Lawmna chang hriat leh lawm fo

(Sam 37: 4; Phil.4:4;Kol 3:15; I Thes. 5:16)

- Rev. Lal Eng zauva

Lalpaa lawmna hi a hmasak phawt chuan kawng engkimah kan lawm \hin. Kristian ze
dik tak chu Lalpaa lawm fo hi a ni. Lalpaah chuan lawm fo rawh u tia fuih kan ni a. A
chhan chu Krista’n, a hmangaihna vanga kan tan a rawn inpeknate, min chhandam
avang te, kan hnena a chen vangte, amah avanga ropuina beiseina kan neih vangte leh
vana kan hming ziak a nih avangte hian lawm tur kan ni. Ka tunu kum khat leh thla
thum mi hi a nu leh pate’n lawm nachang hre turin an zitir \hin a. Miin thil an pekin
“Lawm e” ti-a sawiin kut beng leh nui sang hian amah thil petute a lo lawm \hin a.
Chu chuan ka nunah thu tam tak a sawi a, Hringnun a aw mawi leh thil ngainatawm
ber nia ka hriat chu -hringfa te’n thinlung taka an lawmna an sawi chhuah \hin
‘Ka/kan lawm e’, Ka/kan lawm tak zet, Ka/kan lawm lutuk, a va lawmawm tak em”
an tih hi a ni. Mihring mihrinnaah pawh lawm nachang hre mi leh lawm thiam mite hi
mi dangte an tilawm \hin chauh ni lovin mi lawm an hlawh \hin. Min siamtu leh min
vengtu Lalpa paw’n ama-a lawm nachang hre mite chungah a lawm ngei ang.

Lawm nachang hriat a va \ul em! Tirhkoh Paulan Kolossa khuaa mite hnenah,“Lawm
nachang hre bawk rawh u”, a ti a . Lawm fo hi zir pawh a zir thei. Charles H.
Spurgeon kha vawi khat chu London kawtthlerah an rawk a, a pawisa eng emaw zat
an laksak a, ina a haw chuan a nupui hnena thil awmzia hrilh pahin,“Engpawhnise
Pathian hnenah lawmthu I sawi phawt mai teh ang”, a ti a. A nupui chuan, “Mi’n an
rawk vang chein Pathian hnenah lawmthu I sawi ang a maw?” a ti a. Ani chuan,”I hre
thiam lo a nih chu, lo ngaithla teh. A pakhatnaah chuan rukru hian kan nunna hi la
lovin ka pawisa chauh a ru a. A pahnihnaah chuan ka pawisa tam ber chu inah kan la
kawl him, min rawk e han tih tham pawh a ni chiah hlei nem. A pathumnaah chuan
rukru ka nih zawk loh avangin Pathian hnenah ka lawm em em a ni ,” a ti daih a ni.
Hetah hian lawm nachang hre lo mi leh lawm nachang hria-te ( a thim zawng leh a
eng zawnga thil thlirtu ) nun a in hahdam thlak hleihzia kan hmu thei awm e. Charles .
H. Spurgeon nupui chuan an pasal-in a hloh enin a rum laiin Charles H. Spurgeon-a
erawh chuan a la hloh loh lam kha enin a lawm em em thung a ni.

Lawmna kan duh a, kan zawng vek a, amaherawhchu lawm hi kan peih loh berte
zinga mi a ni tlat bawk si a ni. Hla phuahtu chuan “Lawm kan peih loh avang zawkin
lo la tleng lovah kan ngai” (KHB 47 chang 3-na) a ti a , a dik khawp mai. Lawm hi
kan tum ber a ni, kan peih loh ber a ni. Engvangin nge kan lawm loh kan tih chuan - lo
la thleng lovah kan ngai tlat, tuna lawm mai tur hi nakin-a lawmah kan khek tlat.
Chumi ka neih hunah emaw, chumi ka nih hunah emaw kan ti a, tunah hian kan lawm
mai lo fo a ni. Kan Bible min zirtirnaah chuan tunah tak hian lawm tur, tuna kan awm
ang tak leh nihna ang tak hian lawm tur a ti.

