Dringsele

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Ezer, es te dit dialek sjpriks.

---

Dringsele (Nederlands: Trintelen) ies 'n buurtsjap van Ees (Eys) in de gemeinte Gulpe-Wittem op 't plateau in Zuud Limburg. De 50 häöf en hoezer liegke in lintbeboewing aan de weeg tösje Mingesjborg en Busjehoêze.

De waterpöt en, versjole ónder de bleujende kasjtanjeleboum, 'n waegkruus

Gesjiedenis

De gesjiedenis geit truuk nao de sjtiechting van de Dringselerhaof. In 1717 waor zie es lièn eigendóm van de Hièr van Schell. In 1756 neumde de Mestreechse burgemeister, Jean Léonard Olislagers ziech Hièr van Neer, Holland en Trintelen. In 1827 kaom Holland bie Doonder (Doenrade). Dringsele woort in 1845 eigendóm van jónkhièr P.A. Kerens. Zien dochter, barones de Crassier, erfde 't good in 1862.

Bezeenswaerdig

• De Dringselerhaof, gelege aan de Eyserweeg nr 2, ies 'n gesjlote boerderiej van baksjtein en sjure van Kundersjtein oet de 18e ièw.
• Op de Eyserweeg nr 1 sjteit 'ne haof in Kundersjtein oet 1827.
• 'n Veldkruus op 'n sjplietsing van haol waeg tösje Ezerhei - Aoverees en Dringsele en Ees-Wittem.
• 'n Kapelke gewiejd aan Maria.
• Op 'n sjplietsing sjteit 'n ièwenoud pöthuuske mèt 'n deepde van 70 maeter. Op de pöt sjteit 't Romeins jaortal MCMLXXXII (1982), 't jaor dat 't gebuuwke wir ies opgeboewd.
• Neve de pöt sjteit 'n helsjteine waegkruus mèt crucifix.
• Vakwerkhoezer

Evenemente

• Pötfiès in 'n weekend in mei georganiseerd door de buurtvereiniging.
• De processie trèk um de drie jaor bie toerbeurt vanoet Ees.
• In juni weurt de juni-den geplant