Alan Rickman

Alan Sidney Patrick Rickman (* 21. Februar 1946 in Hammersmith, London, England; † 14. Januar 2016 ok dor)) weer en britischen Theater- un Filmschauspeler as ok en Theaterspeelbaas.

Alan Rickman, 2009

Biografie

De fröhen Johren

Rickman weer in’n Londoner Stadtdeel Hammersmith boren as tweet vun veer Kinner vun en irisch-walisischen Familie. Sien Vadder weer kathoolsch, sien Mudder methodistisch. As he acht Johr oolt weer, is sien Vadder, de Fabrikarbeiter Bernard Rickman, an Lungenkrebs doodbleven. Sien Mudder Margaret Doreen Rose, borene Bartlett hett de veer Kinner vun doran alleen optogen. Se is 1997 storven.

In sien Kindheit hett Rickman sien Talent för Kalligrafie un Aquarellmaleree opdeckt. He hett dorüm en Stipendium kregen an de Privatschool Latymer Upper. As he sien Schollutbilln afslaten harr, hett he an’t Chelsea College of Art and Design en Utbilln as Grafikdesigner maakt. Mit Frünnen hett he dorna sien egene Firma Graphiti grünnt un eenige Johren lang in Soho in dissen Beroop arbeit. Mit 26 Johren kreeg he en Stipendium för de Royal Academy of Dramatic Art (RADA), de he vun 1972 bit 1974 besöcht hett. He hett sik in disse Tiet vör allen mit Theaterdramen vun William Shakespeare befaat. An’t Enn hett he noch den Emile-Litter-Pries, den Forbes-Robertson-Pries un de Bancroft-Gold-Medaille wunnen. Nebenbi hett he as Kledaaschmaker för Nigel Hawthorne un Ralph Richardson arbeit.

Loopbahn

Alan Rickman hett mit teemlich veel verschedene experimentelle britische Theatergruppen tosamenarbeit, as to’n Bispeel an’t Royal Court Theatre in London in Tschechows Čajka (dt.: Die Möwe) oder Snoo Wilsons The Grass Window. He is ok dreemol bi’t Edinburgh International Festival optreden. Twüschendör harr he af un an Rullen in’t Feernsehn. 1980 speel he ü.a. de Rull Mr. Slope in de mehrdeeligen Verfilmen vun Anthony Trollope sien Barchester Towers: The Barchester Chronicles vun de BBC.

He hett butendem ok in een poor Stücken vun de Royal Shakespeare Company mitspeelt, ü.a. in As You Like It un Les Liaisons dangereuses (dt.: Gefährliche Liebschaften). De Inszenieeren vun Les Liaisons dangereuses is 1987 ok an’n Broadway opföhrt worrn. Rickman is för sien Rull as Vicomte de Valmont för den Tony Award nomineert worrn. Wiel disse Tiet in New York is em vun Joel Silver de Rull Hans Gruber in Die Hard anboden worrn, de 1988 den Grundsteen för sien internatschonale Filmloopbahn leggt hett. Siet de Tiet is Rickman op de Bühne – dor ok veel as Speelbaas – as ok in’t Feernsehn un in’t Kino veel an’t Wirken.

In britsche Filmen as Sense and Sensiblility oder Truly, Madly, Deeply hett he allgemeen mehr se sinnigeren Rullen speelt, wiel he in Hollywood-Produkschonen faken den Bösen verkörpert hett, as to’n Bispeel de Sheriff vun Nottingham in Robin Hood: Prince of Thieves oder den Terrorist Hans Gruber in Die Hard. Man, ok sien Talent op’t Rebeet vun de Kummedie hett he mehrfach ünner Bewies stellt as in Galaxy Quest, Dogma oder Love Actually.

