saptadaśo vilāsaḥ

pauraścaraṇikaḥ
namo bhagavate vāsudevāya

kasmāccid-āśrayādyasya prodyad-bhakti-vilāsataḥ |
dīno’pi rañjayed viśvaṁ taṁ śrī-caitanyam āśraye ||1||

idānīṁ puraścaraṇaṁ likhiṣyan tatra sarva-śakti-vihīnasyāpy ātmano bhagavati bhakti-

prayantābhāsenāpi jagad-rañjakatām api sambhāvya taṁ śaraṇaṁ yāti—kasmāccid iti | yasya śrī-
caitanyasya kasmāccid apy āśrayāt prapatter yaḥ prakarṣeṇa udyan udayaṁ prāpnuvan bhakter
vilāsas tena dīnaḥ sarva-śakti-rahito’pi jano viśvaṁ jagad api rañjayet | tam āśraye śaraṇatvena
prapadye ||1||

pratyahaṁ pratipakṣaṁ ca pratimāsam api kramāt |

vilikhya kṛtyam adhunā kādācitkaṁ vilikhyate ||2||

evam abhīṣṭa-susiddhaye parama-guruṁ bhagavantam āśritya idānīṁ vilāsa-catuṣkeṇa lekhyaṁ

pratijānīte—pratyaham iti | pratyahaṁ yat kṛtyaṁ pratipakṣaṁ ca yat kṛtyaṁ, pratimāsam api yat
kṛtyaṁ, tat kramāt yathākramaṁ vilikhyādhunā kādācitkaṁ kadācit karaṇīyaṁ kṛtyaṁ karma
likhyate ||2||

atha puraścaraṇam

śrī-guror mantram āsādya puraścaraṇa-karmaṇi |

dīkṣāṁ kṛtvā punas tenānujñātaḥ prārabheta tat ||3||

śrī-guroḥ sakāśāt puraścaraṇa-karmaṇi nimitte punar dīkṣāṁ kṛtvā tena śrī-guruṇānujñātaḥ san tat
puraścaraṇa-karma-prakarṣeṇārabheta | tathā ca krama-dīpikāyām (5.1)—
caitre kṛtvaitan māsi karmāccha-pakṣe
puṇya-rkṣe bhūyo deśikāt prāpya dīkṣām |
tenānujñātaḥ pūrva-sevāṁ dvitīye
māsi dvādaśyām ārabhetāmalāyām || iti ||3||

atha puraścaraṇāvaśyakatā

āgame—
vinā yena na siddhaḥ syān mantro varṣa-śatair api |
kṛtena yena labhate sādhako vāñchitaṁ phalam ||4||

yena puraścaraṇena ||4||

puraścaraṇa-sampanno mantro hi phala-dāyakaḥ |

ataḥ puraskriyāṁ kuryān mantravit siddhi-kāṅkṣayā ||5||
 kiṁ homaiḥ kiṁ japaiś caiva kiṁ mantrāyāsa-vistaraiḥ |
rahasyānāṁ hi mantrāṇāṁ yadi na syāt puraskriyā ||6||

mantreṣu āyāsa-vistarair anyair api bahula-śramaiḥ kim ? ||6||

puraskriyā hi mantrāṇāṁ pradhānaṁ vīryam ucyate |

vīrya-hīno yathā dehī sarva-karmasu na kṣamaḥ |
puraścaraṇa-hīno hi tathā mantraḥ prakīrtitaḥ ||7||

vīryaṁ śaktiḥ | bījam iti pāṭhe kāraṇaṁ mūlam ity arthaḥ ||7||

atha puraścaraṇa-māhātmyam

agastya-saṁhitāyām—
saṁsāre duḥkha-bhūyiṣṭhe ya icchet sukham ātmanaḥ |
pañcāṅgopāsanenaiva rāmaṁ bhajatu bhaktitaḥ ||8||
pañcāṅgopāsanaṁ bhaktaiḥ puraścaraṇam ucyate |
etad dhi viduṣāṁ śreṣṭhan saṁsāra-ccheda-kāraṇam ||9||

viduṣāṁ śreṣṭha he sutīkṣṇa ||9||

nānena sadṛśo dharmo nānena sadṛśaṁ tapaḥ |

nānena sādhanaṁ kiñcid iṣṭārthasya tapodhana ||10||

anena puraścaraṇena ||10||

pūjā traikālikī nityaṁ japas tarpaṇam eva ca |

homo brāhmaṇa-bhuktiś ca puraścaraṇam ucyate ||11||

pañcāṅgopāsanam eva viśiṣyāha pūjeti ||11||

guror labdhasya mantrasya prasādena yathāvidhi |

pañcāṅgopāsanaṁ siddhyai puraś caitad vidhīyate ||12||

pañcāṅopāsanasyāsya puraścaraṇam iti nāma nirvakti—guror iti | guroḥ prasādena labdhasya

mantrasya etat-pañcāṅgopāsanaṁ puraḥ prathamaṁ vidhīyata iti puraścaraṇam ucyata iti
pūrveṇaivānvayaḥ | prasanneneti pāṭhe prasanna-cittena satā vidhīyate | yad vā, bhāve kta-
pratyayaḥ | arthaḥ pūrvavad eva ||12||

niṣkāmāṇām anenaiva sākṣātkāro bhaviṣyati |

artha-siddhiḥ sakāmānāṁ sarvā vai bhaktim ālabhet ||13||
pañcāṅgam etat kurvīta yaḥ puraścaraṇaṁ budhaḥ |
sa vai vijayate loke vidyaiśvarya-sutādibhiḥ ||14||

vidyādibhir loke vijayate paramotkṛṣṭā bhavati ||14||

krama-dīpikāyām (3.60)—
ya imaṁ bhajate vidhiṁ naro
 bhavitāsau dayitaḥ śarīriṇām |
api vāk-kamalaika-mandiraṁ
paramaṁ te samupaiti tan-mahaḥ ||15|| iti |

vidhiṁ vidhānaṁ puraścaraṇa-lakṣaṇam | acirāt śīghraṁ kamalāyāḥ sarva-sampatter ekaṁ

mukhyaṁ mandiraṁ ca bhājanaṁ bhavati | api vāk-kamalaika-mandiram iti pāṭhāntare vācaḥ
sarasvatyāḥ kamalāyāś caika-mandiram api bhavati ||15||

gopālopāsanā-grantha-sāra-śrī-krama-dīpikām |
prāyo’nusṛtya likhyeta pauraścaraṇiko vidhiḥ ||16||

