Koraan

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

De Kora(a)n (Arabisch: القرآن, al-qoer'ān) is 't ènsigste islamitisch Hèllig Book det dore moslims es zuver euvergeleverdj wuuertj gezeen. Volges de islamitische terdiesje zeen de wäörd inne Arabische spraok door God via d'n ingel Djibriel aan Moeamed geäöpenbaardj. De Koraan wuuertj betrach es 't ieëste prozawirk oete Arabische litteratuur en haet 'ne groeaten invlood gehadj oppe litteraer óntwikkeling van 't Arabisch.

't Arabisch waord قرآن (qoer'ān) mèntj "oplaezing" of "veurdrach". Koraan wuuertj gebroek veure euverzètting. 'n Euverzètting wuuertj meistes door moslims es ónauthentiek gezeen, ómdet euverzètte autematisch interpretere zów meine. Eder euverzètting is dus "alein" 'n interpretaasje. Euverzèttinge vertuuene, doren opboew vanne Arabische spraok, op essentieel puntje groeate versjillen waere den ouch neet es gezaghöbbendj erkèndj. Exegese oppe Arabische Koraan is waal meugelik en wuuertj tafsir geneump. De bekèndje islamitische gelieërdje (oelema) spraeke daoveur euver 'n exegetische euverzètting.

De Koraan is de ieëste brón vanne islaam, meh de Euverleveringe (Hadith) zeen de twieëdje brón. De Koraan guuef gein specefieke antjwäörd op eder vraog of eder perblieëm. Moeamed en zien mitgezèlle waere gezeen es de laevendje oetlègkers in praktiek, vasgelag inne Euverleveringe. De Koraan enne (minder absolute) Hadith vörme same de basis vanne islaam.

Veur moslims is de autoriteit vanne Koraan absoluut. 't Wuuertj gezeen es 't Waord van God. De Koraan wuuertj aevel waal geïnterpreteerdj. Dit kan 'n dynamische interpretaasje zeen die mitte ómstenjigheje verangertj.