1995 hett Alan Rickman as Speelbaas dat Stück The Winter Guest inszeneert, dat an’t Almeida Theatre in London opföhrt worrn is. Bi de Verfilmen vun dat Stück in’t Johr 1996 mit Emma Thompson und ehr Mudder Phyllida Law in de Hööftrullen weer he ok wedder Speelbaas un is för den Film sogor uttekent worrn. Den Golden Globe hett he 1996 as Dorsteller in de HBO-Verfilmen Rasputin kregen.

Siet 2001 is he sünners ok bi de jüngeren Tokiekers düchtig bekannt worrn dör sien Rull as Severus Snape in de Harry-Potter-Filmreeg. In de Originalfaten vun de Verfilmen The Hitchhiker’s Guide to the Galaxy geev he sien Stimm för den Roboter Marvin un höör 2005 to de Filmkru vun de grote Produkschoon Le Parfum – Histoire d'un meurtrier vun Tom Tykwer, wat de Verfilmen vun den Roman vun Patrick Süskind is. Wietere Filmen, in de he mitspeelt hett weern Snow Cake, Sweeney Todd: The Demon Barber of Fleet Street un Bottle Shock.

In’t Johr 2005 hett he an’t Royal Court Theatre de Regie föhrt bi dat Stück My Name Is Rachel Corrie, för dat he mit den Theatregoers’ Choice Award as beste Speelbaas uttekent worrn is. In’n September 2008 is he Speelbaas in Londoner Theater Donmar Warehouse bi dat Stück Creditors vun August Strindberg wesen.

Rickman is ok in musikaalsche Warken wedder to finnen, so as in en Leed, dat de engelsche Musiker Adam Leonard komponeert hett. Sien Stimm hett he 1992 ok to dat Album Tubular Bells II vun Mike Oldfield geven, op dat de in’t Stück „The Bell“ de Musikinstrumenten optellt. In’t Johr 2000 weer he in dat Musikvideo In Demand vun de Grupp Texas to sehn, as he mit de Singersche Sharleen Spiteri dör de Nacht föhrt un an een Tanksteed en Tango danst.

Privatleven

Alan Rickman is siet 1968 mit de Politikerin un Professersche Rima Horton tosamen. Dat Poor leevt tosamen in London.

Filmografie (Utwahl)

