Jejunos minor judee

Le jejunos minor judee son le jejunos judee observate per jejunar durante le horas de die solmente, ab le aurora al crepusculo, e non durante le nocte.

Illos include le jejuno de Gedalia, le jejuno del 10 de tevet, le jejuno de Esther, e le jejuno del 17 de tammuz. Il es customari alsi pro un judeo qui es le prime infante de su parentes observar le jejuno del primogenite.

Le jejunos minor, como tote jejunos judee con le sol exception de Yom Kippur, non pote esser in le sabbato (proque jejunar es normalmente prohibite le sabbatos), e si le data normal de un jejuno esserea sabbato, le jejuno es observate le proxime die (o le die antea, in le caso del jejuno de Esther). In le caso de Yom Kippur, que es appellate un "sabbato" in le Torah (Levitico, 23:32), le jejuno es observate le 10 de tishrei mesmo si illo es le sabbato.