tatra ca bahu-vidheṣu puraścaraṇa-vidhiṣu madhye krama-dīpikoktānusāreṇa puraścaraṇa-vidhi-

likhanaṁ pratijānīte—gopāleti | gopālopāsanāyā grantheṣu madhye sāraṁ śreṣṭha-bhūtā yā
śrīmatī krama-dīpikā tām anusṛtya tatroktānusāreṇety arthaḥ | prāyo bāhulyeneti tat-tad-viśeṣa-
jñānādy-artham anyākara-granthoktam api kiṁcid anusṛtya lekhyam ity arthaḥ ||16||

atha tatra sthāna-niyamaḥ

giri-śṛṅgaṁ sarit-tīraṁ bilva-mūlaṁ jalāntaram |

goṣṭhaṁ viṣṇv-ālayo’śvattha-talaṁ vāthāmbudhes taṭam ||17||

jalasya antaraṁ madhyam ||17||

kvacic ca—
puṇya-kṣetraṁ nadī-tīraṁ guhā-parvata-mastakam |
puṇya-pradeśa-sindhūnāṁ saṅgamaḥ pāvanaṁ vanam ||18||
udyānāni viviktāni bilva-mūlaṁ taṭaṁ gireḥ |
tulasī-kānanaṁ goṣṭhaṁ vṛṣa-śūnyaḥ śivālayaḥ ||19||
aśvatthāmalakī-mūlaṁ go-śālā-jala-madhyataḥ |
devatāyatanaṁ kūlaṁ samudrasya nijaṁ gṛham ||20||

aśvatthasya āmalakyāś ca mūlam ||20||

gurūṇāṁ saṁnidhānaṁ ca cittaikāgrya-sthalaṁ tathā |

preta-bhūmyādikaṁ caiva tat-tat-kalpa-prakāśitam |
eṣām anyatama-sthānam āśritya japam ācaret ||21||

tasya tasya mantra-sādhanasya kalpena kalpākhyena śāstreṇa prakāśitam, eṣāṁ madhye

anyatamam ekam ||21||

anyatra ca—
samudragāyāḥ saritaḥ saṅgamaḥ pāpa-nāśanaḥ |
paścimābhimukhaṁ liṅgaṁ purāṇoktaṁ svayambhuvam ||22||
sarvotkṛṣṭaṁ mahā-viṣṇoḥ sthānaṁ cānyat manoramam |
gṛhaṁ vā śuci saṁskāra-svabhāvābhyāṁ prasiddhikṛt ||23||

śuci pavitraṁ gṛhaṁ vā, satkāreṇa sthānādi-śodhanena svabhāvena ca nija-śauśīlyena, prakṛṣṭāṁ

siddhiṁ karotīti tathā | etac ca sarveṣām eva viśeṣaṇam ||23|
 atha sthāna-viśeṣe phala-viśeṣaḥ

uktaṁ ca śrī-yājñavalkyena—
gṛhe tv eka-guṇaṁ japyaṁ nadyāṁ tu dviguṇaṁ smṛtam |
gavāṁ goṣṭhe daśa-guṇaṁ agnyāgāre daśādhikam ||24||

japyaṁ japo japa-phalaṁ vā ||24||

siddha-kṣetreṣu tīrtheṣu devatānāṁ ca saṁnidhau |

sahasraṁ śata-koṭīnām anantaṁ viṣṇu-saṁnidhau ||25||

devatānāṁ śrī-rudrādīnām ||25||

atha tatra bhūmi-parigrahaḥ

śubhe dine ca saṅkalpya sva-vihārādi-hetave |

krośam ekam ubhau vā tau sva-kṣetraṁ parikalpayet ||26||

ādi-śabdena āhārādi-ceṣṭā | tau krośau vyāpya ||26||

kṣīra-vṛkṣa-bhavān aṣṭa kīlakān dvādaśāṅgulān |

daśa-kṛtvo’stra-mantreṇa pratyekam abhimantrayet ||27||
tato’bhyarcyāṣṭa-dik-pālān kṣetra-pālaṁ ca madhyataḥ |
baliṁ dattvā ca nikhanet kīlakān aṣṭa-dikṣu tān ||28||

tathā ca āgame—
grāme krośa-mitaṁ sthānaṁ nadyādau svecchayā mitam |
nagarādāv atha krośaṁ krośa-yugmam athāpi vā |
āhārādi-vihārārthaṁ tāvatīṁ bhūmim ākramet ||29||
kṣīri-vṛkṣodbhavān kīlān astra-mantrābhimantritān |
nikhaned daśa-dig-bhāge teṣv astraṁ ca prapūjayet ||30||
kṣetre ca kīlite mantrī na vighnaiḥ paribhūyate |
kṣetra-pālādikaṁ tatra pūjayed vidhivat tataḥ ||31||
dik-patibhyo baliṁ dattvā tataḥ kṣetraṁ samāśrayet |
kṣetra-madhyaṁ samāśritya kūrma-cakraṁ vicintayet ||32||

kiṁ ca—
kūrma-cakreṇa saṁśodhya dīpa-sthāne kuṭīṁ śrayet |
caturasra-catur-hastāṁ hastonnata-suvedikām ||33||

kuṭīṁ viśinaṣṭi—caturasreti sārdhena ||33||

candrātapa-patākābhyāṁ toraṇair apy alaṅkṛtām |

viviktām abhiliptāṁ ca prākāreṇābhiveṣṭitām ||34|| iti |
 atha kūrma-cakram

tad uktam—
vartulaṁ nava-koṣṭhaṁ tat kṛtvā kūrmākṛtiṁ likhet |
kūrmasyāṅgāni cāṣṭau syur mukhaṁ hastau ca pārśvakau |
pādau puccham iti proktaṁ praśastaṁ mukham eva tu ||35||

yathā kūrmasyāṅgāni, tathātrāṣṭa-koṣṭhānīty evaṁ kūrmākṛtitve hetum āha—kūrmasyeti ||35||

svara-dvandvaṁ kramād dikṣu pūrvādiṣv aṣṭasu nyaset |

tathā kādīn sapta-vargān nyasec chiva-diśaṁ vinā ||36||

svarāṇām ākārādīnāṁ ṣoḍaśānāṁ dvandvaṁ a-ā-ity evam aṣṭa-yugalaṁ pūrvādiṣu aṣṭasu dikṣu
tatratya-koṣṭheṣu nyaset | kādayaḥ pañca-vargāḥ | yādayo’ntya-sthā eko vargaḥ | śādaya uṣmāṇaś
caiko vargaḥ | eva sapta-vargān nyaset | śiva-diśaṁ vineti—aiśanyāṁ na kiṁcin nyased ity arthaḥ
||36||