Alan Rickman bi’t Tribeca Film Festival 2007

Johr	Titel	Synchroonsnacker
1978	Romeo & Juliet, Feernsehn
1982	The Barchester Chronicles, Feernsehreeg
1985	Pity in History, Feernsehn
1988	Die Hard dt.: Stirb langsam	Lutz Mackensy
1989	The January Man dt.: Im Zeichen der Jungfrau	Manfred Lehmann
1990	Quigley Down Under dt.: Quigley der Australier	Hans-Peter Hallwachs
1991	Truly, Madly, Deeply dt.: Wie verrückt und aus tiefstem Herzen	Wolfgang Condrus
1991	Robin Hood: Prince of Thieves dt.: Robin Hood – König der Diebe	Peter Fricke (Kino) Lutz Riedel (DVD)
1991	Close My Eyes dt.: Schließe meine Augen, begehre oder töte mich
1992	Bob Roberts	Michael Telloke
1994	Mesmer	Dirk Galuba
1995	An Awfully Big Adventure dt.: Eine sachliche Romanze	Lutz Mackensy
1995	Sense and Sensibility dt.: Sinn und Sinnlichkeit	Bernd Rumpf
1996	Rasputin, Feernsehn	Peter Fricke
1996	Michael Collins	Wolfgang Condrus
1997	The Winter Guest	as Speelbaas, ok Dreihbook
1998	Judas Kiss	Joachim Kerzel
1998	Dark Harbor dt.: Dark Harbor – Der Fremde am Weg	Volkert Kraeft
1999	Dogma	Michael Telloke
1999	Galaxy Quest dt.: Galaxy Quest – Planlos durchs Weltall	Lothar Blumhagen
2001	Blow Dry dt.: Über kurz oder lang	Leon Rainer
2001	Harry Potter and the Sorcerer’s Stone dt.: Harry Potter und der Stein der Weisen	Erich Hallhuber
2002	Harry Potter and the Chamber of Secrets dt.: Harry Potter und die Kammer des Schreckens	Erich Hallhuber
2003	Love Actually dt.: Tatsächlich … Liebe	Lothar Blumhagen
2004	Something the Lord Made, Feernsehn dt.: Ein Werk Gottes	Lothar Blumhagen
2004	Harry Potter and the Prisoner of Azkaban dt.: Harry Potter und der Gefangene von Askaban	Bernd Rumpf
2005	The Hitchhiker’s Guide to the Galaxy, Stimm dt.: Per Anhalter durch die Galaxis	Friedhelm Ptok
2005	Harry Potter and the Goblet of Fire dt.: Harry Potter und der Feuerkelch	Bernd Rumpf
2005	Snow Cake	Michael Telloke
2006	Le Parfum – Histoire d'un meurtrier dt.: Das Parfum – Die Geschichte eines Mörders	Bernd Rumpf
2007	Nobel Son	Thomas Danneberg
2007	Harry Potter and the Order of the Phoenix dt.: Harry Potter und der Orden des Phönix	Bernd Rumpf
2007	Sweeney Todd: The Demon Barber of Fleet Street dt.: Sweeney Todd – Der teuflische Barbier aus der Fleet Street	Bernd Rumpf
2008	Bottle Shock	Bernd Rumpf
2009	Harry Potter and the Half-Blood Prince dt.: Harry Potter und der Halbblut-Prinz	Bernd Rumpf
2010	Alice in Wonderland, Stimm dt.: Alice im Wunderland	Bernd Rumpf
2010	Harry Potter and the Deathly Hallows: Part 1 dt.: Harry Potter und die Heiligtümer des Todes	Bernd Rumpf
2011	Harry Potter and the Deathly Hallows: Part 2 dt.: Harry Potter und die Heiligtümer des Todes: Teil 2	Bernd Rumpf
2012	Gambit dt.: Gambit – Der Masterplan	Bernd Rumpf
2013	A Promise dt.: Ein Versprechen	Bernd Rumpf (Synchro 2015)
2013	CBGB	Bernd Rumpf
2014	A Little Chaos dt.: Die Gärtnerin von Versailles	Bernd Rumpf
2015	Eye in the Sky	Bernd Rumpf

Utteken

Alan Rickman weer bit hüüt för mehr as dörtig Filmpriesen un Utteken vörslahn un hett dorvun veerteihn winnen künnen, as to’n Bispeel:

• 1992: den ALFS Award in de Kategorie Britsch Schauspeler vun’t Johr för Close My Eyes.
• 1992: den BAFTA Award in de Kategorie Best Nevendorsteller för Robin Hood: Prince of Thieves.
• 1992: den Evening Standard British Film Award in de Kategorie Best Schauspeler för Robin Hood: Prince of Thieves.
• 1996: den Emmy in de Kategorie Rutragen Hööftdorsteller in en Minireeg för Rasputin.
• 1997: den Golden Hugo in de Kategorie Best Film för The Winter Guest.
• 1997: den Golden Globe in de Kategorie Best Hööftdorsteller – Mini-Serie oder TV-Film för Rasputin.
• 1997: den Golden Satellite Award in de Kategorie Best Dorsteller – Mini-Reeg oder TV-Film för Rasputin.
• 1997: den OCIC Award för The Winter Guest.
• 2008: den Golden Space Needle Award in de Kategorie Best Schauspeler för Bottle Shock.

Butendem is Rickman in’n Januar 2006 mit den Theatregoers’ Choice Award in de beiden Kategorien Best Speelbaas un Best Nee Stück för dat Theaterstück My Name is Rachel Corrie uttekent worrn.

Weblenken

Alan Rickman. Mehr Biller, Videos oder Audiodateien to’t Thema gifft dat bi Wikimedia Commons.

• Alan Rickman in de Internet Movie Database (engelsch)
• Biografie vun Alan Rickman (hoochdüütsch)