Diçionaio

ZE-P	Sta paggina chie a l'è scrita in zeneize, co' ina grafia tipo quella do Prian do 1745

Vocabolario dell'Accademia della Crusca, 1612

Diçionaio - arecugeita de paole de una lengua determinâ, con escluxon (ò con indicaçion soo che sommaia, relativamente a-i caxi anomali) de variaçioin puamente flescionæ, disposta segondo di critei prefissæ e accompagnâ generalmente da-a definiçion do scignificao de paole mæxime. A lengoa a pœu êse quella d’una intrega tradiçion lettiaia (diç. da lengoa zeneize, françeize, ecc.) ò de una parte de questa (diç. da lengua zeneize do Duxento; diç. di neologismi, di barbarismi) ò de un aotô (diç. çiçeronian, dantesco).

A definiçion do scignificao a pœu ese inta lengua mæxima da quæ o diçionaio o l'arecœugge e paole, ò mediante a traduçion inte 'n'atra lengua: into segondo caxo s'ha di diç. bilingui (latin-italian, ingreize-todesco, ecc.), de votte trilingui, ò de ciu lengue (comme o Calepinus septem linguarum). S'ha un diç. storico, quande de ogni paola l'è fæta a stoia in senso diacronico, acompagnandola inti so scignificæ e inti so uxi a traverso i tempi (un modello do genere o l'è l'Oxford English Dictionary ò, pe-a parte scin'aoa pubbricâ, o Thesaurus linguæ latinæ). I diçionai pœuan contegnî ascì l'etimologia de paole; son diti etimologichi quelli dedicæ escluxivamente a l'indicaçion de l'etimologia; atri arecœuggian i scinonnimi (comme o diç. di scinonnimi do Tommaseo).

O criteio normalmente seguio inta registraçion di vocaboli o l'è quello arfabetico, ma existe ascì di diç. metodichi (ò scistemattichi, ò ideologichi), inti quæ e paole son ragroppæ metodicamente in famigge ò groppi segondo a mao ò meno affinitæ de noçioin che quelle esprimman. Se ciamma diç. inverso quello chi arecœugge e paole ordenæ arfabeticamente començando da l'urtima so lettia.

Di diçionai d'interesse ciu circoscrito arecœuggian e spiegan i termini proppi de particolæ discipriñe ò attivitæ (diç. de mæña, de architettua; diç. filozofico, giuridico; diç. di arte e mestê, ecc.). S'avexiña a l'enciclopedia i diçionai che arecœuggian in orde arfabetico nommi e noçioin de lettiatua, arte, sciençe (diç. geografico; diç. biografico; diç. di arte; diç. de idee; e, con interesse ciu universâ, diç. enciclopedico, ch'o pœu includde ascì o lescico de 'na lengua).

Tranne che in quest'urtimo caxo, o terme diçionaio o s'âtèrna con quello de vocabolaio, da-o quæ però o se distingue in quante quest'urtimo o pœu scignificâ ascì o lescico, saiv'a dî l'insemme de paole de 'na lengua, indipendentemente da-a so registraçion, mentre diçionaio o l'è dœuviao soo che pe indicâ l'œuvia chi arecœugge o lescico mæximo.

Atri progetti

Altri progetti

• Wikimedia Commons

• Wikimedia Commons a contêgne di files in sce disionaio