International Union of Pure and Applied Chemistry
De International Union of Pure and Applied Chemistry (IUPAC), op platt de „Internatschonale Union för reine un anwendte Chemie“, is in’t Johr 1919 vun Chemikers ut de Industrie un vun de Universitäten grünnt worrn. Dat Teel weer, de Kommunikatschoon op dat Rebeet Chemie weltwiet mööglich to maken un to ünnerstütten. Siet lange Tiet is de IUPAC nu as de bestimmen Institutschoon acht, wenn dat dorüm geiht, allgemeen gellen Raat to geven bi’n Nömen von Saken un Stoffen, to Teken, Fackbegrepen, standardiseert Meetverfohren, Weerten för molaar Massen vun de cheemschen Elementen in natürliche Isotopen-Tohopensetten un vele annere Saken vun de Chemie. De IUPAC is Rutgever vun de Tietschrift Pure and Applied Chemistry.
In de Projekten vun de IUPAC arbeit Chemiker ut de helen Welt ehrenamtlich mit. Disse Projekten deelt sik in acht Afdelen op:
- Physikaalsch un biophysikaalsch Chemie
- Anorgaansch Chemie
- Orgaansch un biomolekulare Chemie
- Makromolekular Chemie
- Analytsch Chemie
- Chemie un Ümwelt
- Chemie un Gesundheit
- Cheemsch Nomenklatur un Strukturdorstellen
Historie
[ännern | Bornkood ännern]Vör dat Grünnen vun de IUPAC geev dat ünner de Chemikers al länger den Drang, de internatschonale Tosamenarbeit beter to maken. So geev dat mit de International Association of Chemical Societies (IACS) al en Vörlöper-Organisatschoon, de sik 1911 in Paris tosamenfunnen hett un sik ü.a. al üm Fragen to de Nomenklatur un de Standardiseeren in de Chemie Gedanken maken schüll. De eersten Versöken, en Standard bi de Nomenklatur intorichten, füngen aver al 1860 an, as August von Kekulé de eersten internatschonalen Drapens organiseert hett, de opletzt 1892 to de so nöömten Genfer Nomenklatur för orgaansch-cheemsche Verbinnen föhrt hebbt.