Moscva

Moscva (en rusce: Москва, Moskva, AFI: [mɐˈskva]) es la capital e la site la plu grande de Rusia. Lo es ance la area urban la plu grande entre la capitales de Europa e es un de la plu grande en la mundo. Moscva es la sentro economial, cultural, relijios, finansial, e de instrui e transporta de Rusia e lo es ance un site global. Lo es la site sete entre la sites la plu grande. La cuantia de abitores ia es 10,524,400 en junio de la anio 2009.

Con la orolojo de la alta e sinistra: Catedral de Cristo la Salvor, Tore Spasskaya de Cremlin, la Sentro de Comersia Internasional de Moscva, Plaza Roja, Teatro Bolxoi, e la Universia de Stato de Moscva

Bandera de Moscva

Moscva es locada sur ambos la rivas de la parte sentral de la rio Moscva en Rusia european. La site sta supra la junta de tre plataformas jeolojial. Istorial, Moscva ia es la capital de la Uni de Republicas Sosialiste Soviet, de la Impero Rusce, de la Renas de Tsares, e de la Duxia Grande de Moscva. En nos tempos la person major de governa, ci es Presidente, ave sua loca de labora e de abita en la Cremlin de Moscva, cual es un de la construidas de erita cultural de la mundo.

La site es servida par 6 airoportos, 9 terminas ferovial, 3 portos de rio, e un sistem de metro cual ia es fada en la anio 1935 e es famosa per sua arciteta, decora, e arte.

La istoria ia dona nometas variosa a la site. A la plu parte los refere a sua state superior en la nasion: Roma tre (Третий Рим), Site de Petra Blanca, Site de Trono prima, Site de cuatro-des cuatro-desias (cual refere a la fato ce en Moscva on ia ave cuatro-des eglesas ante la revolta de la anio 1917).

En rusce un abitor de Moscva es Moscvitx (en rusce: Москвич).

Istoria

La nom de la site, como de multe otra sites en la mundo, es liada a la nom de la rio (en esta caso - Moscva), cual ia esiste asi longa ante cuando un siteta ia apare. No person sabe ci ia dona la nom e cual es sua sinifia. Es du teorias de sua orijin: Posible la nom ia prende sua comensa en la linguas suomi-ugrica con la sinifia Rio-Urso; O, egal posible, lo deriva de un radis protoslavica "mosc", cual sinifia pantanosa.

La refere prima a la site ia es en la anio 1147, cuando Iuri Dolgoruci, la prinse de Rostov e Suzdal, ia invita sua aliadas e sua amis con la xef de gera Sviatoslav Olegovitx, la prinse de Novgorod e Seversc, per un visita.