Willingen

Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.

Willingen is 'n gemingde en dörp i de Noard-Hessische Krink Waldeck-Frankenberg. De plaatsj en zing noaberplaatsj ligke i de sjtreek Sauerland en grénsj dirèk aa d'r bóndssjtoat Noordrien-Wesfale. 't Ungeveër 3.500 zeele tèllende en 550 meter hoeëg ligkende dörp Willingen is de groeëtste plaatsj. De gemingde i totaal hat ungeveër 6.000 lüj op ing flaak va 80,19km², wat e totaal guëf va ungeveër 74 lüj/km².

Natuurlige ligking

Willingen ligk i de sjtreek Sauerland, i krink Waldeck-Frankenberg i 't Regierungsbezirk Kassel i Noard-Hesse. De gemingde is durch drei kanke umgeëve durch de bóndssjtoat Noordrien-Wesfale. Willingen ligk netuurlig gezieë i 't Rothaargebirge, dat óngerdeel is va 't groeëter Rheinisch Schiefergebirge. De bèrge zint hei op 't hoeëgst. D'r hoeëgste bèrg is d'r Langenberg mit 843 meter boave zieësjpieëgel. Dees bèrg gild as d'r hoeëgste punt va de bóndssjtoat Noordrien-Wesfale, allewaal de sjtoat 20 meter va d'r tóp ligk. Anger bekanke bèrg zint de: Hegekopf (842 m.), d'r Ettelsberg (837 m.) en d'r Mühlenkopf (815 m.). 't Bergachtig gebeed is bebusj mit vichtebomer, meh i reveer- en beëkdaler guëf 't dökker loofbomer. Willingen ligk óch óp g'n watersjei tösje de revere d'r Weser (oeëstelig) en d'r Rien (westelig). 't Reveerke d'r Hoppecke sjtruimp richting 't noarde noa de sjtad Brilon (en oetintelig noa d'r Rien). D'r Itter sjtruimp via de wieler Stryck, noa 't oeëste, dös i richting va d'r Weser. Get zudeliger sjtruimp d'r Neerdar i g'n zèlfde richting. Óch de waat groeëtere reveer d'r Diemel sjtruimp richting d'r Weser.

Plaatsj

Willingen - 3.500 lüj (de wieler Stryck en Hoppern mitgereëkend)
Usseln - 2.100
Schwalefeld - 900
Eimelrod - 650
Rattlar - 453
Bömighausen - 300
Neerdar - 165
Hemmighausen - 100
Welleringhausen - 83

Ikkenomie

De gemingde, meh vuural de plaatsj Willingen sjteet bekank óm zing faciliteite vuur de wintersjport en as Luftkurort. Get boete Willingen is 't óp 580 bies 830

meter hoeëg geleëge sjkipark, dat verneump is noa 't gelieknoamig dörp. 't Park hat 16 pistes, oeë-va 7 blów pistes, die rilletief gemekkellig zing, en 9 roaj pistes, die gesjik zing vuur ervare sjkieër. Dat maakd óch dat de gemingde vuurnamelig leëft va toerisme. Al i de joare 1900-1910 woeëde ieësjte hotels opgerich. Noa de Twieëde Weltkrieëg luëp 't aatal uëvernachtinge truuk, meh noe is 't in va de best bezóchte toeristische plaatsj i de umgeëving. 't Aatal uëvernachtinge ligk ungeveër op 1 miljoen paar joar. Inkel 't kuuroord Bad Wildungen, dat neet wiet ligk va Willingen, weëd dökker bezóch. As gevólg hei-va wirkt ¾ va de berópsbevölking i d'r dienstensector.

Bezinsweëdig

Behauve 't zier bekanke wintersjporpark Willingen, guëf 't 'ne mien deë me kan bezuike: Besucherbergwerk Christine. Tót i de joare '70 woeëd hei leisjtee gedólve. I Usseln ligk 't Uplander Milchmuseum. Óch guëf 't 'n beerbrówerieë, 'n glaasblazergilde en 'n Heimatsstube. Willingen ligk óch aa de iezerweëg de Uplandbahn. I 't dörp guëf 't inge 294 meter lank viaduk.

Referenties

Nederlandsj en Pruusj wikipedia.