Subtropen
De Subtropen höört to de allerhand Klimazonen up de Eer. Se liggt direktemang in’n Norden un in’n Süden vun de Tropen, um un bi twuschen 23,5 un 40° nöördliche Brede un ok twuschen 23,5 un 40° süüdliche Brede. In de Subtropen gifft dat en Klima mit en tropischen Sommer, man en nich tropischen Winter. De Subtropen könnt unnerdeelt weern in dröge, winternatte, sommernatte un jummerlos natte Subtropen.
Klassifikatschoon
Dat subtropische Klima warrt hüdigendags meist gor nich mehr bruukt as en egen Klima in de modernen Klimaklassifikatschonen. Vundeswegen kann dat as en traditschonelle Klimazone bekeken weern. In de Klassifikatschoon, de hüdigendags meist bruukt warrt, dor hannelt sik dat um Köppen siene Klimaklassifikatschoon bi, warrt de Begreep heel un deel nich mehr bruukt. Bi Köppen höört de Subtropen as Unnerdeel to dat Matige Klima mit to. De Temperatur vun den warmsten Maand liggt boven 22 °C in’n Dörsnitt. Dor gegen over liggt de Temperatur vun den küllsten Maand in’n Dörsnitt twuschen -3 °C un 18 °C. Dat gifft natte Sommers un dröge Winters, oder annersrum. Dat stimmt for dat warme mediterrane Klima (Csa-Klima), dat warme Chinaklima (Cwa-Klima) un for dat warme Seeklima (Cfa-Klima).
De Klimatoloog John Griffith bruukt avers en annere Definitschoon un seggt, subtropisch weern Gemarken mit en Temperatur, de in’n küllsten Maand in’n Dörsnitt twuschen 6°C un 18 °C warm sünd.
Noch anners seggt dat Glenn Trewartha un meent, subtropisch weer en Klima denn, wenn dor in’t Johr acht oder mehr Maande lang in’n Dörsnitt en Temperatur vun tominnst 10° C regeert un tominnst een Maand lang de Temperatur unner 18 °C liggt.
Wie de Umstänn in de subtropischen Klimazonen sünd, is bannig verscheden. Dat hannelt sik um een vun de gröttsten Klimazonen up’e Eer. So kann de Masse vun Nedderslag sik verschelen vun bannig fuchtig bit hen to unbannig dröge. En poor vun de gröten Wösten liggt in de Subtropen. Sommers könnt heet ween oder normol warm. En Reeg vun Gemarken in de Subtropen weert vun Zyklone plaagt, de in’n Harfst un Sommer in de Tropen tostanne kaamt un wo denn veel Regen dalpladdert.
