Уладзімір Барысавіч Карпаў

Уладзімір Барысавіч Карпаў
«Пісьменнік У. Б. Карпаў». Акім Шаўчэнка. 1973
Асабістыя звесткі
Імя пры нараджэнні	Уладзімір Барысавіч Карпаў
Дата нараджэння	13 (26) лютага 1912
Месца нараджэння	Хвалынск, Хвалынскі павет[d], Саратаўская губерня, Расійская імперыя
Дата смерці	6 жніўня 1977(1977-08-06) (65 гадоў)
Месца смерці	Мінск, БССР, СССР
Пахаванне	Усходнія могілкі
Грамадзянства	БССР
Альма-матар	Мінскі дзяржаўны педагагічны інстытут імя Максіма Горкага (1941)
Прафесійная дзейнасць
Род дзейнасці	празаік, крытык
Гады творчасці	1949—1976
Кірунак	ваенная тэма, жыццё працоўнага класа
Жанр	аповесць, раман, біяграфія
Мова твораў	беларуская
Дэбют	аповесць «Без нейтральнай паласы»
Грамадская дзейнасць
Член у	Саюз пісьменнікаў СССР
Узнагароды

Уладзімір Барысавіч Карпаў (26 лютага 1912, г. Хвалынск, цяпер Саратаўская вобласць, Расія — 6 жніўня 1977) — беларускі пісьменнік, крытык.

Біяграфія

Нарадзіўся ў сям'і земскага ўрача. Падчас голаду на Паволжы (1921) пераехаў разам з маці на Гомельшчыну ў вёску Ёлча (цяпер Брагінскі раён). З 1929 г. працаваў рабочым на лесапільным заводзе ў Рэчыцы, затым настаўнічаў на Брагіншчыне, у Сіроцінскім раёне. Скончыў завочна Мінскі педагагічны інстытут (1941). У Вялікую Айчынную вайну ўдзельнічаў у падпольным і партызанскім руху, быў намеснікам камандзіра спецгрупы Мінскага абкома КПБ, старшым разведчыкам глыбокага тылу. Пасля вызвалення Мінска выкладаў мову і літаратуру, загадваў навучальнай часткай сярэдняй школы № 42, працаваў у газеце «Советская Белоруссия», у 1945 г. быў адказным сакратаром газеты «Літаратура і мастацтва», у 1947—1960 г. загадваў аддзелам прозы і крытыкі ў часопісе «Полымя». Член Саюза пісьменнікаў СССР (з 1946).

Выступаў у друку з рэцэнзіямі і артыкуламі з 1945 г. Аўтар кніг літаратурна-крытычных артыкулаў «Па шляху сталасці» (1952) і «Крылаты ўзлёт» (1966). З 1948 г. пачаў выступаць як празаік. Выйшлі аповесць «Без нейтральнай паласы» (1950), раманы «За годам год» (1957), «Вясеннія ліўні» (1961), «Нямігі крывавыя берагі» (1962), «Сотая маладосць» (1971, усе чатыры раманы склалі цыкл «На перавале стагоддзя»), кніга апавяданняў і ўспамінаў «Прызнанне ў нянавісці і любві» (1976). Укладальнік і адзін з аўтараў кнігі «Мы раскажам пра Мінск» (1964), аўтар тэксту да фотаальбома «Мінск» (1965). Склаў кнігі «Горад і годы» (1967) і «Сквозь огонь и смерть» (1970). У 1983—1985 г. выйшаў Збор твораў у 5 тамах.

Узнагароды

• ордэн Чырвонай Зоркі,
• Працоўнага Чырвонага Сцяга,
• медаль за баявыя заслугі і іншымі медалямі.

Памяць

Імем У. Б. Карпава названа вуліца ў Мінску.

Літаратура

• Карпаў Уладзімір // Беларускія пісьменнікі (1917—1990): Даведнік / Склад. А. К. Гардзіцкі. Нав. рэд. А. Л. Верабей. — Мн.: Мастацкая літаратура, 1994. — 653 с.: іл. — 22 000 экз. — ISBN 5-340-00709-X.
• Карпаў Уладзімір // Беларускія пісьменнікі: Біябібліяграфічны слоўнік. У 6 т. / пад рэд. А. І. Мальдзіса. — Мн.: Беларуская Энцыклапедыя, 1992—1995.