيزنطيين و مور ما مات توتيلا خلفو زعيم تيا لي تاهو خسر واحد لمعركة عام 552 ، واخا لقوط قاومو و لكن فتالي لبيزنطيين ربحوا ف شبه لجزيرة طاليانية ، و ف عام 551م حاولت مملكة لقوط لغربية ف [[سپانيا]] انها تدعم لمتمردين على دولة لبيزنطية و هادشي لي خلا لبيزنطيين يصيفطو جيش كبير لي قدر ياخد جنوب نتاع سبنيول و بقات تحت سيطرة نتاعهم حتى رجعوها لقوط ف أواخر لقرن سادس

=== لحروب و لمشاكل لبيزنطية مع سلاڤين و صربيين ===
و تعرضات دولة لبيزنطية لبزاف نتاع مشاكل و لغارات من لسلاڤين و [[صربيا|صربيين]] لي ف لبلقان ف دولة لبيزنطية لي حققات انتصارات كثيرة ف غرب اوروپا و بزاف نتاع لبلايص تعرضات لخسارة كبيرة ف شرق اوروپا و بالضبط لبلقان

=== لحالة نتاع لوتنية لهلنستية منين ولات مسيحية دين رسمي ===
لوتنية لهلنستية ف لقرن سادس ولات حاجة ممنوعة و بدات دولة لبيزنطية كتقاوم و كتضطهد اي واحد ماشي مسيحي و ف نفس الوقت فهاد لفترة بانت حركات لي حاولت تخلط ما بين ترات الهلنستي و لإيمان لمسيحي بحال الأكاديمية الافلاطونية لي تسدات ف تالي بسبب انها كتروج لأفكار وتنية
[[فيشي:Hellenism SYMBOL azure.png|تصغير|رمز نتاع لوتنية لهلنستية]]

=== لمشروع نتاع ايا صوفيا ===
بداو لمهندسين بجوج ايسيدور و انتيميوس ف لخدمة باش ينبنيو لكنيسة نتاع لحكمة الإلهية و لا كنيسة ايا صوفيا و هاد لمشروع لي بناوه بلاصة كنيسة قديمة تدمرات بسبب شي تمردات كانوا وقعوا و هاد لكنيسة تبنات بحال تكريم لروح " صوفيا " لي هي مسيحية [[مصر لقديمة|مصرية]] تعرضات لتعديب من طرف دولة رومانية حيتاش ما بقاتش كتعبد الاصنام و بسبب ديك تضحية لي دارت قرر لبيزنطيين يبنيو هاد لكنيسة عام 537

=== لحروب بين بيزنطة و لفرس ===
و ف جيهة شرقية كان نفس سيناريو حيتاش لحروب لي كانت بين لفرس و لبيزنطيين كان صعيب شي حد يوفقهم و لكن ف عام 561 م تافق جيستنيان و كسرى انه يديرو واحد لإتفاق نتاع سلام لمدة ديالو 50 عام و منين تسالا لإتفاق رجعات ديك لعداوة لي بين لفرس و لبيزنطيين و هادشي لي خلا ف بداية لقرن سابع انه لفرس  ياخدو شام و يدخلو [[لقدس]] !

و لكن منين وصل هرقل لحكم نتاع لإمبراطورية لبيزنطية هادشي لي خلا لأمور تقلب لبيزنطيين ف تالي و قدر يرجع هرقل [[لقدس]]<nowiki/>و شام و كل لأراضي لي خداوهم لفرس

=== لفتوحات توسع نتاع لعرب ضد بيزنطة ===
بداو لعرب لحملات ديالهم على دولة بيزنطية و كل شي بدا منين صيفط نبي [[محمد]] الصحابي لحارتي بن عمير الازدي رسول لبيزنطة لي ف تالي قتلوه رومان ! و هنا لعرب غا يبداو لحملات على بيزنطة و غا يبداو لعرب كيتوسعو على حساب اراضي لبيزنطية حتى لمعركة اليرموك عام 636 م و مور هاد لمعركة رجع شام كلو تحت سيادة نتاع لخلافة و فالعهد نتاع الامويين غا يحاولو يدخلو لقسطنطينية و غا يحاصروها و لكن ما غا يقدوش يطيحوها عام 678 م و رجعو الامويين عاوتاني و حاصروا لمدينة للمرة جاوجة عام 717 م و لكن هادشي خلا لبيزنطيين يتحركو و يحاولو يقاومو هاد توسع لعربي و من عام 740 م بداو لبيزنطيين كيربحوا و حققوا نتصارات كبيرة ف شمال نتاع شام و شرق الاناضول و لي خلا لبيزنطيين يربحوا ف اغلبية لمعارك حيتاش خلافة الأموية ف ديك الفترة كانت كتعيش ضغوطات و مشاكل ف عهد عبد المالك بن مروان و هادشي لي خلا بيزنطة تدخل ل مدينة مرعش و تربح ف معركة بحرية حدا قبرص

