De Panne

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan De Panne in Wes-Vlaandere.

De Panne mèt deilgemeintes en aongrenzende (deil)gemeintes (zuug de hoofteks veur 'n verklaoring).

Strand, duine en boulevard in De Panne.

De Panne is 'n gemeinte in de Belzje provincie Wes-Vlaandere, in 't arrondissemint Veurne, aon de grens mèt Fraankriek en aon de Noordzie. 't Oppervlak bedreug 23,90 km²; op 1 januari 2008 had de gemeinte 10.285 inwoeners.

Geografie

Deilgemeintes

De Panne heet twie deilgemeintes. De Panne zelf is 9,01 km² groet en had in 2001 7.349 inwoeners.

• I. De Panne
• II. Adinkerke

Aongrenzende (deil)gemeintes

• a. Koksijde, kèrkdörp Sint-Idesbald (gemeinte Koksijde)
• b. Veurne (stad Veurne)
• c. De Moeren (stad Veurne)
• d. De Moeren (Les Moëres, Fraankriek)
• e. Gijvelde (Ghyvelde, Fraankriek)
• f. Bray-Dunes (Fraankriek)

Ligking

Door zien ligking aon de Noordzie besteit e groet deil vaan De Panne oet duingebeed. Hei-in ligke versjèllende natuurgebeje, boevaan 't groetste Natuurrizzervaot De Westhoek is. Door de deilgemeinte Adinkerke löp 't kenaal Duinkerke-Nieuwpoort.

Bezeensweerdeghede

In De Panne stoon twie kèrke in neostiele: de neogotische Pieterskèrk (sjeep oet 1860, torie oet 1934) en de neoromaonse Slevrouwekèrk (1930). De kapel bij 't Oblaotekloester (ouch al neogotisch) heet bekindheid umtot keuning Albèr I dao in d'n Ierste Wereldoorlog te kèrke góng.

Toerisme

De Panne is es badplaots hendeg in trek veur toerisme. Neet allein veur gewoen strandverkanties, meh ouch um zien natuur en um 't strandzeile, boeveur 't breid strand vaan De Panne good gesjik is. In Adinkerke steit 't attractiepark Plopsaland, veurheen bekind es 't Melipark (of plaotselek de Meli).

Historie

Allewel tot Adinkerke al in de middeliewe bestoont (veur 't iers geneump in d'n twelfden iew), gief 't De Panne pas sinds oongeveer 1782. Keizer Jozef II vaan Oosteriek leet um de vèsserij te bevordere 'n aontal Veurnere ziech in de duinpanne vèstege. 't Dörp wat zoe oontstoont hètde oetsprunkelek Sint-Jozefdorp, later Kerckepanne. 't Veel in deen tied bestuurlek oonder de gemeinte Adinkerke. In 1831 zat Leopold I vaan 't Belsj hei veur 't iers voot aon Belzje groond. Ouch al in de jaore 1830 oontstoont hei veurziechteg 't ierste köstoerisme. De vèssersvloot waor ein vaan de groetste vaan Vlaandere, meh misde 'n have, wat hiel hinderlek waor en 't gebruuk vaan platte bote vereisde. Vaanaof 1870, wie e spoor nao Duinkerke veerdeg kaom, raakde 't toerisme in 'n stroumversnelling. Vaanaof 't begin vaan d'n twintegsten iew begós de vèsserij te verdwijne en begós ziech 't dörp gans op 't toerisme te riechte. In 1911 sjeide 't dörp ziech aof vaan Adinkerke; de nui gemeinte had toen al 2.872 inwoeners. In d'n Ierste Wereldoorlog waor 't ein vaan de wienege plaotse achter de frontlinie (vaanoet centraol, Duits, perspectief gezeen); keuning Albèr resideerde hei in die jaore. Bij de twiede fusiegolf vaan 1977 woort Adinkerke es deilgemeinte bij De Panne gevoog, 'n umkering dus vaan de situatie vaan veur 1911.

Extern links

• Website vaan de gemeinte