Ännern vun Syrien (Afsatz)

=== Völker===
De meisten Inwahners vun Syrien sünd [[Arabers]]. Se föhlt sik as een kulturell Gemeenschop mit de araabschen Inwahners vun de Naberlänner („araabsche Nation“). Tomeist sünd se [[Sunni|Sunniten]], en Minnerheit höört to annere Twiege vun den [[Islam]] oder sünd ok [[Christendom|Christenlüde]]. 

De tweet gröttste Volksgrupp mit en egen Spraak in dat Land sünd de [[Kurden]]. [[1979]] is ehr Andeel an de ganzen Inwahners up um un bi negen Perzent taxeert wurrn. Veel Kurden sünd twuschen [[1924]] un [[1938]] ut de Törkei in dat Land kamen, as dat dor en Reeg vun Upstänn vun de Kurden geven harr, de vun dat töksche Militär dalslahn wurrn weern. So siedelt de meisten Kurden langs de törksche Grenz. Knapp de Hälft vun de Kurden in Syrien leevt in de Region [[Kurd Dagh]] noordwestlich vun Aleppo. Dor, un ok in de noordööstliche Provinz [[Al-Hasaka (Gouvernement)|al-Hasaka]] maakt se de Mehrheit ut. Vunwegen, dat dat up’n Lanne in de Barge keen Arbeit gifft, sünd allerhand Kurden na de Grootstäder Aleppo un damaskus hentagen. 10 bit 15 % vun all Kurden leevt in Hayy al-Akrad, en Stadtdeel vun Damaskus, unnen an den [[Dschabal Qāsiyūn]].<ref>Richard F. Nyrop (Hrsg.): ''Syria, a country study. Foreign Area Studies.'' The American University, Washington D. C. 1979, S. 58</ref> De [[Jesiden]] weert meist to de Kurden torekent. Dor hannelt sik dat um en religiöse Minnerheit mit en paar Dusend Maten bi, de in de Barge twuschen Aleppo un [[Afrin]] un in Dörper um [[Amude]] un [[Quamishli]] ganz buten, in’n Noordosten leevt. 

[[Bild:Cilician Armenian High School, Aleppo, the elementery section (2).jpg|thumb|Armeensche School in Aleppo]]
De meisten [[Armeniers]] sünd twuschen [[1925]] un [[1945]] as Flüchtlinge  ut de Törkei na Syrien kamen. Se maakt um un bi twee bit dree Perzent vun de Inwahners vun dat Land ut. Dree Viddel vun jem wahnt in Aleppo un bi 20 % sünd se in Damaskus tohuse. De annern verdeelt sik up de gröttern Städer, sunnerlich in de Dschazira-Region. De Armeniers höört grotendeels to de [[Armeensch-Apostoolsche Karken]] to, anner sünd ok [[Armeensch-kathoolsche Karken|armeensch-kathoolsch]]. De meiste kaamt weertschopplich ganz goot torecht un sünd in [[Hannel]], [[Lüttindustrie]] un [[Handwark]] togange.

De [[Turkmenen]] hefft sik wiethen in de Sellschopp mank de Arabers assimileert. Fröher sünd se Halfnomaden ween un hefft in de Dschazira [[Veehtucht]] bedreven oder [[Ackerbo]] an’n unnern Euphrat um Aleppo to. Se sünd Sunniten. 

Ok Sunniten sünd de [[Tscherkessen]]. Se sünd an’t Enn vun dat [[19. Johrhunnert]] ut den [[Kaukasus]] verdreven wurrn. Dorna hefft se sik in de [[Hauran]]-Region dallaten, sunnerlich um [[Qunaitra]] rum. Dor hefft se sik sunnerlich befaat mit den Anbo vun [[Koorn]] un mit Veehtucht. 1979 is ehre Tahl up 55.000 taxeert wurrn. Veel vun jem harrn in de Kolonialtied in de [[Frankriek|franzöösche]] Armee deent, vundeswegen sünd se vun de Arabers lang scheef ankeken wurrn.<ref>Richard F. Nyrop, S. 60</ref>
De [[Aramäers (Christendom)|Aramäers]] un [[Assyrers (Nutied)|Assyrers]] höört to christliche Karken, de unner den egen Naam [[Suryoye]] tohopenfaat weert. Meist sünd se Liddmaten vun de [[Syyrsch-Orthodoxe Karken vun Antiochien]]. Assyrers an sik höört to de [[Assyyrsche Kark vun den Osten]] to. Dor sünd se [[Nestorianers]] mit. De Spraak for de [[Liturgie]] in de [[Kark]]en un ok de Alldagsspraak is [[Aramääsche Spraak|Aramääsch]], de ehr Twieg in düsse Gemarken [[Syyrsche Spraak|Syyrsch]] nömmt warrt. Se leevt sunnerlich in de Provinz [[Al-Hasaka (Gouvernement)|al-Hasaka]]. Veel vun jem sünd [[1933 bit [[1936]] ut den [[Irak]] utbüxt, wo se verfolgt wurrn sünd. De Franzosen hefft jem denn, mit Hölp vun den [[Völkerbund]], in Tall Tamir (an’n Chabur, noordwestlich vun [[al-Hasaka]]) unner brocht. Bit in de 1970er Johre harr se dor umto bi 20 Dörper grünnt, nadem se dat Land eerst mol mit [[Water]] bruukbor maakt harrn. Midderwielen sund en ganzen Barg utwannert vunwegen, dat dat weertschopplich slecht lopen deit. 

Denn gifft dat ok noch bi 476.000 (2002) Flüchtlinge vun de [[Palästinensers]]. Un na den [[Irakkrieg]] sünd dor noch mol 200.000 Flüchtlinge (2009) ut den Irak to kamen. Mank de Irakers sünd allerhand Assyrers. Veel vun jem hefft sik in [[Dscharamana]] dallaten.