و ف لقرن تاسع الميلادي بدات دولة لبيزنطية كتضاعف بسبب صراعات و المشاكل و التورات لي ضدها و هادشي لي خلا لعرب و المسلمين يبداو ف غزوات جديدة ضدها و ف عام 827 دخلو لمسلمين [[صقلية|لصقلية]] و ولات الجزيرة تحت لحكم نتاع الأغالبة و دخلو لمسلمين لجزيرة [[كريت]] اليونانية و بانت فيها إمارة كريت لي ولات تحت تبعية لعباسية و بداو لعباسيين هوما و لحمدانيين ف شام كيديرو غارات على بيزنطة و هادشي لي خلا الأمر يزيد يصعاب على لبيزنطيين

و ف عام 963 م جا لامبراطور ناقفور لي ستاطع يرد جزيرة كريت لسيادة نتاع لبيزنطيين و حتى جون زيمسكي لي حتل قبرص و لكن واخا لإمبراطورية قدرات ترجع بعض لبلايص و لكن كانت دولة ف خطر كبير من ناحية نتاع لفاطميين
[[فيشي:IslamicConquestsIroon-ar.png|تصغير|خريطة كتبين توسع لعربي و لحملات لي داروها على بيزنطة و لحالة سياسية تماك]]

=== حرب لبيزنطيين مع لبلغاريين ===
نتيجة لي كانت سلبية على دولة لبيزنطية هي منين ركزات بيزنطة على لعرب و الفرس و خلات خطر واحد اخر و لي هوما  [[بلغاريا|لبلغاريين]] لي قدرو يتوسعو ف بلقان ، عام 894 م لبلغاريين غزاو بيزنطة و هادشي لي خلا لإمبراطورية تفكر ف الرد عليهم و سيفطوا الاسطول ديالهم ف لبحر لكحل باش يقدرو يهاجمو لبلغار من لور و حتى [[هنݣاريا|هنگاريين]] عاونو لبيزنطيين ضد ف لبلغاريين ، و ف عام 923 بداو لبلغاريين بتعدية على لبلايص شمالية نتاع بيزنطة و موراها بعام بلغاريين فرضوا لحصار على لقسطنطينية تحت قيادة نتاع ملك لبلغاري سيميون و لكن لملك مات موراها و هادشي لي خلا بلغاريا و القوة ديالها تضعاف و قدرو لبيزنطيين يدخلوا لبلغاريا و يردوها محمية بيزنطية حتى جاو [[روسيا|رواسة]] و دخلوا لبلغاريا و لكن زعيم بيزنطي جون لول جرا على روس و يرجع بلغاريا ل بيزنطة

بانت مقاومة بلغارية ضد لبيزنطيين و لكن واخا هكاك ما قدروش لبلغاريين انهم يربحو ضد بيزنطة و ف عام 1014 م خسرت بلغاريا

معركة كيلديون لي بيها ستسلموا لبلغاريين

=== لعلاقات روسية لبيزنطية ===
كانت علاقات ما بين رواسة و لبيزنطيين علاقة متوترة فلول و لكن تقوات العلاقة ديالهم و خصوصا مع رواسة نتاع [[كييڤ]] لي دارو مع لبيزنطيين علاقة تجارة و العسكر بل وصلات العلاقة روسية لبيزنطية لزواج لأميرة آنا ب فلاديمير لي كانت سبب أساسي فالبداية نتاع دخول لمسيحية لرواسة نتاع كييڤ موراها

