Grafie uficiâl de lenghe furlane
La grafie uficiâl de lenghe furlane e je stade decretade cun leç regjonâl 15 dal 1996 dulà che si stabilìs che nome cheste grafie si podarâ doprâle tai ats publics e te toponomastiche. No dome, a ven ancje proibît cualsisei finanziament public a libris di scuele o a cors di insegnament che no dopredin cheste grafie.
Cemût che je nassude la grafie uficiâl
[cambie | modifiche il codiç]Di cuant che si à scomençât a scrivi par furlan si à vût il probleme di rivâ a scrivilu. L'alfabet latin nol bastave par rivâ a segnâ ducj i suns e i varis scritôrs a vevin ognidun di inventâsi un sisteme. Tal 1986 il linguist catalan Xavier Lamuela al à elaborât, par cont de Provincie di Udin, un sisteme di grafie complet par normalizâ il mût di scrivi il furlan. La propueste di Lamuela e jere une evoluzion de scriture doprade de Societât Filologjiche Furlane cun cualchi gambiament par rindi la scriture plui coerente. Dal 1986 al 1996 a son stâts fats un grum di discussions pro e cuintri cheste grafie, e, dopo un ricors de stesse Filologjiche Furlane la grafie uficiâl e je deventade che proponude di Lamuela cun dôs diferencis proviodudis de Leç 15:
- al ven bandonât il digram ts che al devente z in inizi o in cuarp di peraule (par esempli zovin).
- la q, che no si doprave, si pues doprâ te toponomastiche o tai nons storics tant che Aquilee, Sant Quarin o Marquart.
Carateristichis
[cambie | modifiche il codiç]La grafie e dopre i 26 segns dal alfabet furlan plui 7 digrams, ven a stâi grops di doi segns che a si lein tant che un sun sôl. I digrams a son:
- ch – par esempli machine
- gh – par esempli aghe
- ‘s – che al è un esse dolce come in ‘save o in ‘Sef
- ss – come in scusse
- gn – come in gnogno o in gnotul
- cj – che al fâs il carateristic sun furlan di cjan o ducj.
- gj - che al fâs il carateristic sun furlan di gjat o gjen
I ultins doi a son carateristics dal furlan e a no esistin in altris lenghis romanzis come par esempli intal talian.
La grafie par scrivi intes varietâts
[cambie | modifiche il codiç]Articul principâl: la scriture des varietâts
La grafie uficiâl a permet di scrivi sedi il furlan standard che lis varietâts. Par rivâ a scrivi i suns che a son presints tes varietâts ma no tal furlan comun si puedin doprâ dai digrams a pueste:
- th pal sun interdintâl sort
- dh pal sun interdintâl sonôr
- sj, ssj, sj pal sun sibilant palatâl sort
- ‘sj e sj pal sun sibilant palatâl sonôr
Leams
[cambie | modifiche il codiç]Grafie uficiâl de lenghe furlane
Vôs leadis
[cambie | modifiche il codiç]
| |||
|
Gramatiche | Alfabet | Storie | Lessic furlan | Toponims | Vocabolari furlan |