Lawmna hi khawiah nge a awm tiin zawt ta ila, Thilah hian a awm lo reng reng.
Entirnan hei le vanneihna, lawmna, hei le lungngaihna, vanduaina tia va chhar nawlh
tur khawvelah hian a awm lo reng reng. Entirnan cheng nuai tam tak va chhar ta ila,”I
vannei hle mai a”, min ti mai thei. Vannei ka ni ngawt lo. Chu sum hmang khan drug
emaw zu emaw ruiin chapo phah ta ila, kan tan chuan chu sum chu vanneihna a ni lo
reng reng vanduaina rapthlak tak a tling tlat. Kawng leh lamah cancer natna vei ta
ila,”I vanduai hle mai a”, a tih ngawt theih miah loh. Kha natna avang khan Pathian
hriatna, lawmna leh thlamauanna nei ta ila,”I vanduai hrim hrim”, a tih ngawt theih
loh. Chuti a nih chuan lawmna-te, lungngaihna-te, vanneihna-te, vanduaina-te hi
khawiah nge a awm tih ila, thilah a awm lo va, a dawngtu thinlunglamah a awm. A
dawngtu thinlung lam kha Pathian thua her dik a nih chuan vanduaina ber pawh
lawmna berah a chang thei. Chutiang bawkin a dawngtu thinlung lam kha Pathian
thua her dik a nih loh chuan mihring ngaiha vanneihna tawp khawk pawh vanduaina
rapthlak berah a chang thei tlat.

A hun te-a rah thin

(Jer 17:7-8)

- Pu Zoramthara

Ringtu chu rah chhuak tur kan ni tih hi sawi ngai lova kan hriat sa a ni. Kan Lal Isua
chuan rah tur leh kan rah a awm reng turin min ti. Rah lo phei chu mei a paih mai tur
tiin Joh 15:6 ah khan kan hmu a ni. Amaherawhchu, mi thlarauvah an piang hlawt
(piangthar hlim) a, an nunah rah lawh tur kan hmuh mai loh avanga hmuh danglam hu
emaw hi a dik thei lovang. Lal Isua chuan rah hun tawh rah si lote hi a ni a hau hlum
duh zawng chu ni. Marka 11:12-14 ah khan Isuan tehkhin thu a sawi ah khan kan hmu
a ni. Kan Kohhran huang chhung bik a rawngbawlna chanvo chang pha chin te kan in
bihchian a ngai hle mai. Isuan rah hun tawh te a tih ang kha kan ni thei awm e.
Rawngbawltu ni kher lo piangthar tawh zawng zawng te pawh kan in ngaihtuah chian
hi a hun tak zet a ni.
A hun tea rah \hin han tih chuan theikung, rah hunbi nei, a chang chang a rah \hin te hi
rilruah a awm thei awm e. Nimahsela, chuti zawng chu kan Pathian thu in min
kawhhmuh a tum dan niin a lang lo. Khawvel hun lo thang zel leh boruak lo in lum let
danglam \hin hian ringtu te hi min hmaih bik dawn hauh lo. Amaherawhchu, kan
Pathian hi danglam ngailo Pathian anih avangin kan awmna hun leh hmun leh boruak
lo danglam \hinah hian ringtu kan nihna chu a lang zat zat \hin tur tihna a ni. Chutiang
kan lo nih si chuan khawi hmun a rah tur nge kan nih, engtiang in nge kan rah ang tih
tawi te in han tarlang teh ang.

1) Lawmna hmunah: Sam ziakah hetiang hian kan hmu a,”A lawmna chu Lalpa
danah a ni zawk a; a dan thu chu a chhun a zanin a ngaihtuah \hin. Ani chu tui luang
kiang a thingphun, a hun tea rah \hin, a hnah pawh uai ngai lo ang hi a ni a; A thil tih
apiang chu a hmuingil zel ang”. Kan lawmna (Lawmna awm thei ang zawng zawng-
ah) chu Lalpa dan atanga lawmna a nih loh chuan kan lawmna ber te pawh hi min ti
lungngai tu berah a tang fo \hin a ni. Entirna pakhatah chuan sum chungchang te
pawh a ni thei ang. Eng anga hlimna vawrtawp leh hlimna sang pawh nei ila, Lal Isua
tel lo anih chuan a famkim thei lo. Hawh u, kan lawmna hi Lalpa dan a ni em tih hi i
ngaihtuah zel ang u. Pathian thu in a min hriattir dan a ni si a. Oswald J. Smith-a
chuan a in chhung khur a sum lut reng rengah,”Lalpa sum hi kan chhungkua hian
engzat nge kan hman then ang”, a ti hlauh zawk a ni an ti. Heng hunah te hian a ni
dawn lawmni ringtu te hi kan rahna tur chu.

