1

Karai Mungga hta Manoi Manat Let Rawt Jat Galu Kaba Wa Ga
Shakawn Kungdawn 1: 2-3 – Yehowa a tara hta awng nga nna, Shi a tara hpe shani shana myit mang
ai wa gaw, a nga ai. Dai wa gaw hka kau e hkai ai, shi a aten hta asi si nna, alap mung n nyip ai hpun
hte bung nga ai. Shi galaw ai yawng mayawng mung tai na ra ai.
Luka 8: 21 – Shi gaw shanhte hpe, Karai Kasang a mungga madat la nna hkan galaw ai ni gaw, ngai
nu, ngai nau ni rai nga ma ai, ngu nna htan mu ai.
Ga Hpaw: Mungga gaw Karai a power nan rai nna, dai mungga hpe hti ai, chye ai sha n-ga, dai
mungga hkum hku mungga hpe asak hkrung lam hta madat mara hkrang shapraw sak hkrung ai lam
gaw, mungga a power hte asak hkrung nga ai hpe shadan shadawng ai lam re. Dai zawn shadan
shadawng ai asak hkrung lam hta dai mungga a power majaw lam shagu hta rawt jat galu kaba wa lu
ai re.
1. Gumgun gumhpai nat ni a num htet ga hta Chyum laika du wa na lam, dai hpe hkan nang hkan
sa na lam tsun da ai re.
Sara Lahtaw Gam tsun ai- 1946 ning January shata 6 ya hta, Myitkyina mare, Shata Pru e
Mungkan Majan simsa ngwi pyaw padang manau kaba manau ai aten hta, Lahtaw ni a nawku kamhpa
ai gumgun gumhpai nat gumja kaba rai nga ai Ngaw Wa gaw, Jinghpaw amyu masha ni yawng jaw
jau nga ai gumgun guhpai nat gumja gumhpra kaba ni yawng hta grau nna, ningtawn myit su tai ya ai
wa rai nga ai. Ngaw Wa gaw, masha kaja hta shang nna, ga tsun ai gaw, “shu sha ni e; ya kaw nna
gaw, anhte nanhte shu sha ni a gumgun gumhpai rai nga ai nat ni gaw, n-gun lagaw n rawng saga ai,
anhte hpe gumgun gumhpai ngu nna hkum kam masa; aten aprat galai mat sai, sinna hkawng maga de
na hpraw tu laika galam ai ni du nna masha hpe hka hta dip lup ai ni du na mara ai, anhte gaw naw
yen mat na saga ai”1 ngu nna, myihtoi htoi tsun da ai hta chyum laika du wa na the dai hta manoi
manat asak hkrung na lam htet da ai re.
Rev. Kawn Sin Yawng mung, shi a Magam gun manga shi ning hpring labau laika hta ning nga ka da
wu ai. Mung Baw ga na nat myithoi Gahtau La ngu ai wa shali tsun ai, ngai shu ngai sha ni e hkum
kashung mu, lagaw lahpan pa, pungding gala ai ni, zaibru sumri rit, du magam gyit na masai da, wora
sinna hkawng maga na hkau gala wa sa hkap magam a jan naw amai sana sai, ngai gaw htaw hpri
kashu a chyinghka naw wa sin sana, ya bai pru ai myihtoi gaw Lala sum shi, La Tu Sum shai, shakau
dumsa shaman dumsa sha arai sana, ngai naw wa sai nga shali aga htet da ai da. Dai gaw sinna de na
sasana sara/ma ni du nna Hkristan chyum laika hte woi awn na ra ai. Dai ni chyum laika hte woi awn
ai hpe hkan u ngu htet da ai ga rai nga ai.
2. Dr. Ola Hanson a Numhtet ga hta Chyum laika a matsun maroi ga hku hkan nang hkan sa jang
galu kaba wa na lam htet da ai re.
1927 ning March shata 25-28 e galaw ai Ja Jubeli zuhpawng hpaw mungga hta Ola Hanson
tsun ai gaw, “Jinghpaw amyu ni gaw Karai Kasang a galu kaba ai amying ningsang hpe chye timung,
Shi hpe nawku na hte Shi a tara hpe hkan na n chye ma ai. Ndai aprat hta shi a tara pru sai. Kam sham
nna dai tara hpe hta la ai ni, htunghking nnan hkan ai majaw, lam shagu hta chye chyang wa na mara
ai. Dai gaw Jinghpaw amyu ni a galu kaba wa na npawt nhpang majing rai nga ai law” 2 ngu htet da ai
re. Dai gaw Chyum laika mungga hpe hkan nang hkan sa asak hkrung jang lam shagu hta rawt jat galu
kaba wa na, ngu nna htet da ai numhtet ga re.
3. Chyum laika na matsun ga n kau mi.
(A) Shakawn kungdawn laika daw kaba 1 hta tara nlang ai ni a bawng ai hku hta n hkawm; yubak kap
ai ni a lam e n tsap, jahpoi ai ni a hpawng hta dung lawm ai ni hten bya hkrum na. Nbung e shapoi ai
mahkaw hte bung na. Jahtum e hten mat na ra ai ngu tsun da nga ai.