grāma-nāmādya-varṇas tu yasyāṁ diśi ca tiṣṭhati |

tatra kūrma-mukhaṁ jñeyam anyāṅgānītaratra ca ||37||

grāma-śabdena kṛtya-japa-kṣetraṁ tasya yan nāma mathurādi tasyādyo varṇaḥ ma-kārādir ity
arthaḥ | tathā ca śāradā-tilake—
caturasrāṁ bhuvaṁ bhittvā koṣṭhānāṁ narakaṁ likhet |
pūrva-koṣṭhādi vilikhet sapta-vargān anukramāt ||
lakṣam īśe madhya-koṣṭhe svara-yugmaṁ kramāl likhet |
dikṣu pūrvādito yatra kṣetrākhyādyākṣaraṁ sthitam |
mukhaṁ tat tasya jānīyāt iti ||37||

kvacic ca—
svara-yugmaṁ krameṇaiva aindrādy aṣṭasu dikṣu ca |
kādīn vargān kṣamaiśānyān tathā madhya-sthalādhipam ||38||

keṣāṁcin mate kṣetrādhipasya nāmādyākṣaram iti matāntaraṁ darśayan hastādi-vibhāgaṁ tat-tat-

phalādikaṁ ca likhati svara-yugmam iti pañcabhiḥ | kādīṁś ca vargān krameṇaivendrādy-aṣṭa-
dikṣu likhet | kṣa-kāraṁ ca aiśanyāṁ diśi | sthalādhipañcādhiṣṭhātāraṁ madhye koṣṭhe likhet ||38||

tan-nāmādyākṣaraṁ yatra kūrmāsyaṁ tac ca dīpakam |

tat-pārśva-koṣṭhau hastau dvāv adho’dhaḥ kukṣi-pādakau ||39||

tasya sthādhipasya yan nāma, tad-ādyākṣaram yat syāt tat kūrmasyāsyaṁ, tac ca dīpakaṁ dīpa-
sthānam ity arthaḥ | tathā coktam—
yugmaṁ svarāṇāṁ kramato vilikhya
kādīṁś ca vargān kramataḥ kṣamīśe |
sthānādhipasyākṣaram asti yan na
taṁ dīpadeśaṁ munayo vadanti || iti ||39||

śeṣa-koṣṭhaṁ bhavet pucchaṁ mukhe siddhir anuttamā |

kara-sthāne mahā-kleśaḥ kukṣau duḥkham avāpnuyāt ||40||
pāde hānis tathā pucche pīḍā syād bandhanāni ca |
 dīpa-sthāne japaḥ kāryaḥ sarva-kāryam abhīpsubhiḥ ||41||
kūrma-vakram avijñāya yaḥ kuryāj japa-saṁjñakam |
tasya japya-phalaṁ nāsti sarvārathāya kalpate ||42||

atha bhakṣya-niyamaḥ

tantre—
śākaṁ mūlaṁ phalaṁ vāpi gavyaṁ kṣīraṁ ca vā dadhi |
sādhubhyo bhakṣyam annaṁ vā śaktavaḥ pāyasaṁ hi vā ||43||

śaktavo yava-nirmitā jñeyāḥ | tathā ca śāradā-tilake—

bhaikṣyaṁ haviṣyaṁ śākāni vihitāni phalaṁ payaḥ |
mūlaṁ śaktur yavotpanno bhakṣyāṇy etāni mantriṇām || iti |

kvacic ca—
vaidikācāra-yuktānāṁ śucīnāṁ śrīmatāṁ satām |
sat-kula-sthāna-jātānāṁ bhikṣā-śīlo’gra-janmanām ||44||
bhuñjāno vā haviṣyānnaṁ śākaṁ yāvakam eva vā |
payo mūlaṁ phalaṁ vāpi yad yad yatropapadyate ||45||

uktānāṁ madhye yad-yad-dravyam anāyāsena yatropapadyate | tad eva vā bhuñjānaḥ ||45||

nārada-pañcarātre—
mṛdu koṣṇaṁ supakvaṁ ca kuryād vai laghu-bhojanam |
nendriyāṇāṁ yathā vṛddhis tathā bhuñjīta sādhakaḥ ||46||

kiṁ ca—
brahma-patre cabhuñjīta madhya-patra-vivarjite |
dakṣaṁ brahmottaraṁ viṣṇur madhya-patraṁ maheśvaraḥ ||47||

brahma palāśa-vṛkṣas tasya patre | patreṣv iti pāṭhe madhya-patraṁ vivarjayed iti pāṭhaḥ | dakṣaṁ
dakṣiṇa-patram | uttaraṁ vāma-patram ||47||

athāvaśya-varjyāni

saṁhitāsu—
madhu māṁsaṁ tathā kṣāra-lavaṇaṁ tailam eva ca |
svinnaṁ paryuṣitaṁ caiva niḥsnehaṁ kīṭa-dūṣitam ||48||
kāñjikaṁ gṛñjanaṁ bilvaṁ kalañjaṁ laśunam bisam |
masūraṁ kodravaṁ māṣaṁ maṇḍukaṁ caṇakādikam |
tāmbūlaṁ kāṁsya-pātraṁ ca divābhojanam eva ca ||49||

niḥsnehaṁ rukṣam ||48|| viṣam iti mūrdhany anta-pāṭhe auṣadhādi-prayuktam api | ādi-śabdena
rāja-māṣādi ||49||

kiṁ ca—
 asat-saṅgaṁ parānnaṁ ca varjayed anya-pūjanam |
vinā karmocitaṁ nityam atha naimittikaṁ caret ||50||

ucitaṁ nija-varṇāśrama-yogyaṁ | nityaṁ naimittakaṁ ca yat karma | tad vinānyat kāmyaṁ

varjayed ity arthaḥ ||50||

strī-śūdra-patita-vrātya-nāstikocchiṣṭa-bhāṣaṇam |
asatya-bhāṣaṇaṁ jaihmya-bhāṣaṇaṁ ca parityajet ||51||
satyenāpi na bhāṣeta japa-homārcanādiṣu |
varjayed gīta-vādyādi-śravaṇaṁ nṛtya-darśanam ||52||
abhyaṅgaṁ gandha-lepaṁ ca puṣpa-dhāraṇam eva ca |
maithunaṁ tat-kathālāpaṁ tad-goṣṭhīṁ parivarjayet ||53||
āsnātāṁś ca dvijān śūdrān striyo naiva spṛśet tathā |
tyajed uṣṇodaka-snānam anivedita-bhojanam ||54||

