Premiu Oscar

Lu Premiu Oscar è nu premiu chi veni datu comu ricanuscimentu pi n'attività liata ô cìnima a Hollywood. E' cunzidiratu lu premiu cchiù pristiggiusu di na parti mpurtanti di pirsuni chi travàgghianu ntô sitturi dû cìnima. Stu status è cuntistatu di na minuranza chi riteni chi Hollywood duna lu premiu comu ricanuscimentu di successi principarmenti cummirciali.

Lu premiu stissu cunzisti di na statuedda placcata d'oru. Lu ricanuscimentu pò èssiri pi lu megghiu film di l'annu, pi lu megghiu atturi di l'annu, pi la megghiu mùsica, pi la megghiu sciniggiatura, pi lu megghiu film forasteru (rispettu ê film miricani), pi la carriera di nu riggista famusu, eccetra.

É la Academy of Motion Picture Arts and Sciences ca dicidi a cui assignari li premi Oscar; è n'organizzazioni prufissiunali onuraria custituiuta di pirsunalità dû munnu dû cìnima; nnû 2002 avìa chiossai di 6.000 membri.

Lu nomu Oscar veni datu a la statuedda chi si duna a li vincitura comu premiu (pari ca l'orìggini dû nomu è duvuta a Margaret Herrick chi, vidennu la statuedda ncapu a un tàvulu, dissi: "Assimigghia propiu a me ziu Oscar!").