2) Harsatna hmunah: A lian a te, thlarau mi leh mi lo te pawh khawvel a kan awm
chhung hi chuan harsatna kan tawng \heuh a. Hausak leh retheih avanga awm leh
awm lo pawh a ni lo. Kan nunah Lal Isua a tel loh chuan khawvel hi harsatna
khawvel a ni hrim hrim a ni. Ringtu te harsatna kan tawh in lungngai leh thlabar in
kan awm fo \hin. Chu chuan keimah ni a Pathian hmel lanna tur a hliah fo \hin.
Damloh chungchang ah te pawh \awng\ai phawt aiin damdawi a lang hmasa fo.
Damdawi kan hmang lo tur tihna ni lovin Pathian chuan eng hmanrua pawh hmang a
min tihdam theih zawk avangin Pathian ring chungin thil kan ti tur a ni tih a hi kan
hriat fo a ngai a ni. Sam ziaktu chuan,”Tih hrehawm a ka lo awm kha ka tan a \ha a
ni”, a lo ti a ni. Harsatna leh lungngaihna vawrtawpah pawh Lalpa beiseina thinlung
nei tlat tu chuan harsatna an tawn thuk poh leh Pathian \hatna leh thiltihtheihna a
chhar chhuak \hin. In tihthiamloh hunah te, kan eizawnna \heuh ah te, Kohhrana
rawng kan bawl hona hmunah te leh thildang tam tak ah a awm thei ang. Chung
hunah chuan kan thil tawn ang zelah ani dawn lawm ni keini ringtu inti te hi kan rah
dawn.
Thlaraua nun nghet
“Hmu theia kal lovin, rinnain kan kal zawk si a” (II Korinth 5:7)

- Upa Enga Vaiphei

Mi nun nghet chu mi zahawm an ni tlangpui \hin a, mipuitling kan tih te pawh hi mi
nun nghet an ni fo. Nun nghet leh mumalna nei lo chu kan tlaw a, kan chesualin kan
mualpho hial \hin a, beidawnnaah pawh kan tlu lut hma \hin a ni lawm ni? Chutiang
zelin mi nun nghet nei lo tan chuan hlawhtlinte pawh a har \hin a, mi hlawhtling tam
tak erawh chuan nun nghet leh puitling an nei a, chutiang mi chu an nih avangin, an
beidawng mai mai lo va, an hlawhtling nge nge fo a ni. Heng kan sawi takte hi
mihring nunphung leh kan tun nun sawina a ni a, chutiang bawkin tharauva nun nghet
neih hi a pawimawh tak zet zet a ni.

Kan han sawi tak nun nghet kan tih khi, miin pianpui renga a neih sa a nih loh chuan,
nei mai awllai tak pawh a ni lo. Mahse zirna vang emaw chhiar tam/hriat tam leh tawn
hriatna pawhin nun nghet nei turin a in chherchhuah theih a ni ti ila, kan sawi sual
tampui awm lo ve. Chutiang chu a nih avangin, mihring a chhia leh a \ha hriat hnua,
Pathian mi nih leh pianthar ngai tan phei chuan, nun nghet nei turin in zira, hma lam
pan zel a ngai dawn tihna a nih chu, mahse thil awlai a ni ang em?

Pathianin a belruatte nei \hin mah se, mi tam zawk erawh kan ni kher lo mai thei.
Mahse, thlaraua nun nghet \ha kan neih bawk si loh chuan, buh si thliin a len a len ang
kan lo ni ang a, thlemnate pawh do zo lovin kan boral mai thei tlat a ni. Chuvangin
Thlaraua Nun nghet \ha kan neih chu a \ul a ni lawm ni, mahse he lei kan awm chhung
hian thil hautak tak pakhat chu a ni ve thei tlat. Tirhkoh Paulan “Hmu theia kal lovin,
rinnain kan kal zawk si a”, a tih mai te khi i lo chhut chiang ve tawh ngai em? Sawi
mai awl te nimahse belhchian dawl tak a ni lo maw?

Thil kan hmuh leh hriat te chu rin mai emaw, mi \ha tak kan lo kawm tawh te chu kan
ringin an chungah rinna nghet tak kan nei a ni mai thei, mahse thil kan la hmuh loh
leh mi kan la hriat ngai loh hnenah chuan, engtinnge rinna kan nghah ngam ang? Kan
mawh lo ve, mihring pian phung ve reng a ni miau a ni, chuvang alawm khawvel
scientist ten Pathian hi an rin theih ve loh, an mawh lo ve, an hmuh leh hriatte
chungah chauh rinna nghah tum mi an ni miau a lawm, mahse chung chu kan Lal Isua
lawm zawng a ni ve tlat lo, chu thu chu Thawma leh Isua chungchangah kan hmu
chiang hle a ni.

Le, unau duh tak vawiin ni hian nang pawh Thawma anga, tawn leh hmuh chauhah
nge i innghah, kan Bible-in a sawi hi ring maiin chu rinna nen chuan Lal Isua hnung
hi i zui mek em? Nge \hian ten an tih vang chauh va, ti ve mai te kan lo ni hlauh dah
ang e! Thlarauva nun puitling nghet nei turin, rinna kan neih hi a tawk chiang em?
Lang thei mai nilova hmuh theih loh chu ringa kal kan ni tih hi hre reng chungin, chu
lang thei lo rinna kan neih chu, Nun puitling nghet min neih tirtu a tan a tawk ngei em
tih chu mahni \heuh i in ennawn leh fo \hin ang u.

Lalpan mal min sawm sak \heuh rawh se, Amen.

Nitin kan eikhawpin chaw min pe ang che

- Upa Zonunsanga

Kan thupui hi kan inkhawmna-ah leh kan chhungkua \awng\aina a kan sawi \hin, Lal
Isua’n a zirtirte \awngai dan a zirtirnaah pawh a telh kha a ni a, a pawimawh a nih ka
ring. Kan sawi liam puat \hin a nih pawh in heti zawng hian han ngaihtuah ve chhin
teh.

Kan nitin nunah hian kan thil mamawh hi a lo tamlo khawp mai. Chuti chung chuan
kan nun hi a hmanhlel em em a, \henkhatin ei leh in ringawt kan buaipui a, thenkhatin
silh leh fen, \henkhatin sum leh pai etc. Heng zawng zawng hi ngun taka han chhut
chuan duhamna rilru mai niin a lang. Bible-ah hian duham lo tura min zirtirna kan
hmu nual a, Thuf. 22:1 ah chuan ‘Sum tam tak aiin hming\hatna’ thlang zawk turin
min hrilh a, chanchintha Luka ziakah chuan Vana ro khawl khawm turin min hrilh
bawk a, Pathian thu in ‘in ro awmna apiangah in rilru pawh a awm dawn si a’ a tih hi
a lo dik hle mai.

Kan sawi tak ang hian sum leh pai hi a ber emaw titu chuan a rilru zawng zawng sum
leh paiah a dah a, ei leh in emaw, silh leh fen emaw, kan rilru hi kan ngaih
pawimawhna lamah kan pe lian \hin hle chu a nih hi. Lal Isua khan a zirtirte a tirh
chhuah dawn khan,”Zinna atan tiang te, ipte te, chhang te, tangka te keng suh u, kawr
pahnih pawh nei suh u”, a ti a, engtinnge an khawsak ang le kan ti mai thei. A tirtu
khan engkim a nei a, an tlakchham thu kan hre miah lo! Chu mai a la ni lo, an lo hawn
leh khan rawngbawlna an chhunzawm zel a, damlo te an ti dam zel a. Amah Isua ngei
khan a thusawi ngaithlatu mipui 5000 zet kha chhangper 5 leh sangha 2 in a hrai puar
vek tih kan hria. Naupang pakhat ei tawk lek khan mipui khati zozai a hrai puar tlat
mai a, chuvangin kan ei khawp lek hi a tul chuan a tipung nasa thei em em a ni. Keini
chu kan nitin nunah leh kan rawngbawlna kawngah hian ken tel hi kan ngah lutuk a,
kan eikhawp bak hi kan kengtel nasa lutuk \hin a, kan zo lo \hin a, kawng lakah kan
tlukpui leh \hin a ni ti ru?