kiṁ ca—
vihāya vahniṁ na hi vastu kiñcid
grāhyaṁ parebhyaḥ sati sambhave ca |
asambhave tīrtha-bahir-viśuddhāt
parvātirikte pratigṛhya japyāt ||55||

tatrāsamartho’nudinaṁ viśuddhād
yācate yāvad dina-mātra-bhakṣyam |
gṛhṇāti rāgād adhikaṁ na siddhiḥ
prajāyate kalpa-śatair amuṣya ||56||

atha kṛtyāni

vaiśampāyana-saṁhitāyām—
snānaṁ trisavanaṁ proktam aśaktau dviḥ sakṛt tathā |
asnātasya phalaṁ nāsti na vā tarpayataḥ pitṝn ||57||
śayīta darbha-śayyāyāṁ śuciḥ prayata-mānasaḥ |
tad-vāsaḥ kṣālayen nityam anyathā vighnam āvahet ||58||

tad-vāsaḥ śayana-vāsaḥ | yad vā, yena vāsasā japtaṁ tat ||58||

kiṁ cānyatra—
mantraṁ sādhayamānas tu trisandhyaṁ devam arcayet |
dvi-sandhyam eka-sandhyaṁ vā na mantraṁ kevalaṁ japet ||59||
eka-grāma-sthito nityaṁ gatvā vandeta svaṁ gurum |
nityaṁ naimittikaṁ kuryāt saṅgamaṁ sādhubhiḥ sadā ||60||
snāyāc ca pañca-gavyena kevalāmalakena vā |
śruti-smṛti-purāṇokta-mantraiḥ snāyād anantaram ||61||

kiṁ ca—
grāsa-dānādinā kurvan gavāṁ śuśrūṣaṇaṁ sadā |
 bhūtānukampī prajapet śubhra-padmākṣa-mālayā ||62||
pañca-viṁśati-bārāṁś ca prajaptena sva-mantrataḥ |
śirombhasābhiṣiñcet triḥ snāna-kāle nijaṁ budhaḥ ||63||

pañcaviṁśati-vārān sva-mantrato nija-mantreṇa japtam abhimantritaṁ yad-ambho jalaṁ tena

nija-śiro vāra-trayam abhiṣiñcet ||63||

tathaivācamanaṁ kuryād bhojanāvasare’pi ca |

annaṁ ca sapta-kṛtvas tan-mantra-japtaṁ hi bhakṣayet ||64||

tathaiveti | pañcaviṁśati-vāra-sva-mantra-japtena jalena snāna-kāle bhojana-kāle cācamanaṁ

kuryād ity arthaḥ | tena svakīyena mantreṇa japtam | tathā ca krama-dīpikāyām (5.4)—
kurvann ātmīyaṁ karma varṇāśrama-sthaṁ
mantraṁ japtvā triḥ snāna-kāle’bhiṣiñcet |
ācāman pāthas-tattva-saṅkhyā-prajaptaṁ
bhuñjānaś cānnaṁ sapta-japtāñcanādi || iti ||64||

yasya deve ca mantre ca gurau triṣv api niścalā

na vyavacchidyate buddhis tasya siddhir adūrataḥ ||65||
mantrātmā devatā jñeyā devatā guru-rūpiṇī
teṣāṁ bhedo na kartavyo yadīcched iṣṭam ātmanaḥ ||66||

na vyavacchidyate na bhidyate ||65|| mantrātmā mantrātmikā ||66||

athāsana-niyamaḥ

sarva-siddhyai vyāghra-carma jñāna-siddhyai mṛgājinam |

vastrāsanaṁ roga-haraṁ vetrajaṁ śrī-vivardhanam |
kauśeyaṁ pauṣṭikaṁ proktaṁ kambalaṁ duḥkha-mocanam ||67||
abhicāre kṛṣṇa-vastraṁ raktaṁ vaśyādi-karmaṇi |
śāntike dhavalaṁ proktaṁ vicitraṁ sarva-karmasu ||68||

karma-viśeṣe vastrādīnāṁ varṇa-viśeṣaṁ likhati—abhicāra iti | vicitraṁ vividha-varṇam ||68||

kiṁ ca—
kuśājināmbareṇāḍhyaṁ caturasraṁ samantataḥ |
eka-hastaṁ dvi-hastaṁ vā caturaṅgulam ucchritam ||69||

atha japa-mālā

vārāhe—
yas tu bhāgavato bhūtvā na gṛhṇāti gaṇitrikām |
āsurī tasya dīkṣā tu na sā dharmāya vidyate ||70||

gaṇyate’nayeti gaṇayitrikā japa-mālā, tām ||70||

gaṇitrikāṁ gṛhītvā yo mantraṁ cintayate budhaḥ |

janmāntara-sahasrāṇi cintito’haṁ ca tena vai |
māṅgalyā kuśalā siddhā sarva-saṁsāra-mokṣanī ||71||
tenāhaṁ cintito bhavāmi, siddho siddha-karīty arthaḥ ||71||

atha mālā-maṇi-nirṇayas tat-parimāṇādi ca

tatraiva—
parimāṇaṁ tu vakṣyāmi śṛṇu tattvena mādhavi |
uttamā madhyamā caiva kanyasī tu gaṇitrikā ||72||

mādhavi he dharaṇi ! kanyasī kanīyasī ||72||

aṣṭottara-śataiḥ pūrvā pañcāśadbhis tu madhyamā |

kanyasī pañca-viṁśatyā parimāṇaṁ vidhīyate ||73||

aṣṭottara-śata-maṇibhiḥ pūrvā uttamā ||73||

rudrākṣaiś cottamāṁ tāṁ ca putra-jīvaiś ca madhyamām |

kuśaiḥ kanīyasīṁ vidyād etat te kathitaṁ mayā ||74||

tatrāpi maṇi-bhedena trividhatvam āha—rudrākṣair iti | putraṁjīvair iti sānunāsikaṁ ca kvacit ||

74||

śrī-nārada-pañcarātre—
aṣṭottara-śataṁ pūrṇaṁ tad ardhaṁ padam eva vā |
kuryāt tatra vidhānoktaṁ vidhinā sarva-karmasu ||75||

hārīta-smṛtau—
śaṅkha-rūpya-mayī mālā kāñcanī nīrajotpalaiḥ |
padmākṣaiś cāpi rudrākṣair vidrumair maṇi-mauktikaiḥ ||76||

nīrajāni padmāni | utpalāni ca kumudāni, taiḥ | tathā coktaṁ—

rudrākṣa-śaṅkha-padmākṣa-putrajīvaka-mauktikaiḥ |
sphaṭikair maṇiratnaiś ca sauvarṇair vidrumais tathā ||
kuśaiḥ padmair dvādaśa syur gṛhasthasyākṣa-mālikā || iti ||76||

nirmitendrākṣakair mālā tathaivāṅguli-parvabhiḥ |

putra-jīva-mayī mālā sā śastā japa-karmaṇi ||77||

gautamīye—
athāmalaka-sambhūtais tulasī-kāṣṭha-nirmitaiḥ ||78|| iti |

āgame ca—
ādikṣāntārṇa-yogatvād akṣamāleti kīrtitā |
tad-dharṇa-saṅkhyair maṇibhir japa-mālāṁ prakalpayet ||79||

ādikṣāntānām a-kārādi-ksa-kārāvasānānāṁ arṇānāṁ mātṛkā-varṇānāṁ yogatvāt niyojanīyatvāt

gaṇanīyatvād vā | tad-varṇa-saṅkhyaiḥ pañcāśadbhir ity arthaḥ | kṣa-kārasya merutvena
kalpanīyatvāt ||79||
 kiṁ ca—
anuloma-vilomārṇair mātṛkāyāḥ sa-bindukaiḥ |
kṣamerukaiḥ kāṣṭavargair mālā syād yogināṁ śubhā ||80||

mukhyatamām akṣamālām āha—anulometi ||80||

atha mālānāṁ maṇi-viśeṣeṇa vaiśiṣṭhyam

āgneye—
hiraṇya-śaṅkha-maṇibhir japyaṁ śata-guṇaṁ bhavet |
sahasra-guṇam indrākṣaiḥ padmākṣair ayutaṁ bhavet ||81||

hiraṇya-śaṅkhayor maṇibhir japyaṁ japa ity arthaḥ ||81||

niyutaṁ cāpi rudrākṣair bhadrākṣaiś ca na saṁśayaḥ |

puttra-jīvaka-japyasya parisaṅkhyā na vidyate ||82||

bhadrākṣair iti rudrākṣa-viśeṣaṇaṁ phala-viśeṣair vā ||82||

śiva-purāṇe—
aṅgulyā parisaṅkhyānam evam evam udāhṛtam |
rekhayāṣṭa-guṇaṁ vidyāt puttrajīvair daśādhikam ||83||

rekhayā rekhāntaritāṅguli-parvaṇety arthaḥ | bhūmi-likhitāṅkena vā | aṅgulībhir japasya

saṅkhyānaṁ gaṇanam ||83||

śataṁ syāc chaṅkha-maṇibhiḥ pravālaiś ca sahasrakam |

sphāṭikair daśa-sāhasraṁ mauktikair lakṣam ucyate ||84||
padmākṣair daśalakṣaṁ tu rājateḥ koṭir ucyate |
sauvarṇaḥ sā daśaguṇā sarvair daśa-guṇā smṛtā ||85||

sā koṭir daśa-guṇā daśa-koṭaya ity arthaḥ | sarvaiḥ putrajīvādibhiḥ sauvarṇāntair daśa-guṇā daśa-
koṭi-guṇitā | yad vā, sauvarṇebhyo daśa-guṇeti daśa-koṭi-guṇeti jñeyam | evaṁ mata-bhedaś ca
mantra-bhedena kā#a-phalādibhedena ca | evam anyatrāpy ūhyam iti pūrva-likhitam eva ||85||

kuśa-granthyā ca rudrākṣair ananta-guṇitaṁ phalam |

śveta-padmākṣa-mālābhir api syād amitaṁ phalam |
mātṛkaṁ varṇa-sambhūta-mālāyāṁ tu tad eva hi ||86||

atha mālā-nirmāṇa-vidhiḥ

śivāgame—
mukhe mukhaṁ prakartavyaṁ mukhaṁ mūle vivarjayet |
dhātrī-phala-pramāṇena śreṣṭham etad udāhṛtam ||87||

etat mālāyā akṣam ||87||

 badarāṇḍa-pramāṇena gadyate madhyamādhame |
navatri-tantunā caitad grnathanīyam asaṁspṛśat |
ūrdhva-vaktraṁ ca merv-ākhyaṁ kartavyaṁ tan na laṅghayet ||88||

badarasyāṇḍaṁ bījaṁ tat-pramāṇena cety arthaḥ | kramān madhyamam adhamaṁ codāhṛtam |

pāṭhāntare—badara-phalasya tad-aṇḍasya ca pramāṇena kramān madhyamādhame gaṇite | navena
nūtanena, tri-tantunā triguṇīkṛta-sūtreṇety arthaḥ | yad vā, naveti nava-saṅkhyā-prāptena tantu-
trayeṇa prathamaṁ triguṇīkṛtya paścāc ca triguṇīkṛtya nava-guṇīkṛtena sūtreṇety arthaḥ |
triguṇaṁ triguṇīkṛtyety agre lekhyatvāt | asaṁspṛśat anyo’nyaṁ sparśam aprāpnuvat sat, etat
akṣaṁ granthanīyaṁ, pratyeka-madhye brahma-granthir viracanīya ity arthaḥ ||88||

śrī-nārada-pañcarātre ca—
akṣāsthimātrair maṇibhir jyaiṣṭhaṁ kuryāt vārtulam |
dhātrī-phalānāṁ garbheṇa pramāṇaṁ madhyamaṁ smṛtam |
vadarāsthi-pramāṇena kanyasaṁ samudāhṛtam ||89||

akṣaṁ rudrākṣaṁ vibhītakaṁ vā tad-asthi-pramāṇaiḥ | kanyasaṁ kanīyasaṁ ||89||

kiṁ ca—
granthi-bandhāvadhau tatra maṇi-saṅkhyādhikaṁ dvijāḥ |
meruṁ prakalpayen madhye ekena guṇakena tu ||90||

granthi-bandhasya vadhau ante |

śivāgame tatraiva rudrākṣān uddiśya—
eka-vaktrais trivaktraiś ca catur-vaktraiś ca pañcabhiḥ |
ṣaḍ-vaktrair vātha kartavyaṁ mitho miśrāṁs tu varjayet ||91||

kiṁ cānyatra—
kṛta-nitya-kriyaḥ śuddha ukteṣv akṣeṣu mantravit |
yathākāmaṁ yathālābham akṣāṇy ānīya yatnataḥ ||92||
anyonya-sama-rūpāṇi nātisthūla-kṛśāni ca |
kīṭādibhir aduṣṭāni ajīrṇāni navāni ca ||93||
granthais tu pañcabhis tāni prakṣālya tu pṛthak pṛthak |
tato dvijendra-puṇya-strī-nirmitaṁ granthi-varjitam ||94||
tri-guṇaṁ tri-guṇīkṛtya sūtraṁ prakṣālya pūrvavat |
śuklaṁ raktaṁ tathā kṛṣṇaṁ śānti-vaśyābhicārike ||95||
sūtraṁ saṁsthāpayed vidvān paṭṭa-sūtram athāpi vā |
aśvattha-patrair navakaiḥ padmākāreṇa kalpitaiḥ |
sūtraṁ maṇīṁś ca gandhādbhiḥ kṣālitāṁs tatra nikṣipet ||96||

navakair nūtanair aśvattha-patraiḥ sahitam | gandhādbhir aśvatthasya patrāṇy api kṣālayed ity
arthaḥ | tatra padmākāra-kalpitāśvattha-patreṣu ||96||

tāraṁ śaktiṁ mātṛkāṁ ca sūtre caiva maṇiṣv atha |

vinyasya pūjayed ādau juhuyāc caiva śaktitaḥ ||97||

tāraṁ praṇavam | śaktiṁ māyā-bījam ||97||

 homa-karmaṇy aśaktaś ced dviguṇaṁ japam ācaret |
maṇim ekaikam ādāya sūtre ca yojayet sudhīḥ ||98||
mukhe mukhaṁ tu saṁyojya pucche pucchaṁ tu yojayet |
go-puccha-sadṛśī kāryā yad vā sarpākṛtiḥ śubhā ||99||
tat-sajātīyam ekākṣaṁ merutvenāgrato nyaset |
ekaika-maṇi-madhye tu brahma-granthiṁ prakalpayet |
japa-mālāṁ vidhāyetthaṁ tat-saṁskārān samācaret ||100||

atha mālā-saṁskāraḥ

śivāgame—
kṣālayet sadyo-jātena vāma-devena gharṣayet |
dhūpayed apy aghoreṇa lepayet puruṣeṇa tu ||101||

kṣālayet pañca-gavyenottama-jalena ca prakṣālayet | tad uktaṁ—kṣālayet pañca-gavyena sadyo-

jātena sajjalaiḥ | iti | sadyojātādikaṁ prāyo mantrādya-varṇair mantra-nāma—oṁ sadyojātaṁ
prapadyāmi sadyojātāya vai namaḥ | bhave bhave nābhibhave bhajasva māṁ bhavodbhavāya
namaḥ | gharṣayec candanādibhiḥ | tathā coktaṁ—candanāguru-gandhādyair vāmadevena
gharṣayet | oṁ vāmadevāya namo jyeṣṭhāya namo rudrāya namaḥ kālāya namaḥ kala-vikaraṇāya
namo bala-vikaraṇāya namo balāya namo bala-pramathanāya namaḥ sarva-bhūta-damanāya namo
manonmanāya namaḥ | oṁ aghorebhyo’tha ghorebhyo ghora-ghoratarebhyaḥ sarvataḥ sarva-
sarvebhyo namas te astu rudra-rūpebhyaḥ śivebhyaḥ | lepayec candanādinā—oṁ tat-puruṣāya
vidmahe mahādevāya dhīmahi tan no rudraḥ pracodayāt ||101||

mantrayet pañcamenaiva pratyekaṁ tu śataṁ śatam |

meruṁ ca pañcamenaiva tathāghoreṇa mantrayet ||102||

pañcamaś cāyaṁ—oṁ īśānaḥ sarva-vidyānām īśvaraḥ | sarva-bhūtānāṁ brahmādhipatir

brahmaṇo’dhipatir brahmā śivo me’stu sadā-śivom iti | nanu mantreṇa dravyābhimantraṇasya
saṅkhyādi-niyamaḥ sarvatra śrūyate, tad atra kathaṁ mantrayed ity apekṣāyām āha—pratyekam
ekaika-maṇiṁ śataṁ śataṁ vārān mantrayed iti | kecic ca kṣālanādikam api tat-tan-mantreṇa
pratyekaṁ maṇiṁ śataṁ vārān kuryād ity āhuḥ | kecit tu sadyojātādi-mantrānām ekaikaṁ
mantraṁ kṣālanādi-karmaṇi vāra-śataṁ paṭhed iti vyācakṣate | atra ca yathā-sampradāyaṁ
vyakta-hartavyam iti dik ||102||

mudrāṣṭakaṁ darśayitvā pratyekaṁ pūjayet kramāt |

grathitaṁ pañcabhiḥ pūjya pūrvavac ca yathā-śiraḥ ||103||

mudrāṣṭakam āvāhanādikam | saṁskṛtyaiva budho mālāṁ tat-prāṇān sthāpayet tataḥ ity ukteḥ |
pūjā pūjayitvā yathā-śiraḥ mastaka-krameṇa grathitam | mālā ca prathamaṁ sva-guru-hastād eva
grāhyā | guruṁ sampūjya tad-dhastād gṛhṇīyāt sarva-siddhaye iti tantrokteḥ ||103||

atha mālā-bhedenādhikāri-bhedaḥ

nārada-pañcarātre—
kuśa-patrair japed vipraḥ suvarṇa-maṇibhir nṛpaḥ |
puttra-jīva-phalair vaiśyaḥ padmākṣaiḥ sarva eva ca ||104||
mokṣārthī pañcaviṁśatyā dhanārthī triṁśatā japet |
 puṣṭy-arthī spataviṁśatyā na pañcadaśabhiḥ kvacit ||105||
japasya gaṇanāṁ cāhuḥ padmākṣair bhakti-vardhanaiḥ |
athāṅgulībhir evāpi japam anvaham ācaret ||106||

bhakti-vardhanair iti bhagavad-bhakty-arthī padmākṣair japed ity arthaḥ ||106||

kiṁ cānyatra—
rudrākṣa-mālikā-sūtre japena sva-manorathān |
padmākṣair vihitā mālā śatrūṇāṁ nāśinī matā ||107||
kuśa-grantha-mayī mālā sarva-pāpa-vināśinī |
puttrajīva-phalaiḥ kḷptā kurute puttra-sampadaḥ ||108||

kḷptā racitā ||108||

nirmitā rūpya-maṇibhir japa-mālepsita-pradā |

hiraṇmayair viracitā mālā kāmān prayacchati ||109||
pravālair vihitā mālā prayaccet puṣkalaṁ dhanam |
saubhāgyaṁ sphāṭikī mālā mauktikair vihitā śriyam ||110||
nirmitā śaṅkha-maṇibhiḥ kurute kīrtim akṣayām |
sarvair etair viracitā mālā syān muktaye nṝṇām ||111||

kiṁ ca—
tulasī-kāṣṭha-ghaṭitair maṇibhir japa-mālikā |
sarva-karmāṇi sarveṣām īpsitārtha-phala-pradā ||112||

gautamīye—
puṇḍarīka-bhavā mālā gopāla-manu-siddhidā |
āmalakyā bhavā mālā sarva-siddhi-phala-pradā |
tulasī-sambhavā yā tu sā mokṣaṁ tanute’cirāt ||113||

atha japāṅguly-ādi-nirṇayaḥ

śivāgame—
anāmā-madhyamākramya japaṁ kuryāt tu mānasam |
madhyamāmadhyamākramya japaṁ kuryād upāṁśukam |
tarjanīṁ tu samākramya japaṁ naiva tu kārayet ||114||
ekaika-maṇim aṅguṣṭhenākarṣan prajapen manum |
merau tu laṅghite devi na mantra-phala-bhāg bhavet ||115||

anyatra ca—
tatrāṅguli-japaṁ kurvan sāṅguṣṭhāṅgulibhir japet |
aṅguṣṭhena vinā karma kṛtas tad aphalaṁ bhavet ||116||

sāṅguṣṭhābhir aṅgulībhiḥ | atra hetuḥ—aṅguṣṭheneti ||116||

kaniṣṭhānāmikā madhyā caturthī tarjanī matā |

tisro ’ṅgulyas tri-parvā syur madhyamā caika-parvikā ||117||
tisraḥ kaniṣṭhānāmikā-tarjanyaḥ ||117||

parva-dvayaṁ madhyamāyā japa-kāle vivarjayet |

evaṁ meruṁ vijānīyād brahmaṇā dūṣitaṁ svayam ||118||

evaṁ madhyamā-parva-dvayam ||118||

ārabhyānāmikā-madhyāt pradakṣiṇam anukramāt |

tarjanī-mūla-paryantaṁ kramād daśasu parvasu ||119||

daśasu parvasu gaṇayed iti śeṣaḥ ||119||

aṅgulir na viyuñjīta kiñcit saṅkocayet talam |

aṅgulīnāṁ viyoge tu chidreṣu sravate japaḥ ||120||

kvacic ca—
ārabhyānāmikāmūlāt prādakṣiṇyna vai kramāt |
madhyamāmūla-paryantaṁ japed daśasu parvasu ||121||

gautamīye—
ārabhyānāmikā-mūlāt parivarteta vai kramāt |
tarjanī-madhya-paryantaṁ japed daśasu parvasu ||122||

ārabhyānāmikā-madhyād ity atra matāntaram ārabhyānāmikā-mūlād iti ||122||

atha mālāyā niyamāntaram

tarjanyā na spṛśet sūtraṁ kamapyen na vidhūnayet |

aṅguṣṭha-parva-madhyasthaṁ parivartaṁ samācaret ||123||

sūtram iti mālām ity arthaḥ | na kampayet | no vidhūnayec ca na prakṣipet ||123||

kiṁ ca—
na spṛśed vāma-hastena kara-bhraṣṭāṁ na kārayet ||124||

kiṁ ca—
aśucir na spṛśed enāṁ kara-bhraṣṭāṁ na kārayet |
aṅguṣṭha-sthām akṣa-mālāṁ cālayen madhyam agrataḥ ||125||
tarjanyā na spṛśet so’yaṁ muktido gaṇana-kramāt |
bhuktau muktau tathā kṛṣṭo madhyamāyāṁ japet sudhīḥ ||126||
aṅguṣṭhānāmikabhyāṁ tu japed uttama-karmaṇi |
tarjanayaṅguṣṭha-saṁyogād vidveṣoccāṭane japet |
kaniṣṭhāṅguṣṭha-saṁyogāj japen māraṇa-karmaṇi ||127||

uttama-karmaṇi śānti-svastyayanādau | vidveṣe uccāṭane ca ||127||

kvacic ca—
 aṅguṣṭhaṁ mokṣadaṁ vidyāt tarjanīṁ śatru-nāśinīm |
madhyamā dhana-siddhyai syāc chānti-karmaṇy anāmikā |
kaniṣṭhā-karṣaṇe jñeyā japa-karmaṇi siddhidā ||128||

tatraiva matāntaraṁ likhati—aṅguṣṭham iti | ākarṣaṇe ākṛṣṭi-karmaṇi ||128||

atha japa-guṇāḥ

mantrārṇave—
manaḥ-saṁharaṇaṁ śaucaṁ maunaṁ mantrārtha-cintanam |
avyagratvam anirvedo japa-sampatti-hetavaḥ ||129||

manasaḥ saṁharaṇaṁ viṣayebhyaḥ pratyāhāraḥ ||129||

anyatra ca—
japānya-kāle mālāṁ tu pūjayitvā sugopayet |
guruṁ prakāśayed vidvān mantraṁ naiva prakāśayet ||130||

japād anyasmin kāle | gurum api prakāśayet ||130||

akṣa-mālāṁ ca mudrāṁ ca guror api na varśayet |
bhūta-rākṣasa-vetālāḥ siddha-gandharva-cāraṇāḥ |
haranti prakaṭaṁ yasmāt tasmād guptaṁ japet sudhīḥ ||131||

guroḥ guruṁ praty api ||131||

atha jape doṣāḥ

nārada-pañcarātre—
apavitra-karo nagnaḥ śirasi prāvṛto’pi vā |
pralapan vā japed yāvat tāvan niṣphalam ucyate ||132||

apavitraḥ kuśa-hīnaḥ karo yasya saḥ ||132||

kiṁ ca—
vadan na gacchan na svapan nānyat kim api saṁsmaran |
na kṣuj-jṛmbhaṇa-hikkādi-vikalīkṛta-mānasaḥ |
mantra-siddhim avāpnoti tasmād yatna-paro bhavet ||133||

kiṁ ca—
strī-śūdrābhyāṁ na bhāṣeta rātrau japa-paro na ca ||134||

vyāsa-smṛtau—
aṅguly-agreṣu yaj japtaṁ yaj japtaṁ meru-laṅghane |
asaṅkhyātaṁ ca yaj japtaṁ tat sarvaṁ niṣphalaṁ bhavet ||135||

vaiśampāyana-saṁhitāyām—
naikavāsā japen mantraṁ bahu-vastrākulo na ca |
 upary adho bahir vastre puraścaraṇa-kṛt tyajet ||136||

upari adhaś ca ye bahir vastre paridhānottarīya-vyatiriktaṁ vastra-dvayaṁ te tyajet ||136||

ata eva mantrārṇave—

uṣṇīṣī kañcukī nagno mukta-keśo galāvṛtaḥ |
apavitra-karo’śuddhaḥ pralapan na japet kvacit ||137||

gale āvṛtaḥ vastrādi-prāvṛtaḥ, aśuddhaḥ śaucādi-rahitaḥ ||137||

aprāvṛta-karo bhūtvā śirasi prāvṛto’pi ca |

cintā-vyākula-citto vā kruddho bhrāntaḥ kṣudhānvitaḥ ||138||
anāśanaḥ śayāno vā gacchann utthita eva vā |
rathyāyām aśive sthāne na japet timirāntare ||139||

aśive amaṅgale sthāne śmaśānādau, yac ca preta-bhūmy-ādikam iti sthāna-niyame likhitaṁ, tac ca
tāmasānāṁ duṣkāma-viśeṣopekṣayā | timirasya andhakārasya antare madhye ||139||

upānad-gūḍha-pādo vā yāna-śayyā-gatas tathā |

prasārya na japet pādāv utkaṭāsana eva vā ||140||

yāna-gataḥ śayyā-gato vā ||140||

yājñavalkya-saṁhitāyām—
na caṅkraman na ca hasan na pārśvam avalokayan |
nāpāśrito na jalpaṁś ca na prāvṛta-śirās tathā ||141||

caṅkramann itas tato bhraman, apāśritaḥ kiñcid avaṣṭabdhavān san ||141||

na padā padam ākramya na caiva hi tathā karau |

na cāsamāhitamanā na ca saṁśayāno japet ||142||

na ca karau ākramya saṁśayānaḥ saṁśayaṁ kurvan ||142||

dhyāyeta manasā mantraṁ jihvoṣṭhau na tu cālayet |

na kampayec chiro grīvāṁ dantān naiva prakāśayet ||143||

grīvāṁ ca na kampayet ||143||

yakṣa-rākṣasa-bhūtāni siddha-vidyādharā gaṇāḥ |

haranti prasabhaṁ yasmāt tasmād guptaṁ samācaret ||144||

evaṁ sarvathā japaṁ naiva prakāśayed ity abhipretaṁ, tatra hetum āha—yakṣeti ||144||

strī-śūdra-patitāṁś caiva rāsabhaṁ ca rajasvalām |

japa-kāle na bhāṣeta vrata-homādikeṣu ca ||145||

trailokya-saṁmohana-tantre ca—
na cchāyām ākramed vidvān vibhītaka-karañjayoḥ |
 na dadyāt kasyacit kiñcin na gṛhṇīyāj japāntare ||146||

atha doṣa-prāyaścittāni

tatraiva—
tūṣṇīm āsīta saṁjalpaś cāṇḍāla-patitādikān |
dṛṣṭvā tān vāry-upaspṛśyābhāṣya snātvā punar japet |
ācamya payato nityaṁ japed aśuci-darśane ||147||

ābhāṣya sambhāṣya, aśucīnāṁ mala-mūtrādīnāṁ darśane sati ||147||

kiṁ ca—
yadi vā yama-lopaḥ syāj japādiṣu kathañcana |
vyāhared vaiṣṇavaṁ mantraṁ smared vā viṣṇum avyayam ||148||

yamaḥ japa-viṣayaka-niyamas tasya lopo bhaṅgaḥ | vāmyam eti pāṭhe monalopaḥ | mantraṁ
nāmātmakaṁ viṣṇu-mantrāntaraṁ vā ||148||

mantrārṇava—
patitānām antyajānāṁ darśane bhāṣaṇe śrute |
kṣute’dho-vāyu-gamane jṛmbhaṇe japam utsṛjet ||149||

bhāṣaṇe sambhāṣaṇe | śrute ca śravaṇe sati | yad vā, bhāṣaṇe ca vacane śrute sati | aśubha iti pāṭhe
darśanādīnāṁ sarveṣām eva viśeṣaṇam | utsṛjed ity atra hetutvena ||149||

prāptāv ācamya caiteṣāṁ prāṇāyamaṁ ṣaḍ-aṅgakam |

kṛtvā samyag japec cheyaṁ yad vā sūryādi-darśanam ||150||

eteṣāṁ patitāntyaja-darśanādīnāṁ prāptau satyāṁ prāṇāyāmaṁ ṣaḍ-aṅga-nyāsaṁ ca kṛtvā ||150||

mārjāraṁ kukkuṭaṁ krauñcaṁ śvānaṁ śūdraṁ kharaṁ kapim |

dṛṣṭvācamyācaret karma spṛṣṭvā snānaṁ vidhīyate ||151||

karma japa-lakṣaṇam ||151||

nārada-pañcarātre ca—
sakṛd-uccārite śabde praṇavaṁ samudīrayet |
prokte cācamya vāṇyāpi prāṇāyāmaṁ sakṛd uccaret ||152||
bahu-pralāpe cācamya nyasyāṅgāni tato japet |
kṣute’py evaṁ tathāspṛśya-sthānānāṁ sparśane bhavet ||153||

kiṁ cānyatra—
jīrṇe sūtre punaḥ sūtraṁ grathayitvā śataṁ japet |
pramādāt patite hastāc chatam aṣṭottaraṁ japet |
tāvān niṣiddha-saṁsparśe kṣālayitvā yathoditam ||154||

tāvad aṣṭottara-śataṁ yathoditam iti pūrva-likhita-mantra-pañca-gavyādinā prakṣālyety arthaḥ ||

154||
 atha japa-bhedāḥ, tal-lakṣaṇādi ca

nārasiṁhe—
trividho japa-yajñaