Fluvio

Fluvio esas larja aquofluo naturala, qua rakas lua aquo aden la maro. (Tale pensante Volga ne esus fluvio, pro ke ol finas en Kaspio, qua esas definita kom lago. Tamen, la grandeso di Volga intercesas lua nomizo kom fluvio). On distingas oceanala fluvio qua fluas en maro od oceano, e kontinentala fluvio qua fluas en lago, marsho o dezerto.

Rivero esas plu mikra aquofluo, qua rakas sua aquo aden ula lago, fluvio od altra rivero. En kalkala sulo rivero povas desaparar ed avancar sub la surfaco. En tre sika areo rivero povas velkar livante senaquala lito (altre: wadio(?)).

Fluvio e rivero komencas de fonto, qua povas esar, exemple, rivereto, lago o glaciero. La regiono qua kolektas aqui por fluvio o rivero, esas la fluviala baseno.

Inter aquo-kolektuyi esas ula alta loko aquo-dividanta, exemple montaro o kateno di monti.

Maxim longa fluvii del mondo:

1. Amazon 7.250 km, en Sud-Amerika
2. Nilo (kun Kagera) 6.670 km, en Afrika
3. Mississippi 6.050 km, en Nord-Amerika
4. Yangcekiang 5.630 km, en Azia
5. Yenisei (kun Angara-Selenga) 5.390 km, en Azia
6. La Plata (kun Paranà) 4.700 km, en Sud-Amerika
7. Mekong 4.500 km, en Azia
8. Irtysh 4.420 km, en Azia
9. Kongo 4.380 km, en Afrika
10. Amur 4.350 km, en Azia
11. Ob 4.350 km, en Azia
12. Lena 4.260 km, en Azia
13. Niger 4.160 km, en Afrika
14. Huangho 4.150 km, en Azia
15. Mackenzie (kun Peace River) 4.060 km, en Nord-Amerika
16. Volga 3.690 km, en Europa
17. Murray (kun Darling) 3.490 km, en Australia
18. Indus 3.190 km, en Azia
19. Yukon 3.190 km, en Nord-Amerika
20. St. Lawrence 3.140 km, en Nord-Amerika
21. Brahmaputra 2.900 km, en Azia
22. Colorado 2.900 km, en Nord-Amerika
23. São Francisco 2.900 km, en Sud-Amerika
24. Syr-Darya 2.860 km, en Azia
25. Danubio 2.850 km, en Europa