Rilru hlemhle leh duhamna hian kan thinlung a hneh fo \hin. Bible chuan boralna mai
anih zia min zirtir a ni. Thufing pakhat chuan,”Mi duham chu tuma tan a tha lo a, ama
tan a thalo ber”, a ti. Tisa thil a hausakna kan lakkhawm tam zawh poh leh kan duham
tawlh tawlh dawn niin a lang. chu chu mihring mizia a ni. Hmuh belh duh vangin
tawp chin nei lovin kan thawk nasa tawlh tawlh ang a, kan thih ni thlengin kan
duhtawk kan nei chuang si lovang. Nun hi kan thil neih leh ro sum aiin a hlu zawk ani
tih hi kan hriat fo a \ha a, kan thil neih engkim mai hi Pathianin lawm taka kan hman
turin min pe a, amah fak nan leh a rawngbawl nan min pe a ni.

Heng kan sawi takte avang hian,”Hna i thawk tlem ang u, hausak i tum lovang u”,
tihna lam a ni lo. “Kan hmuh phak leh kan neih chinah hian lungawi i tum ang u”,
"Duham avang in mahni nun chhe khop in leh midang ti chhe khopin i nunglo ang u”,
tihna a ni zawk. Khawvela mi awhawm leh mi hlim ber berte chu, midang ta awt lo
va, mahni nihna leh mahni neiha lungawi thei te hi an ni. Chuvangin taksa lam ani
emaw, thlarau lam ani emaw, kan ei khawp tawk te te in, kan mamawh tawk chauh
zelin Pathian hnenah i dil \hin ang u.

Lalpa’n malsawm rawh se, Amen.

Kilhna thirkhen
- Upa Zoremmawia Fanai

Hla Siamtu chuan ti hian a lo ti a, “Ka Lal kraws a khengbet tu kha, Kilhna thirkhen
mai ni lovin, keimah min hmangaih vang a lo ni”. Kristan min hmangaihna hi a va lo
nasa em! Lawmna nasa tak neia hlim chunga a rawngbawl tur kan va ni tak em.
Kristan min hmangaihna hi engtin nge kan chhan let ve ang le? Sual a bo tawh hnu
min hmangaih vangin min rawn zawng chhuak leh a, a nunna hial Kross ah a rawn
hlan a, chu a thihna chu kan tan chatuan nunna ah a lo chang ta.

Kross a thina hian man a nei a ni. Keini sual a tlu tawh tan a thlawna chatuan nunna
neihna ni mahse, man a lei kan nih tawh avangin kan man bat hi kan tlak ve ngei a
ngai ang. Min hmangaihna hi mihring tan rulh zawh sen rual a ni dawn lo, chuvang
chuan kan tih theih chu theihtawp a amah chawimawi leh fak hi kan rulh let dan tur
leh a hmangaihna kan chhan let dan tur a ni awm e. Kan chawimawi zia leh fak tlak
Pathian a nih zia kan tih lan fo hi kan bat a ni, kan nitin chet tlatnaah te, kan
hnathawhna hmunah te, kan khawsak puite bulah leh kan rawngbawlpui te bula kan
tih lan piahah hian kan bula ringlo mite kiangah kan ti lang zual tur a ni. Ringlo mi
nih anin hriat a Chhandamfate an lo nih ve theih nan.

Kristan min tlan chhan ang taka ama rawngbawl chhunzawm hi kan bat dang leh a ni.
Mi zawng zawng chhandama awmah leh chatuan nunna nei turin min duh kan tih si
chuan, chhandam la ni lote chuan chhandamna thu tu hnen atangin nge an hriat ve ang
le?. Kristan an tan a tuar a ni tih an hriat si loh chuan keini hian rawngbawl hna
chhunzawm a hmalakna tur kan va ngah dawn em. Krista la hre lo mi tam tak an boral
mek si a. Chhandam nih inhria se Krista chu Lal leh chhandamtuah an pawm ve mai
awm si a. Kristan min hmangaih angin mi zawng zawng a hmangaih si a.

Krista hmangaihna in thil siam zawng zawng a huam avangin, thilsiam tin rengin
amah an chawimawi thin, thilsiam zawng zawng chungah Pathian hmangaihna kan
tilang tur a ni. Kristan min hmangaih avang a Kalvari kraws a kilhna thirkhen a lo
thlang hi chatuan nunna kan neih theihna a nih avangin kan nun kawng hruaitu atan I
hre thar leh ang u, Phu loh hmangaihna a ni chu thihna chauh chuan Pa lung a ti awi si
a.

