Eindhove

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Eindhove in Noord-Braobant

Eindhove (Nederlands: Eindhoven; in noordeleker Limburgse dialekte ouch wel: Intjhaove) is 'n stad in 't zuidooste vaan de Nederlandse provincie Noord-Braobant. De gemeinte Eindhove besleit 88,92 km²; mèt op 1 jannewarie 2019 231.642 inwoeners is de stad de vijfde vaan Nederland en mèt veursproonk de ierste vaan Noord-Braobant en Zuid-Nederland. Börgemeister is Jeroen Dijsselbloem vaan de PvdA. De stad is 't technologisch centrum vaan Nederland en weurt wel de Hollandse Leechstad geneump. Voetbalclub PSV speelt thoeswedstriede in de stad.

Stadsgeziech

Statie

Eindhove zie centrum kint wieneg historisch gebouwe, umtot de stad pas laat tot oontwikkeling kaom. Monuminte zien veural vaan nao 1900, wie 't Van-Abbemuseum, de statie (mèt e front in de vörm vaan 'ne radio), 't Evoluon en de leechtorie vaan Philips NV.

Stadsfuncties

De elektronica-industrie, mèt es centrum Philips NV, beujt wèrk aon väöl lui en heet in 't verleie veur väöl arbeidsmigratie nao Eindhove gezörg. Roontelum die industrie is ouch 'n educatief infrastructuur oontstande, mèt es veurnaomste vertegewoordeger de TU Eindhove, die de stad 'n rilletief jóng bevolking gief. Wijer is de stad verzörgingscentrum veur hiel Zuidoos-Braobant, en in minder mate hiel Oos-Braobant en Noord-Limburg.

Historie

Eindhove oontstoont es nederzètting aon de Dommel, en kraog in 1232 stadsrechte vaan graof Hendrik I van Braobant. De stad greujde evels oonder de rouk vaan Weert en D'n Bosch neet oet tot e veurnaom centrum en in 1583 woorte de walmör zelfs aofgebroke, boemèt 't stedsje e dörps karakter zouw hawwe tot wied in de negentiende iew.

Mèt de Industrieel Revolutie kierde 't tij. 't Bekinds en veurnaoms waor de eupening vaan 't Philips-lampefebrik in 1891, meh ouch textiel- en later oto-industrie (DAF) vestegde ziech dao. In 1920 woort de gemeinte oetgebreid mèt de aon Eindhove vasgegreujde aw kèrkdörper, boemèt 't in eine kier 'n stad vaan beteikenis woort. Nao d'n Twiede Wereldoorlog is Eindhove 'n industriestad gebleve, al kaom de IT-sector mie en mie op.

Externe link

• Website vaan de gemeinte
• Gesjiedenis in foto's

Commons: Category:Eindhoven – Media gerelateerd aan dit óngerwerp