Henrik Ibsen

Henrik Ibsen
Vida
Nacimientu	Stockmanngården (en) , 20 de marzu de 1828
Nacionalidá	Noruega
Residencia	Skien; Grimstad; Christiania (es) ; Bergen; Christiania (es) ; Copenḥague; Berlín; Venecia; Roma; Reinu de Baviera; Munich; Dresde; Estocolmu; Munich; Gossensass (en) ; Roma; Munich; Roma; Christiania (es) ; Trondheim; Molde; Bergen; Christiania (es) ; Copenḥague; Munich; Viena; Budapest; Munich; Christiania (es) ; Copenḥague; Estocolmu; Christiania (es)
Llingua materna	noruegu
Muerte	Christiania (es) , 23 de mayu de 1906 (78 años)
Sepultura	Cementerio de Nuestro Salvador de Oslo (es)
Causa de la muerte	accidente vascular cerebral
Familia
Padre	Knud Ibsen
Madre	Marichen Altenburg
Casáu con	Suzannah Ibsen (1858 – 1906)
Fíos/es	Sigurd Ibsen; Hans Jacob Henriksen
Hermanos/es	Hedvig Ibsen; Ole Paus Ibsen; Johan Andreas Altenburg Ibsen (en) ; Nicolai Alexander Ibsen (en) ; Johan Altenburg Ibsen (en)
Estudios
Llingües falaes	noruegu; danés
Oficiu	dramaturgu, poeta, llibretista, realizador, escritor
Trabayos destacaos	Peer Gynt; Casa de muñecas (es) ; Espectros (es) ; Un enemigo del pueblo (es) ; El pato silvestre (es) ; Hedda Gabler (es) ; La casa de Rosmer (es) ; Brand (en) ; The Master Builder (en) ; Catiline (en) ; The Mountain Bird (en) ; La dama del mar (es) ; Lady Inger of Ostrat (en) ; The Feast at Solhaug (en) ; White Horses (en) ; The Vikings at Helgeland (en) ; John Gabriel Borkman (es) ; Emperor and Galilean (en) ; The Burial Mound (en) ; Love's Comedy (en) ; The Pretenders (en) ; El pequeño Eyolf (es) ; Norma (en) ; When We Dead Awaken (es) ; Olaf Liljekrans (en) ; The Grouse in Justedal (en) ; The Pillars of Society (en) ; St. John's Eve (en) ; Svanhild (en) ; The League of Youth (en) ; Terje Vigen
Premios	ver Caballeru Gran Cruz de la Orde de San Olav‎ ; Knight Grand Cross of the Order of Vasa ; Knight Grand Officer of the Order of the Saxe-Ernestine ; Order of the Polar Star - Commander's Grand Cross ; King Oscar II's reward medal ; Gran cruz de la Orden de Dannebrog ; Orde de Medjidie de tercer clas ;
Nominaciones	ver Premiu Nobel de Lliteratura ; (1902); Premiu Nobel de Lliteratura ; (1903); Premiu Nobel de Lliteratura ; (1904);
Influyencies	August Strindberg, Georg Brandes, Søren Kierkegaard, Henrik Wergeland y Jens Peter Jacobsen (es)
Movimientu	lliteratura realista
Seudónimos	Brynjolf Bjarme
Xéneru artísticu	drama; poesía
IMDb	nm0406585
	nb.no…
	;

Henrik Ibsen (20 de marzu de 1828, Stockmanngården ^(en) – 23 de mayu de 1906, Christiania ^(es) ) foi un poeta, dramaturgu y direutor de teatru noruegu. Considéraselu ún de los principales dramaturgos contemporáneos pol so llabor de modernización de temes y situaciones y pola introducción del xéneru del "drama en prosa". Forma parte del grupu lliterariu "Dei fire store" (en noruegu, "los cuatro grandes" de la lliteratura noruega), xunto a Bjørnstjerne Bjørnson, Alexander Kielland y Jonas Lie.

La crítica lliteraria defende la consideración xeneralizada de qu'Ibsen ye'l "poeta dramáticu más profundu dende Shakespeare".^[13] La so influyencia foi almitida por escritores tan reconocíos como George Bernard Shaw, Oscard Wilde, James Joyce y Eugene O'Neill.

Ibsen escribió toles sos obres siguiendo l'estándar danés, puesto que yera considerada llingua culta nel so país mientres el sieglu XIX, cuando s'alcontraba xuníu a Suecia. La mayor parte de los sos escritos fueron asoleyaos poles editoriales daneses ISIS Boghandels y Gyldendal.