1 Lahtaw Gam, Jinghpaw Wunpawng Sha Ni A Nawku Htung Prat Ladaw Masum (Myitkyina: Hanson Memorial
Press, 1994), p. 20.
2 Sut Nau, Ja hte Lungseng Jubeli Laika ( Myitkyina: Hanson Memorial Press, 1977)P.12.
 2

Yehowa a tara hta awng nga nna, Shi a tara hpe shani shana myit mang ai wa gaw, a nga ai
Dai wa gaw hka kau e hkai ai, shi a aten hta asi si nna, alap mung n nyip ai hpun hte bung nga ai; shi
galaw ai lam yawng mayawng mung tai na ra ai. Kaning rai nme law, dinghpring ai ni a lam hpe
Yehowa chye nga ai; Tara n lang ai ni a lam chyawm gaw, hten mat na ra ai ngu tsun da ai re.
Shakawn kungdawn 1 na ga gaw, num htet ga hte ga sadi re. N tara ai ni gaw dagam dala hkrum nna
hten byak mat na ngu ai numhtet ga hte; Yehowa a tara hta awng nga ai (dinghpring ai ni) lam shagu
hta rawt jat galu kaba wa na ngu ai ga sadi re.
Dai ni mungkan hta Karai Kasnang a mungga tara hta n tsap ai masha hte dai hta tsap ai
masha hpan lahkawng nga ai ngu tsun lu ga ai. Hten bya lam hta asak hkrung ai masha hte chyeju lam
hta sak hkrung ai masha ngu nna amyu lahkawng garan da nga ai. Karai Kasang gaw, Yehowa a tara
hta awng nga nna, Shi a tara hpe shani shana myit mang ai wa tai nna, asak hte hpring tsup ai chyeju
lu la ai ni tai nga shangun mayu ai re.
(B) Noah a lam hpe yu ai shaloi, mungkan masha ni htenbya lam, wang lu wang lang pyaw daw
kadaw ai lam hkan tim, shi gaw Karai Kasang a lam hkan ai. Karai Kasang matsun ai hpe hkan nang
hkan sa ai. Sang hpaw li hpe salu salat hte, hki ba let, n-gun da ting nna gaw gap ai. Kaga masha ni a
jahpoi asawng ai, jahte tam ai, mana shadu ai, jahten sharun ai lam ni hkrum tim, shingra tara masa
hku yu yang shau ing na zawn n san tim, Karai Kasang a ga hpe madat ai. Shi n ta masha ni hpe Karai
Kasang a ga madat na matu lam woi ai. Jahtum e mau hpa chyeju hkam la lu ai dinghku tai wa ai re.
Abraham, Yaku, Yawsep ni a lam hpe yu tim dai zawn sha re.
(C) Luka laika 5:4-9 hta Genesaret nawng, Yesu gaw Simun a li hta shang dung nna shawa masha hpe
sharin shaga ngut jang, Simun hpe hka sung ai shara de naw sit nna, nga ja na matu nanhte a sumgawn
hpe jahkrat mu, ngu nna tsun wu ai re. Simun gaw, Madu e, mana tup anhte shakut ga ti mung, hpa
mung n lu gaw ai, rai ti mung na a ga majaw, ngai sumgawn jahkrat na we ai, ngu nna htan wu ai.
Shingrai jahkrat jang, shanhte gaw nga wunawng kaba magawn hkrup lu ma ai; shanhte a sumgawn ni
mung je wa malu ai rai nna, li kaga hta nga ai manang ni hpe sa karum la na, dingsi shaga mu ai.
Shanhte mung sa ma ai rai nna, dai li lahkawng yan lup wa magang hkra, bang jahpring mu ai. Simun
Petru gaw dai mu jang, Yesu a lahput nhpang e dingnyawm nna, Madu e, ngai kaw na wa mat u; ngai
gaw yubak kap ai masha rai nga, nngai ngu wu ai. Kaning rai nme law, shing rai nga magawn la lu ai
majaw, shi mung, shi kaw hkan nang ai ni nlang hte mung, mau mahka mat ma ai.
Ndai kaw mung, Simun Yesu a ga hpe madat nna hka sung de sumgawn jahkrat ai shaloi, nga
wunawng wuwa hpe mau hpa hku hkam la lu ai re. Shana tup shakut nna nga hkan tim n lu ai, shingra
tara masa hku yu yang hka sung ai de sumgawn bai sa hkrat tim nga lu na zawn n san ai. Rai ti mung,
Yesu a ga hpe madat dat ai shaloi lak lai ai chyeju hkam la lu ai. Dai ni anhte a prat hta mung, lai wa
sai aten hta kade shakut tim hpa n lu ai aten nga mai ai. Rai tim Yesu a ga hta manoi nna shakut jang
mau hpa chyeju hkam la lu na ga ai. Shingra tara masa hku yu yang hpa n mai byin na zawn san tim,
Yesu a ga hta manoi let asak hkrung lam gaw gap jang lak lai ai shaman chyeju ni hkam la lu na ga ai.

Ga Hpungdim: Mungga hta asak rawng ai, n htoi rawng ai, ningan hpan shalat ai atsam rawng ai re.
Mungga hpe chye ai ni, madat hkam la ai ni, hti ai ni sha n rai, madat mara hkan nang hkan sa ai ni tai
ga. Shaloi Asak hte hpring tsup ai ni, n htoi a kashu kasha ni, ningnan hpan shalat ya ai chyeju hta nga
pra sak hkrung lu ai ni tai na ga ai law.