=== لفيقة لمقدونية ===
بدا لعصر نتاع لفيقة لمقدونية لي كان كيتعتبر فترة لي مؤترة بزاف ف تاريخ لبيزنطي حيتاش فهاد لوقيتة بالضبط تكتبو بزاف نتاع ملجدات لقانون و لسياسة و تطور الاهتمام بالفن لبيزنطي و [[لفلسفة]] و حتى تدريس لمسيحية و لاهوت فالجامعات و اكاديميات و فهاد لحقبة حتى هي دخلوا لبلغاريين و الصربيين و رواسة لمسيحية الارتودكسية و هادشي لي خلا نفود و تأثير بيزنطة يخرج برا من لإمبراطورية

=== لإنشقاق لعظيم ( لكنيسة لغربية و شرقية تقسمو ) ===
ف لقرن 10 ميلادي بدات العلاقات ما بين بيزنطة لي كتمثل لمسيحية الارتودكسية و روما لي كتمثل لمسيحية الكاتوليكية لواحد لأزمة لي هي كبيرة و تمسات هاد الحادتة ب " بالانشقاق العظيم " و كولشي بسبب نفود لجرماني لي كان كبير ف لغرب و كاين تا نزاعات دينية لي بانت بين لغرب و الشرق فشي امور لي عندها علاقة بالاهوت نتاع المسيحية

=== صليبيين و بيزنطة ===
لحملة لولة و تانية لي كانت كتستهدف شام لي قدرو صلبيين يديرو امارات و دول مسيحية تماك منهم مملكة نتاع لقدس الصليبية عام 1099 م و كانت الحملة تالتة لي خطتهم يسيطرو على [[مصر]] و لكن ف الحملة رابعة غا يتبدل كولشي ف بلاصة ما تكون الحملة رابعة غادية ل شام و المشرق مشات القسطنطينية ! و دخلو صليبيين و دمرو و خربو لمدينة و شعلوا فيها العافية عام 1204 م و مور 60 عام من سيطرة نتاع صلبيين على لقسطنطينية قدرت سلالة نتاع لاسكاريس انها ترجع لقسطنطينية لبيزنطة و تجري على صليبيين
[[فيشي:Map of the Byzantine Empire, 950 AD.png|تصغير|لخريطة نتاع بيزنطة عام 950 م]]

=== تواركة و نهاية نتاع دولة لبيزنطية ===
بداو [[تركيا|تواركة]] كيبانو و بدا نفود ديالهم كيزيد ف الاناضول ف لقرن 11 مور ما ربحو سلاجقة على لبيزنطيين ف معركة نتاع ملادكرد لي كانت لبداية نتاع توسع تواركة و لي غا يكونو نيشان لخطر لحقيقي على بيزنطة و غا تبان دول تركية ف لأناضول بحال سلاجقة روم و إمارة قرمان و لكن اخطر دولة و لي غا يكون عندها دور لكبير ف مصير
نتاع دولة بيزنطية و هوما العتمانيين لي اسسوا دولة ديالهم عام 1299 م على يد عثمان بن ارطغرل و ختارو مدينة بورصة عاصمة لدولة ديالهم و بداو ف توسع و قدرو ياخدو اخر مدينة ف الاناضول تحت سيطرة لبيزنطيين و لي هي اشكيشهر و موراها احتلوا ليونان و غلبوا صربيين و حاصروا لقسطنطينية من كل جوايه و ف لقرن 14 السلطان العتماني بيازيد وجد جيش كبير باش يدخل لقسطنطينية و لكن ما قدرش حيتاش كانوا التيموريين بداو الحملات من شرق حتى وصل السلطان محمد لفاتح لحكم و هنا حس لامبراطور قسطنطين 11 بالخطر و طلب من [[ؤروپا|الاوروبيين]] يعاونوه باش يوقفو العتمانيين و لكن محمد دخل لمدينة و حاصرها و تقتل الامبراطور قسطنطين 11 و هكذا كانت نهاية نتاع دولة لبيزنطية لي دامت تقريبا 1100 عام !

== عيون لكلام ==
{{عيون}}

{{زريعة}}
{{ضبط مخازني}}

[[تصنيف:بلدان ما بقاتش]]
[[تصنيف:مقالات فيها مصدر و 3000 بايت]]