Wikipedia n'estremeñu

La Wikipedia n'estremeñu, mentá Güiquipedia i enantis Güiquipeya, es la vessión dela ciclopedia libri Wikipedia en lengua estremeña. Güiquipedia s'escrivi de manera calavorá por mé de voluntarius, i premiti que los artícalus los múi qualquiera pressona con acessu por mé dun precuraol de web. El proyetu tuvu nacencia el 24 d'Eneru del 2007, enque no hue hata el 26 de Mayu del 2008 quandu el proyetu se muó al su propiu dominiu.

Santu la Güiquipedia

Características

El lema la Güiquipedia es «Si tienis conocencia de la tu coltura, cómu no la tienis dela tu palra?», i poemus descreví-la comu «un girón pa destribuil la conocencia la realidá estremeña ena su propia lengua, ena que tolos estremeñus puean colavoral, tantu ena su destensión, comu en el crecimientu el léssicu estremeñu pa conseguil concencial-mus de qu'avemus derechu de palral en estremeñu».

Essistin tres características essencialis del proyetu Güiquipedia que definin la su función ena Redi:

• Es una ciclopedia, entendía cumu soporti que premiti arrejuntal i trasmitil l'enhormación de horma enhilá.
• Es un wiki, polo que, con poquinas desquitis, puei sel editá por qualisquiera.
• Es de conteníu abiertu i gasta la licencia GFDL.

Güiquipedia tien un haci políticas que asseñalan qué enhormación se devi de entral o no. Estas políticas se gastan pa resolvel pobremas al tentu añidición, revisteu, muación o aborramientu d'endilguis.

Edición

En Güiquipedia qualquiera pressona puei crial un endilgui nuevu en estremeñu i mesmu quasi que qualquiera vesitanti puei edital el conteníu, quitandu los endilguis que estén tapaus. Esti proyeutu hue criau ena idea de que la colavoración entre usuarius pol amejoramientu dun endilgui por un tiempu produzirá testus de calidá, aspecii de los proyetus de desenroamientu d'apricacionis libris.

Los endilguis volucionan duranti'l tiempu i estu está eno craru en el su estorial d'edicionis. A las vezis, están casus en que pressonas entran ena Güiquipedia a emplastal i dal faterna, produxiendu-si salvaginas i guerras d'edicionis: d'encontral angún artículu en mal estau, pega un apitíu a angunu de los zahorilis.

Políticas

• Por causa de la diversidá i númiru participantis i ideologías, Güiquipedia precura de entagal los sus endilguis de la horma mas apurá que se puea. El ojetivu no es escrevil endilguis dende una almiración, sino presental abiertamenti ca postura a tentu dun tema concretu.
• Se gastan un númiru convencionis tocantis al nombri los endilguis, optandu preferentimenti pola versión más gastá corrientimenti.
• Las caravas a tentu del conteníu i edición dun endlrgui se hazin enas páginas carava los endilguis i no enos propius endilguis.
• Ai un númiru temas que son hondeaus ahuera la Güiquipedia por no sel ciclopédicus sensu stricto. Un suponel: La Güiquipedia no contién definicionis dicionarius (comu verbus, aljetivus, etc.)

Neutralidá de conteníus

Es corrienti que angunas pressonas se vaigan ahumás por ideologías políticas, lingüísticas o almiracionis deferentis o que chocan conas sus opinionis. Velaí la razón pola que Güiquipedia ludia, gracias que los gironis por enhiestal una neutralidá en el conocieru.

Ya que es imposibli que la conocencia sea assoluta i neutral, en angunus endilguis devi de dexal-si el ergullu pressonal pa huera i dal passu al proyetu Güiquipedia premitiendu la libertá opinión.

Es emportanti sabel i conocel que naidi es dueñu de endilgui dengunu espuestu ena Güiquipeya.

Pressonal

Los calavoraoris dela Güiquipedia obran de continu de horma voluntaria. Ain varias hormas de calavoral hueraparti de crial o engrandal endilguis: se puein aprical las convencionis d'estilu establecías p'aquellus endilguis que no las tienin, assitiá-lus por materia, corregil faltas d'ortografía, hondeal con testus con copyright i assina.

Pa calavoral no es mestel regristral-si, enque alos usuarius que no lo hazin se l'embilman ciertas acionis, comu votal ena toma decisionis. Angunus colavoraoris tienin la albeliá d'aconllegal angunas operacionis hueraparti, comu el aborramientu d'endilguis, el atarugu páginas i tó essu. Sin embargu, estus usuarius no tienin capacidá de decisión mayol que la de qualquiera otra pressona, i las sus acionis se devin de acistal a las políticas adotás por tola comunidá.

Guipa tamién

• Pari Angi