Michif

Chest artícol a l'è scricc in Lumbàrt, ortograféa orientàl unificàda.

Ol Michif (cod. Iso 639: Crg) l’è öna lèngua mìsta che l’è nasìda quàndo i s’è mes-ciàde sö ‘nsèma la lèngua cree e ‘l francés e s’pènsa che 'l sìes söcedìt in del méla e sèt (sécol XVIII) in del teritòre de chèla che ‘ncö l’è la pruìnsa del Manitòba ‘n Canada.

Chèsta lèngua la gh’avrès de ès egnìda al mónt tra i nòmadi mès-sànch nasìcc da òmegn francés e da fómne cree e al prensèpe la servìa a l’istès tép per capìs sia ‘n famèa che tra i dò etnìe. Ol nòm Michif ‘l vé da la paròla métis, cioè més-sànch o metìcio, e defàti ach ol Michif ‘l à ciapàt ergóta da töte e dò i lèngue, dal cree i rìa i vèrb dimostratìf e interogatìf co la sò morfosintàsi, menimà dal francés i vé i nòm, i pronòm e i agetìf pò a lur co la sò morfosintàsi.

De persùne che i pàrla ‘l Michif n’è restàde gran póche e i se tróa ‘n Canada, ‘n Dakota del Nord e in Montana, fò sùra l’è consideràda öna lèngua de póch e per chèste dò resù la rés-cia de sparì.

Riferimèncc

Marcato C., 2012, Il Plurilinguismo, editori Laterza, Bari; pag. 62.