Choak
- Upa K. Laltluangkima

Mizo te chuan ‘chinrang leh bawng’ hi sava mawia kan sawi a ni a. Ramparva leh
varihaw sa a tui kan ti hle a. |huro a nunnem ber ti tein kan sawi \hin. Sava azawngah
hian choak hi duhawm lo, chimawm si, racist si, tuitang lo leh \angkaina nei lo ber ni
hialin ka ngai a. Ka sava ngainat loh ber a ni hial awm e.

Duhawm lo: Choak chu a dum tluk mai a, an han fu khawm te an han thlawk ho te hi
an ngainat awm loh hluah hluah a. Film siamtu-ho pawh hian hei hi an hria a ni ngei
ang film hlauhawm lamah chuan choak an telh deuh ziah a. An han hram te reng reng
hi a thler duar duar mai a, lung hi a tileng mawlh lo. Han en chet chet ila tam tak
zingah pawh hian a keu deuh awm pawh hi an awm lo nia.

Chimawm: An chimawm em em mai lehnghal a. An vir a, an thatchhe em em a. A nu

aiin a pa an la thatchhe leh ta nghal a. Sava zingah kan chhungkaw min tibuaitu ber
chu choak hi an ni. Zinga ‘trash bag’ kan dah chhuah hi an lo chuk hawng ziah a, ei
tur an dap a, an chen darh nuaih ziah \hin. Ngeiawm leh chimawm tak an ni. Sava
dang hi chuan min tibuai lo va, a \hente phei hi chu hmuh chak ngawih ngawih mah
ila kan hmuh phakah an awm duh lo va, choak erawh chu ninawm khawpin hmun
tinah an tam si.

Racist: USA kan tawngkam lar tak chu racist tih hi a ni a. Mahni anpui ni lo te
enhranna hi a ni ber mai. Choak hi racist ka ti khawp a. Zingah thrash bag dum leh var
kawtkaiah dah chhuak ila, a bag var zawk hi an chuk darh vek a, bag dum hi chu an
khawih duh miah lo, an mahni anpuiah an ngai a, an dimdawi ve ni ngei tur a ni.

Tuitang lo: Choak hian ei duh loh pawh a nei lo an ti. Chuti khawpa duhtui lo leh
pawisak nei lo immoral chu a ni a, engpawh a ei vek a ‘anytarian’ a ni thlawt a ni.
Sava \henkhat chu thei rah chauh ei an ni a, sava \henkhat erawh chu sa chauh ei te an
ni leh a, a \hen chuan pangpar zu te an dawt a, hnah te an chuk ve a; mahse choak chu
chutiang a ni lo, engkim hi a ei vek mai a ni. Chuvang chuan mahni invawnfelna
lamah leh thianghlimna lamah hian a hnufual em em a ni.

|angkai lo: An \angkai lo em em bawk a, ‘pet’ anga vulhtu hi sawi tur an tam lo khawp
mai thei. Zoo ah hian ka kal nual tawh a, choak an khawi awm pawh hi ka la hmu ngai
lo. Mizo thawnthua Tualvungi ko tur pawh khan a in volunteer ve a, mahse a koh dan
a thiam loh em avangin Vahui an tir ta zawk a nih kha, engti atan mah hian a \angkai
lo a ni ber mai. Leveticus-ah kan hmu a, a sa pawh hi Juda ho tan chuan ei thiang lo a
ni hial asin.

Heti taka duhawm lo leh ngaihnat a hlawh loh hi Isua pawh khan a hre ve aniang
tehkhinthu atan a rawn thlang hial a. Mihringte kan mangang \hin a, lungkham kan nei
thin a, kan ralmuang lo \hin tih hriain min thlamuanna atan leh a thlamuanthlakzia
sawina atan Luka 12:24 ah chuan, “Choakte hi ngaihtuah rawh u, buh an tuh lo va, an
at hek lo; zem te, buh in te pawh an nei lo; nimahsela Pathianin a chawm si a, nangni
chu savate ai chuan in hlut zawkzia mai chu!” min ti a ni. Hlu zawk teh reng e.
Mihringte chu ransa leh sava, tui chhunga khaw sa ho zawng zawng chunga hotu
atana siam kan ni a. Kan thuhnuaiah an awm vek a. Chumai a la ni hlei nem; keini te
chu Amah anga siam kan ni a, Pathian anga din kan ni asin. ‘Amah ang’ han tih hian
lemziak thiamin entawna mi lem a entawn ang chiah a ziak ang mai pawh hi a ni lo
va, Pathian ‘Image’ a siam kan ni zawk a ni. Chumi awmzia chu ‘Pathian xexox copy
kan ni’ tihna a nih chu.

