Transgenrulo

Transgenrulo estas homo kun malakordo inter sia socia sekso kaj sia biologia sekso. La vorto estas vaste uzata kvankam neologisma fakvorto, elpensita por konservi la spiriton de la originala anglalingva termino kaj distingi transseksulojn (homojn kun seksa disforio) disde aliaj specoj de soci-seksa diverseco (por "genro" en la senco de "socia sekso" vidu ankaŭ socian sekson). Ĝi estas uzata por pli aŭ malpli vastaj kategorioj de homoj. Sub la rubriko "transgenro", oni foje inkluzivas transvestulojn kaj reĝinjojn, kaj eĉ ĉiujn kiuj agas de maniero forte kontraŭ la genra ŝablono de sia biologia sekso.

La transgenra fiera flago

Transgenrula simbolo

Transgenra aktivulino en transgenrula manifestacio en Parizo, 2005

Leĝoj rilataj al la esprimo de seksa identeco laŭ lando aŭ teritorio en 2015.

Fotomontaĵo de famaj transgenruloj

Tamen, la plej ofta uzado estas pli specifa: persono al kiu ne taŭgas ŝia aŭ lia sekso pro malakordo kun ŝia aŭ lia genra identeco. Transgenraj homoj havas profundan senton de strangeco en la korpo de sia denaska sekso, sentante sin virino en vira korpo aŭ inverse.

Ili vivas, aŭ volas vivi, tuttage en la alia sekso, ne pro kialo de seksuma plezuro sed pro profunda sento de idento. Ili povas havi sekso-ŝanĝan ĥirurgion; en tiu kazo, ili ofte nomiĝis transseksuloj, tamen nun ĉi tiu vorto estas malnova kaj povas esti insulta.

Mallonga konsila registara filmeto pri la portretado de transgenraj malamaj krimoj, kun esperantaj subtekstoj

Transgenruloj ĉiam formis parton de la kvira aŭ GLAT-rajta movado; en Usono, nigraj transgenruloj eĉ komencis la movadon per la Ribelo de Stonewall. Tamen iuj ne konsentas kun ilia partopreno, inklude iuj transgenruloj, kiuj vidas sian kondiĉon kiel medicinan (vidu ankaŭ transseksecon). Transgenruloj ofte suferas diskriminacion, malfacilojn en civilaj procedoj por ŝanĝi la sekson notitan en siaj dokumentoj, kaj ankaŭ perforton kaj eĉ murdon, pro sia genra identeco.

Vidu ankaŭ

• Abby Stein
• Principoj de Jogjakarto
• Kathoey
• João W. Nery
• Transseksulo
• Transfobio
• Jin Xing
• The Admiral Was a Lady

Eksteraj ligiloj

• Transgender Workplace Diversity
• Stanislavo Belov (2016-11-21) Dana junulino: malvera historio pri la vera amo (esperante). Blogger. Arkivita el la originalo je 2017-09-18. Alirita 2017-09-18 . (pri la filmo «Dana junulino», bazita sur la vivhistorio de transgenrulo Lili Elbe)
• Kategorio 'transgenraj aferoj' ĉe Egalecen Arkivigite je 2017-07-24 per la retarkivo Wayback Machine
• Transgenrulo, en: Terminaro pri Seksa Identeco kaj Seksa Orientiĝo