Pavo

O pavo (Meleagris gallopavo) é unha especie de ave galiforme da familia Phasianidae.

Pavo
Un pavo (Meleagris gallopavo) durante a tempada de apareamento.
Estado de conservación
Pouco preocupante
Clasificación científica
Reino: Animalia Filo: Chordata Clase: Aves Orde: Galliformes Familia: Phasianidae Xénero: Meleagris Especie: M. gallopavo
Nome binomial
'Meleagris gallopavo' L., 1758
Distribución do pavo salvaxe en América do Norte. Distribución do pavo salvaxe en América do Norte.
Subespecies
(Véxase no texto.)

Para outras páxinas con títulos homónimos véxase: Pavo (homónimos).

É orixinario de América do Norte, mais introduciuse como ave doméstica en case todo o mundo. A súa poboación no momento da chegada dos europeos calcúlase en 40 millóns de exemplares, sendo fortemente cazada ou domesticada. Na actualidade estímase que hai 4 millóns en estado salvaxe e moitos millóns máis en estado doméstico.

Características biolóxicas

Os pavos habitan o norte de América, desde os Estados Unidos até o sur de México; as subespecies atópanse nunha ampla gama de hábitats incluíndo chairas e montes, necesitando abeiro para os niños e de árbores para se pousar e evadir os depredadores. Pasan gran parte do día a procurar alimento polo chan e só voan curtas distancias sen chegar a migrar.

Polo xeral son omnívoros e aliméntanse de pequenos insectos, sementes e plantas. O peso e o talle varía considerabelmente dunha subespecie a outra e son de comportamento diúrno pousándose á noite nas pólas das árbores.

Comportamento

Os pavos organízanse nunha sociedade xerárquica e comunícanse mediante chamadas e contacto físico sumándose a estes os cortexos sexuais. Segundo a estación, os machos e as femias compórtanse de xeito distinto formando grupos de tamaño e funcións variábeis.

Fóra da época de reprodución os machos e as femias viven en grupos separados, mais chegando a primavera créanse "pavadas de cortexo", grupos de machos adultos e femias de maior tamaño. Neses momentos os machos fixan territorios e os grupos de femias desarticúlanse, provocando que as femias transiten solitarias con total liberdade polos territorios; os machos que conseguiron fixar o seu dominio sobre un territorio tratarán de atraer femias con chamadas sonoras e realizando movementos complexos. En grupos de machos novos só o máis dominante é o que se aparea e comunmente un grupo pequeno de machos dominantes ten total dominio sobre un gran número de individuos.

Cando o macho e maila femia consumaron o acto sexual empezan a construción do niño podéndose aparear diariamente até o momento de chocar. Polo regular as femias forman grupos para aniñar e criar os seus pitos no mesmo niño. A nai pavo depositará de 5 a 8 ovos e chocaraos arredor de 28 días; a seguir os pitos ficarán no niño até os 6 ou 7 meses. Se o apareamento non provoca o nacemento de crías as femias forman pavadas sen niñada. Polo inverno os machos mailas femias sepáranse formando "pavadas invernais" e os pitos machos deixan o niño e forman as súas propias "pavadas invernais".

Subespecies

Coñécense seis subespecies de Meleagris gallopavo :

• Meleagris gallopavo silvestris - centro e leste dos Estados Unidos.
• Meleagris gallopavo osceola - Florida (localizado)
• Meleagris gallopavo intermedia - do norte de Texas ao centro-leste de México. No Estado de Chihuahua, coñécese tamén coma "Cócono".
• Meleagris gallopavo merriami - oeste dos Estados Unidos.
• Meleagris gallopavo mexicana - montañas da meseta leste e central de México.
• Meleagris gallopavo gallopavo - sur de México (de Xalisco a Veracruz e polo sur até Guerrero).

Véxase tamén

Outros artigos

• Pavo doméstico

Ligazóns externas

• Pavo Común Meleagris gallopavo en Damisela.com