Chuvang chuan kan hlu a, kan ropui a ni. Choak- sava zinga tuitang lo ber pawh
Pathianin a enkawl a, ni tin an ei tawk awmna a kawhhmuh thin chuan keini Ama
‘Image’ ngei mai te chu chu min va enkawl nasa dawn teh lul em - A thu kan awih
phawt chuan...
Lalpa’n a thu malsawm rawh se.

Pathian hnaih rawh u

- Upa Zonunsanga

Company ho hian kum tawpah hian an sumdawnna an enlet a, chutah chuan an thil
neih chi hrang hrang, bungraw hlut zawng te, an sum khawm te, mita an bat te, mi in
an hnena an bat te, an sum che vel zawng zawng kha a dik em tiin balance sheet( (a
inmil leh milloh endikna) an siam \hin. Chuta a inmil thlap loh chuan khawiah emaw
diklo a awm tihna a ni. Chutiang bawkin keini ringtute pawhin kan nitin nunah leh
Pathian kan zuina kawngah hian balance sheet kan siam fo a ngai \hin. Bible in ringtu
nun dang tur a sawi ang leh tuna kan nun dan hi a in balance loh viau chuan diklo,
siam\hat ngai a lo awm a ni duh khawp mai.

Kalkawngah ‘Do not enter’ sign a lo awm chuan kal phal loh emaw kal luih loh tur
tihna a ni. Kan kal luih chuan Police in min man phah thei a, kan chetsual phah theih
bawk. Chutiang bawkin kan nunah Pathianin kallohna tur, pen lohna tur ‘Do not
enter’ sign a siam \hin a, kan kal luih \ang \ang chuan kan tuar leh nge nge \hin. A
chang phei chuan boralna a thlen phah hial \hin. Sam ziaktu chuan,”Ngai teh,
nangmah hlata awm chu an boral dawn si a”, tiin a lo sawi a. Pathian min hnaih tir
thei lo tu thil chi hrang hrang a lo thlen apianga, tun lai \awng taka,”Kal mai teh”, lo ti
theitu apiang chu Pathianin a hnaih mai \hin a lo ni. Pathian hnaih duhlo a, tlansan
ngat ngat \hinte hian kan tlansan hlen thei tak tak dawn lo. Pathian hi tlansana,
kalbosana bihruksan deuh vang vang leh a ni pawn min hmu vaklo angah pawh kan lo
ngai a ni mai thei. Pathian hian min hmu zui zel a, hmun biru tak tak thlengin tlansan
tum mah ila, min hmu zui zel a ni.

Jona kha Pathian tlanbo san a tum a, a tlanbo na lamah nghapuiin a dawlh a, ni thum
leh zan thum nghapui kawchhunga a awm a, a rawn chhuah leh khan a hriat leh hmuh
hmasak ber chu Pathian bawk a ni. Pathian hian a hnen thleng theihna tur leh hnaih
theihna turin hun \ha min la pe a ni tih i hre thar leh ang u. Bosan tumin tlan tlan mah
ila, thlanmuala kan luh thleng rawk khawpin tlan mah ila, Jona ang tho hian thlanmual
piah chiahah kan thawhleh rualin kan chhungte kal hmasa kan pi leh pu te, nu leh pa
te, unaute nilovin, Pathian bawk kan tawk leh hmasa ber dawn a ni. Tlanbo ngaihna a
awm tawh dawn lo. Ninevi khuaa Jona a va kir a, Pathian thu a va sawi leh ang kha
kan ni ve tawh dawn lo. Khawvela kira Pathian thu zuk awih tharna ‘chance’ a awm
tawh dawn lo. Kan chan tur chu ‘sorry’ tih chauh a ni.
Mimal tin ten kan nun dante in enlet in, tun ai hian Pathian hi hnaih leh zual i tum ang
u. ‘Pathian hnaih rawh, tichuan Ani’n a hnaih ang che’.

Lalpa’n a thu malsawm rawh se.

http://www.mizopcusa.net/articles/2015/1/1/pathian-hnaih-rawh-u