Vida

Henrik Ibsen nació'l 20 de marzu de 1828 na llocalidá de Skrien, nel condáu noruegu de Telemark. Foi'l primeru de los cinco fíos del matrimoniu ente Knud Ibsen, comerciante descendiente d'una familia de capitanes de barcu daneses, y Marichen Ibsen, fía del armador Andreas Altenburg. Estos primeros años sedrán de tranquilidá y felicidá dientro d'una familia amante del arte y con unos proxenitores tan bien llevaos que yera, según pallabres del propiu Ibsen, "strange, almost incestuous marriage" ("estraña, casi un matriomiu incestuosu") ^[14]. Cuando tien siete años, el negociu del pá quiebra y vénse obligaos a subastar toles sos posesiones en Skrien y a colar pa la granxa Venstøp. L'amargor del pá acaba n'alcoholismu, camudando a una angustiosa y tensa situación familiar, onde la má sacrifícase por sacar los fíos alantre. Estos primeros años van sirvir d'inspiración al Ibsen escritor, onde van ser recurrentes les rellaiciones interpersonales llimites, la inseguridá económica, los ambientes rurales y semirurales y, sobre too, una gran consideración y sensibilidá pa coles muyeres.

A los quince años, Henrik tien que dexar la escuela y entra d'aprendiz nuna farmacia de Grimstad. Aprovecha esos años pa escribir les sos primeres obres de teatru. Con 18 años, dexa embarazada a una sirvienta de la casa y, anque nunca nun reconocerá al fíu, habrá mantenelu económicamente hasta que llegue a l'adolescencia.

En 1850 asoleya el so primer drama, Catilina, gracies al sofitu de dellos amigos, embaxo'l pseudónimu Brynjolf Bjarme. Ye un fracasu de ventes y la producción usarase como papel d'envolver. Esi mesmu añu, marcha pa Christiania pa intentar acceder a la universidá, cola idea d'estudiar medicina, pero nun supera la mayor parte los esámenes y acaba por abandonar. Pero ellí entama l'amistá con Aasmund Vinje y Paul Botten-Hansen y inicien la espublización d'una revista satírica al mou de la danesa "Corsaren": Ibsen escribirá crítiques lliteraries y fadrá les illustraciones. El so trabayu nun pasa desapercibíu y contrátenlu d'otres revistes y periódicos pa que faiga les crítiques de los espectáculos de la ciudá. Estos contautos favorecerán que la so segunda obra Kæmpehøien (El túmulu del héroe) s'estrene nel Christiania Theater, el 26 de setiembre. Agora sí algama l'esitu y el violinista Ole Bull, cofundador del Det norske Theater i Bergen (Teatru Noruegu de Bergen), contratarálu como autor dramáticu en plantía.

El teatru financiará-y un viaxe d'estudios a Copenḥague y Dresde, pa qu'algamara conocimientos de direición d'escena. Equí alcuéntrase l'orixe d'una de les principales carauterístiques de teatru ibsenianu: les sos llargues y detallaes acotaciones. Mientres los seis años que pasó en Bergen escribió cinco obres: Sancthansnatten (Nueche de San Xuan), 1852; Gildet paa Solhoug (La Fiesta de Solhoug), 1855; Fru Inger til Østeraad (Señora Inger), 1857; Olaf Liljekrans, 1857; y Hærmændene paa Helgeland (Los viquingos en Helgeland), 1858.

En Bergen conocerá a Susana Daaé Thoresen y casaráse con ella el 28 de xunetu de 1858. Esi añu torna a Christiania cola intención d'algamar un emplegu meyor sufragáu nel Kristiania norske Theater (Teatru noruegu de Christiania), pero, dempués de munches dificultaes, quiebra en 1862. Fueron unos momentos mui difíciles pa la pareya, con un fíu pequeñu (Sigurd, nacíu n'avientu de 1859, qu'habrá ser futuru primer ministru noruegu).

Fartu de problemes económicos y frustráu pola actitú de los sos compatriotes, Ibsen marcha de Noruega en 1864, nun auto-exiliu que duraría 27 años. Durante estos años, Ibsen vivió en Roma (1864-1868), Dresde (1868-1875), Múnich (1875-1878) y otra vuelta Roma (1878-1885) y Múnich (1885-1891).

Nel so primer periodu en Roma, escribe Brand (1866) y Peer Gynt (1867), asoleyaos n'Escandinavia pola editorial danesa ISIS Boghandels, del so collaciu Frederik Hegel. Brand va ser el so primer ésitu nel mercáu del llibru nórdicu. Con Peer Gynt, que se trata d'un drama satíricu en prosa, fechu pa lleer más que pa ser representáu (más tarde lu adaptará a la escena, con música d'Edvar Grieg [1]), ruempe cola tendencia mitolóxica ya historicista del teatru nacional noruegu de la dómina.

