Location via proxy:   [ UP ]  
[Report a bug]   [Manage cookies]                
Wikipedia

L7

C'l artìcul chè 'l è scrit in Miranduléś Emiliàn


«
When we pretend that we're dead, they can't hear a word we said, when we pretend that we're dead. Turn the tables with our unity, they're neither bold nor majority, wake up and smell the coffee or just say no to individuality.»
(EN)(Pretend we're dead, 1992)
«
Quand a fém finta 'd èsar mòrti, lì lór i n pólan sintìr gnint ad quél ch'a dgém, quand a fém finta 'd èsar mòrti. Prìla nòsc al tavli, lì lór i n èṅ minga curagióś e gnanc da piò ad chi àtar, daśdàr-as e sintìr al parfùm dal cafè o sól dir ad nò a 'l èsar 'd indivìduṿ ch'i pènsan sól par lōr.»
(MUD)


Gl' L7 (a s diś /ɛl ˈsɛvən/ in ingléś), i èṅ un grup rock americàṅ ad Los Angeles di an dal 1985 al 2000, furmâ sōl da dóni. Al stîl dal sò canti 'l éra quél grunge.

Jennifer "Precious" Finch, ex basìsta di L7, méntar la s fà un bicér in dal Cavdàn dal 2006

Biugrafìa

Gl'Inìsi

Fundàdi par la Suzi Gardner e la Donita Sparks, tuti e dū cantànti e chitàristi, insém a la basìsta René Lucas, gl'L7 (un śóg ad paròli ch'a fà gnir in a mènt "Hell's Heaven", un mód ad dir di an Cinquànta) i èṅ al prim grup grunge fat da dóni ad avér tucâ un sèrt sucès. Dòp pòc tèmp la Lucas la s in và e la lasa al sò pòst a Jennifer Finch ch'la s unìs al grup insém a la baterìsta Demetra Plakas.

Al prim disc, fat par la Epitaph in dal 1988, al pòrta al sò nóm L7 e al gh'à dèntar ùndas braṅ; quéi ad la Gardner i èṅ un misć ad rock'n'roll, punk e heavy metal (Bite The Wax Tadpole e Cat-O'-Nine-Tails) mèntar quéi ad la Sparks i èṅ sens àtar più dur, cuma Metal Stampede e Uncle Bob.

In dal 1991 a vèṅ fóra par la Subpop al secónd disc, Smell The Magic, cun al sìngul Shove e di àtar braṅ ciàv cuma Till The Wheels Fall Off, Deathwish, Fast And Frightening e Just Like Me. In cal mèntar i dànan vita a Rock for Choice, n'urganiśasiòṅ no-profit ch'la s impéggna a sustgnìr i dirìt umàṅ par mèś di cuncèrt par catàr sù di bèsi insém a Nirvana, Hole, Pearl Jam, Neil Young e àtar.

Al sucès internasiunàl

In dal 1992 a véd la luś al lór disc ch'l à vindû da più ad tut: Bricks Are Heavy par la Slash Records. Al sòṅ al dvénta più grunge, cun la hit ad Pretend we're dead e di àtar braṅ dégn ad nòta cuma Wargasm (la lōr cansòṅ più pulìtica), Scrap, Diet Pill e Mr Integrity.

«
Wargasm wargasm one two three, tie a yellow ribbon around the amputee, masturbate watch it on TV, crocodile tears for the refugee, wargasm wargasm one two three, smutty, bloody pictures, ecstasy, blue balls waiting impatiently, from Alcatraz to Lady Liberty body bags and dropping bombs, the Pentagon knows how to turn us on.»
(EN)(Wargasm, 1992)
«
Urgàśum ad guèra òṅ du tri, liga al mutilâ cun un nàstar śal, fat na pugnéta guardànd-al in televiśiòṅ, piànt ad cucudrìl p'r al rifugiâ, urgàśum ad guèra òṅ du tri, grugn, foto ad sangṿ, gudimènt, dal bàli blu i spètan e i gh'aṅ présia da Alcatraz a la Statṿa dla Libertà di sac p'r i cadàvar e bómbi butàdi śò, al Pentàgun al sà cum a s fà a trasfurmàr-as.»
(MUD)

In dal 1994 l'è la vòlta 'd Hungry For Stink un disc rabî e madùr che però 'l è un pas indrē dal punt ad vista dal vénditi. A fianc di sìngui Andres e Stuck Here Again, al disc al gh'à di braṅ fat bèṅ cuma Fuel My Fire (cantàda in séguit anc dal grup dance Prodigy), Baggage, Riding with a movie star e The bomb.

«
Down in north Hollywood, there's a guy with long hair, he's really really nice but we had a problem, Andres I'm sorry, the key is stuck in the lock...»
(EN)(Andres, 1994)
«
Śò a nord 'd Hollywood, a gh'è un tisi cun i cavî lung, lì lò 'l è bèl dabòṅ, ma a gh'ém abû un prubléma, Andres a m daspiàś, la ciàv l'è blucàda in dla ciavadùra...»
(MUD)

Sèmpar in dal 1994 i sònan al festìval ad Lollapalooza ma pò Jennifer Finch la lasa al grup e al sò pòst al vèṅ tòlt da Gail Greenwood di Belly.

