Lago Titicaca
L Lhago Titicaca, cun cerca de 8300 kn² i situando-se a 3821n arriba de l nible de l mar, ye l lago comercialmente nabegable más alto de l mundo i l segundo an stenson de la América Lhatina.
Lhocalizado ne l altiplano de l Andes, na frunteira de l Peru i de la Bolíbia, ten ua perfundidade média de 140 a 180 n, i ua perfundidade mássima de 280 n.
Más de 25 rius zaguan ne l lhago Titicaca, i l lhago ten 41 ilhas, alguas densamente poboadas.
L Titicaca ye antressante pula populaçon bibendo ne ls Uros, nuobe ilhas artificiales. Essas ilhas tornórun-se ua grande atraçon turística ne l Peru, trazendo scursones de la cidade de Puno, ne l Peru. Outra ilha, Taquile, ye outra grande atraçon turística, apersentando ua quemunidade andígena. Ls habitantes de Taquile son coincidos puls sous produtos téxteis feitos a mano, cunsiderados antre las manufaturas de melhor qualidade de l Peru.
L lhago Titicaca ye alimentado pula auga de las chubas i pul degelo de las geleiras que rodeian l altiplano. Ye fuonte de l riu Zaguadero, que corre para l sul atrabeç de la Bolíbia até l Lago Popó; inda assi, este afluente ye respunsable por menos de l que cinco por ciento de la perda de auga, l resto quedando por cunta de la eibaporaçon debida al bentos antensos i a la sposiçon strema a la luç de l Sol nesta altitude.
La ourige de l nome Titicaca ye çconhecida; fui traduzido cumo "Piedra de l Puma", cumbinando palabras de la lhéngua lhocal Quíchua i Aimará. Lhocalmente, l lhago ye coincido sob dibersos nomes.
Cumo la parte sudeste de l lhago ye apartada de l resto de l lhago pul streito de Tiquina, ls bolibianos chaman essa pequeinha parte de Lhago Huinaymarca i la parte maior de Lhago Chucuito. Ne l Peru, essas partes pequeinha i grande son coincidas cumo Lhago Pequeñl i Lhago Grande, respetibamente.
Brício de l Ancas
[eiditar | eiditar código-fuonte]Segundo la lhenda andina, fui nas augas de l Titicaca que naciu la ceblizaçon anca. L "dius Sol" anstruiu sous filhos para percuráren un lhocal eideal para sou pobo. Manco Capac i Mama Ocllo chegórun, anton, a ua ilha - más tarde batizada de Isla del Sol. L lhocal tenerie sido l brício de l ancas, que dominórun la region antre ls seclos XII i XVI, quando se dou la ambason spanhola. Dibersos sítios arqueológicos puoden ser besitados al lhongo de l Titicaca, que ten cumo percipales habitantes ls pobos uros, çcendentes de l ancas. Eilhes biben, an giral, de la pesca i de la agricultura a las bordas de l lhago.