L'ésitu emburrió a Ibsen pa escomenzar l'estudiu de lo que'l denominó "drama d'idegues": introducir les sos propies idees filosófiques, mui alcordes coles nueves tendencies descrites por Søren Kierkegaard. En 1873 y en Dresde escribe Kejser og Galilæer (L'emperador y Galileo), onde recrea la vida del emperador Xulianu l'Apóstata, y que ye exemplu d'esperimentación n'esti camín esistencialista, que va escontra les costumes pruducies pola sociedá cristiana.

Pa Ibsen va ser la so obra maestra, anque la crítica considera de forma xeneralizada que la xenialidá del noruegu va venir poles sos drames sociales, qu'escribirá nos siguientes años ente Roma y Múnich, porque nelles pon pates pa enriba, cola so crítica satírica y el so esmolecimientu polos sentimientos de los personaxes, les carauterístiques temátiques ya argumentales nun solo del teatru noruegu, tamién del teatru universal de la dómina. Nos sos drames contemporáneos trátense temes centrales y polémicos na sociedá actual: el papel de les muyeres nel matrimoniu y na sociedá, la hipocresía moral y l'abusu de poder que sufren les persones en toles estayes de la vida pública (el comerciu, la política, la ilesia y los medios de comunicación...), la rellaición ente la verdá y la moral, la llibertá y el deber, la minoría y la mayoría, los intereses medioambientales énte los económicos, l'incestu, la eutanasia, etc. A esta estaya pertenecen Samfundets Støtter (Los pilares de la sociedá), Et Dukkehjem (Casa de muñeques), Gengangere (Les pantasmes), En Folkefiende (Un enemigu del pueblu), Vildanden (El coríu xabaz), Rosmersholm (La Casa de Rosmer), Fruen fra Havet (La dama del mar) y Hedda Gabler.

En 1891, Ibsen regresa a Noruega. Nun alcuentra'l mesmu país que dexare, si non a una población crítica consigo mesma y agradecía al so trabayu, hasta'l puntu de que se-y concediera la máxima condecoración del país, la Cruz de San Olav. En Christiania, escribirá los sos últimos drames, marcaos por un fonderu simbolismu y un aire de señaldá, que falen de los pesares d'unos paisanos vieyos, onde bien se pue espeyar el caráuter del propiu Ibsen del momentu. Bygmester Solness (El Maestru Constructor), Lille Eyolf (El pequeño Eyolf), John Gabriel Borkman y Naar vi døde vågner (Cuando despertamos los muertos) son les sos últimes obres.

Ibsen morrerá'l 23 de mayu de 1906, na so casa d'Arbins Gade en Christiania, dempués d'unos años de mala salú, víctima de continuos ataques cerebrovasculares. Sobre la so muerte, cuéntase que'l dia anterior, una enfermera que lu cuidaba dába-y un parte a un visitante, argumentando que s'alcontraba muncho meyor dempués del últimu ataque; Ibsen, desde la so cama respondió "Tvertimod!" ("¡Por el contrario!"), siendo estes les sos últimes pallabres.^[15] Ibsen ta enterráu en Var Frelsers gravlund ("Cementeriu del Nuestru Salvador"), nel centru d'Oslo.^[16]

Obra

Obra dramática

1850 Catilina
1850 Kjæmpehøjen (El túmulu del héroe)
1852 Sancthansnatten (Nueche de San Xuan)
1855 Gildet paa Solhoug (La Fiesta de Solhoug)
1857 Fru Inger til Østeraad (Señora Inger)
1857 Olaf Liljekrans
1858 Hærmændene paa Helgeland (Los viquingos en Helgeland)
1862 Kjærlighedens Komedie (Comedia d'amor)
1864 Kongs-Emnerne (Los pretendientes)
1866 Brand
1867 Peer Gynt
1869 De unges Forbund (La liga de la mocedá)
1873 Kejser og Galilæer (L'emperador y Galileo)
1877 Samfundets Støtter (Los pilares de la sociedá)
1879 Et Dukkehjem (Casa de muñeques)
1881 Gengangere (Les pantasmes)
1882 En Folkefiende (Un enemigu del pueblu)
1884 Vildanden (El coríu xabaz)
1886 Rosmersholm (La Casa de Rosmer)
1888 Fruen fra Havet (La dama del mar)
1890 Hedda Gabler
1892 Bygmester Solness (El Maestru Constructor)
1894 Lille Eyolf (El pequeño Eyolf)
1896 John Gabriel Borkman
1899 Naar vi døde vågner (Cuando despertamos los muertos)

Obra lírica

1861 Terje Vigen
1871 Digte (La marca)

Referencies

↑ ^1,00 ^1,01 ^1,02 ^1,03 ^1,04 ^1,05 ^1,06 ^1,07 ^1,08 ^1,09 «Henrik Ibsen's writings Digital Edition». Consultáu'l 23 ochobre 2023.
↑ URL de la referencia: http://www.begravdeioslo.no/maler/grav/grave_id/12289. Data de consulta: 27 ochobre 2017.
↑ «Journal of the Norwegian Medical Association» (noruegu). Norwegian Medical Association.
↑ «Henrik Ibsen's writings Digital Edition». Consultáu'l 23 ochobre 2023.
↑ «Henrik Ibsen's writings Digital Edition». Consultáu'l 15 mayu 2024.
↑ «Henrik Ibsen's writings Digital Edition». Consultáu'l 16 mayu 2024.
↑ «Henrik Ibsen's writings Digital Edition». Consultáu'l 16 mayu 2024.
↑ ^8,0 ^8,1 «Henrik Ibsen's writings Digital Edition». Consultáu'l 23 ochobre 2023.
↑ ^9,0 ^9,1 ^9,2 ^9,3 ^9,4 ^9,5 ^9,6 «Henrik Ibsen's writings Digital Edition». Consultáu'l 9 setiembre 2024.
↑ ^10,0 ^10,1 URL de la referencia: http://www.aftenposten.no/fakta/nobel/Hvorfor-Ibsen-aldri-fikk-Nobelprisen-6440343.html.
↑ Afirmao en: nobelprize.org. Identificador de nominación de persona al Premio Nobel: 4435. Editorial: Fundación Nobel. Llingua de la obra o nome: inglés.
↑ «The Virtual Ibsen Centre». Consultáu'l 15 avientu 2023.
↑ Richard Hornby, Ibsen Triumphant, The Hudson Review, Vol. 56, No. 4 (Winter, 2004), páxs. 685-691
↑ Robert Ferguson, Henrik Ibsen. A new Biography, Dorset Press, 1996, p.280
↑ Michael Meyer, Ibsen - A Biography, Doubleday 1971, p. 807
↑ http://www.findagrave.com/cgi-bin/fg.cgi?page=gr&GRid=2497

[b8bb3b8961947725bf0aa4cab156111996e694e2-1] 1,00 ^1,01 ^1,02 ^1,03 ^1,04 ^1,05 ^1,06 ^1,07 ^1,08 ^1,09 «Henrik Ibsen's writings Digital Edition». Consultáu'l 23 ochobre 2023.

[afadcba46db7169e1949ef530443fd60259cda70-2] URL de la referencia: http://www.begravdeioslo.no/maler/grav/grave_id/12289. Data de consulta: 27 ochobre 2017.

[59f56723ddeb18b5efefe5116e475640ebbef11c-3] «Journal of the Norwegian Medical Association» (noruegu). Norwegian Medical Association.

[a4157c8c1f4711634302cb7284011f95a830f507-4] «Henrik Ibsen's writings Digital Edition». Consultáu'l 23 ochobre 2023.

[de4350b71f241db75d4c84eb229ea540ad0861fd-5] «Henrik Ibsen's writings Digital Edition». Consultáu'l 15 mayu 2024.

[b1742420b15128a229a88695b5463261ca4f3216-6] «Henrik Ibsen's writings Digital Edition». Consultáu'l 16 mayu 2024.

[c9cb6080de769f1db41c11a9053c02cba543e5f6-7] «Henrik Ibsen's writings Digital Edition». Consultáu'l 16 mayu 2024.

[63b51d1fd3f86326cd38bb0631c8115bc646a13c-8] 8,0 ^8,1 «Henrik Ibsen's writings Digital Edition». Consultáu'l 23 ochobre 2023.

[1ebe34a9f6acedaeb4b91121922c93b7a2a8e399-9] 9,0 ^9,1 ^9,2 ^9,3 ^9,4 ^9,5 ^9,6 «Henrik Ibsen's writings Digital Edition». Consultáu'l 9 setiembre 2024.

[bf0a3f5868e043c84556dca74ec528d9e69f4884-10] 10,0 ^10,1 URL de la referencia: http://www.aftenposten.no/fakta/nobel/Hvorfor-Ibsen-aldri-fikk-Nobelprisen-6440343.html.

[696d7c14599a28a4c7b92c672980a7f0dec97ac3-11] Afirmao en: nobelprize.org. Identificador de nominación de persona al Premio Nobel: 4435. Editorial: Fundación Nobel. Llingua de la obra o nome: inglés.

[9dd3da885db17fa77ecca495c42a8c39bac29658-12] «The Virtual Ibsen Centre». Consultáu'l 15 avientu 2023.

[13] Richard Hornby, Ibsen Triumphant, The Hudson Review, Vol. 56, No. 4 (Winter, 2004), páxs. 685-691

[14] Robert Ferguson, Henrik Ibsen. A new Biography, Dorset Press, 1996, p.280

[15] Michael Meyer, Ibsen - A Biography, Doubleday 1971, p. 807

[16] ttp://www.findagrave.com/cgi-bin/fg.cgi?page=gr&GRid=2497

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]

[14]

[15]

[16]