Al declìṅ

In dal 1997 gl'L7 i faṅ gnir fóra al quìnt àlbum The Beauty Process: Triple Platinum, un disc ch'a véd al ritóran, in na sèrta manéra, dal sòṅ selvàdag ad Smell The Magic (Bad Things, Must Have More e The Masses Are Asses) ma anc cun di lènt cuma Off The Wagon e Moonshine. Da nutàr la canta Lorenza, Giada, Alessandra, tri dóni fóra 'd tèsta ad Zisèna amighi di L7, cuma lōr i aṅ dit in n'intervìsta. A la fiṅ dla cansòṅ a par che gl'L7 i śmadónin in Itagliàn a tut andàr anc se in dal tèst uficiàl a n gh'è trasa ad quést chè.

«
Lorenza Giada Alessandra, Lorenza Nicola Alessandra, Lorenza Giada Alessandra, I love you, I love you, I love you. Dio bono, Dio bono, Dio bono, io ho tanta tosse, io ho tanta tosse.»
(EN)(IT)(Lorenza, Giada, Alessandra, 1997)
«
Lorenza Giada Alessandra, Lorenza Nicola Alessandra, Lorenza Giada Alessandra, a v vój bèṅ, a v vój bèṅ, a v vój bèṅ. Dio bòṅ, Dio bòṅ, Dio bòṅ, a gh'ò tanta tós, a gh'ò tanta tós.»
(MUD)

In dal 1998 a vîṅ fóra 'l prim disc da 'l viṿ, Live: Omaha to Osaka, un live rigistrâ a mèś fra Nebràska e Giapòṅ.

'L ùltim disc dal grup 'l è dal 1999 Slap-Happy cun i sìngui Freeway e Mantra Down.

In dal 2000 la cà discugràfica Slash Records la pùblica na racòlta cun dódas braṅ trat da i tri àlbum fat par lór, quéi dal 1992 al 1997.

Gl'L7 i aṅ pò fat gnir fóra dimóndi cansòṅ stramnàdi in compilation e culóni sunòri, durànt la lór caréra. A gh'è d'arcurdàr séns àtar Gas chamber (da 'l film La signora ammazzatutti ad John Waters), This ain't the Summer of Love (da 'l film So cosa hai fatto) e la cover di Guns N' Roses A used to love her ch'la dvènta A used to love him in du i arbàltan la fritàda e i càntan A gh vliva bèṅ dabòṅ ma a-j-ò dvû cupàr-al invéci che cupàr-la.

Furmasiòṅ

Discugrafìa

Àlbum

Disc da 'l viṿ

Racòlti

Sìngui e EP

  • 1990 - Shove
  • 1992 - Pretend We're Dead
  • 1992 - Everglade
  • 1992 - Monster
  • 1997 - Drama
  • 1997 - Off the Wagon
  • 1999 - Freeway
  • 1999 - Mantra Down

Compilation

  • 1988 - The Melting Plot (Yummy Yummy)
  • 1988 - Tantrum (Bite the Wax Tadpole)
  • 1989 - Radio Tokyo Tapes (Sweet Sex)
  • 1989 - Alternative Tentacles (Let's Lynch the Landlord)
  • 1990 - The Big One/City of L.A. (American Society)
  • 1990 - Every Band has a Shonen Knife who Loves them (Bags)
  • 1990 - Teriyaki Asthma (Bloodstains)
  • 1991 - International Pop Underground (Packin' a Rod)
  • 1991 - The Big One: San Francisco/Los Angeles
  • 1991 - Gabba Gabba Hey: A Tribute to the Ramones (Suzy is a Headbanger - Ramones)
  • 1994 - Alternative NRG (Shitlist)
  • 1994 - Assassini nati - Natural Born Killers‎ culòna sunóra (Shitlist)
  • 1994 - The Grunge Years (Shove)
  • 1994 - La signora ammazzatutti culóna sunóra (Gas Chamber)
  • 1995 - Tank Girl culóna sunóra (Shove)
  • 1995 - Spirit of '73: Rock for Choice (Cherry Bomb)
  • 1995 - The Jerky Boys culòna sunóra (Hangin' on the Telephone)
  • 1996 - Twisted Willie (Three Days)
  • 1996 - A Small Circle of Friends (Lion's Share)
  • 1997 - So cosa hai fatto culòna sunóra (This ain't the Summer of Love)
  • 2000 - Free the West Memphis 3 (Boys in Black)

Vìddeo

  • 1991 - "Fast and Frightening"
  • 1992 - "Pretend We're Dead"
  • 1992 - "Everglade"
  • 1992 - "Monster"
  • 1994 - "Andres"
  • 1994 - "Stuck Here Again"
  • 1999 - "The Beauty Process" - ducumentàri in sal grup fat par Krist Novoselic di Nirvana

Culegamènt estéran

Estratto da "https://eml.wikipedia.org/w/index.php?title=L7&oldid=134605"