Spezjella Vawoltingsregion (Kina)
Dej spezjelln Vawoltingsregiona (SVR) vo da Vulksrepablik Kina, deitsch aa d Sundavawoltungszonna, san a Furm vo de owastn Vawoltungsoahaitn vo Kina, wou direkt unta da Zentroln Vulksreḡiring steng. Wej a Region hom s z Kina an hejchastn Grod vo Autonomi, wou s durtn git. Trutz da Autonomi, wou dej Zentrola Vulksregiring dej spezjelln Vawoltingsregiona iwalout, kõ dej Nazionola Vulksvasammling dennat unilateral Gsetz fia dej spezjelln Vawoltingsregiona machn, dej wou, vua dass s duachganga han, aa niad effntle gmacht wean.[1]
Dej gsetzlinga Grundloḡ fia d Schaffung vo de spezjelln Vawoltingsregiona is, in Gengsatz zer Vawoltingsglidaring vo Kina, wenga duach en 30ga Artikl wej duach en Artikl 31 vo da Vafassung vo da Vulksrepablik Kina vo 1982 gem. Hem in n Artikl 31 hoißt s: Da Stoot kõ wenn s Nout toud spezjella Vawoltingsregiona schaffn. Dea Struktuan, wou i de spezjelln Vawoltingsregiona braucht wean, soll a Gsetz viarschreim, wou vo da Nazionoln Vulksvasammling in n Lejcht vo de spezifischn Umstendt bschlossn wiad.[2][3][4][5]
Gengweate git s zwou spezjella Vawoltingsregiona, dej wou nou da Vafassung gschaffn woan han: d SVR Hongkong u d SVR Macao, freja a Britischs un a Portugisischs Protektorat oda Aussnpostal,[6] wou s 1997 resp. 1999 õ Kina assagruckt un iwagem hom zwengs an Umsetzn vo da Kinesisch-Britischn Gmoischaftling Deklarazion (Sino-British Joint Declaration) vo 1984 u da Kinesisch-Portugisischn Gmoischaftling Deklarazion (Sino-Portuguese Joint Declaration) vo 1987. Nou dena gmoischaftlinga Deklaraziona, dej wou bindada zwischnstootlinga Vatreḡ u ba de Vaointn Naziona regestriad han, u de Gsetz doudadri, soll de kinesischn Spezjelln Vawoltingsregiona "a houcha Grod vo Autonomi" zoukumma.[7] Generell wean dej zwou Spezjelln Vawoltingsregiona niad wej a Toal vo Festland-Kina gseng, weda vo de Spezjelln Vawoltingsregiona selwan nu vo de festlandkinesischn Amtsstumma un Owrekaitn.
D Regelung, spezjella Vawoltingsregion zen schaffn, findt se i da Vafassung vo 1982, in Antizipazion vo de Dischkurs u Gsprejch min Vaoinigtn Kinegreich za Frouḡ vo da Suwerenitet iwa Hongkong. Es is vuagseng gweng wej a Modell fia a ewentuells Zrugkumma vo Taiwan un ondana Insaln, dea wou da Repablik Kina 1949 askumma han.
Unta den Oa-Land-Zwoa-System Prinzip is d Zentrolreḡiring varontwortle fia d diplomatischa, mileterischa un ondana Õglengahaitn af stootlinga Eemma vo de zwou Spezjelln Vawoltingsregiona. Owa d Spezjelln Vawoltingsregiona pfoltn weida dej mera-porteiata Legislatif, es Rechtssystem, d Kiwarei, an separatn Zollraum, extringa Regln fia n Grenzvakea, en (linksseitatn) Stroussnvakea tenkar hant,[8] ainga Amtssprouchn u Bildingssystemma, un ondana Aspektt, dej wou i s "Gai" oda "Ghaag" vo da autonoman Eemma follatn.
D Spezjelln Vawoltingsregiona han ned zammzenwerffn mid de Spezjelln Wiatschaftszona, dej wou Regiona han, i de wou s gsundate ekonomischa Gsetz hom, wou Wiatschoft, Handl un Inwestiziona firdan solln. Dej Wolong Special Administrative Region i da Sichuan-Prowinz is a Natuareserwat u koa politischa Untaglidarung ned.
Beleg
[Werkeln | Am Gwëntext werkeln]- ↑ Regan, Helen (29 June 2020). "China passes sweeping Hong Kong national security law". CNN. Afgrouffn en 29. Juli 2020.
- ↑ Administrative divisions of the People's Republic of China (中华人民共和国行政区划; Zhōnghuá Rénmín Gònghéguó Xíngzhèng Qūhuà), 15 June 2005, archiviad en 23. Juli 2010, afgrouffn en 5. Juni 2010.
- ↑ Chapter II: Relationship between the Central Authorities and the Hong Kong Special Administrative Region, Article 12, archiviad (Honkong) en 29. Juli 2010, afgrouffn en 5. Juni 2010.
- ↑ Chapter II Relationship between the Central Authorities and the Macau Special Administrative Region, Article 12, archiviad (Macao) en 5. Fewa 2012, afgrouffn en 5. Fewa 2012.
- ↑ Lauterpacht, Elihu. Greenwood, C. J.: International Law Reports Volume 114 of International Law Reports Set Complete set, Cambridge University Press 1999, S 394.
- ↑ Vgl. Ghai, Yash P.: Autonomy and Ethnicity: Negotiating Competing Claims in Multi-Ethnic States, Cambridge University Press 2000, S. 92.
- ↑ Grundgesetz Artikl 12 vo Hongkong u Grundgesetz Artikl 12 vo Macao.
- ↑ "Right side of road the only way to travel on Hong Kong-Zhuhai-Macau bridge", South China Morning Post, 13. Fewa 2018.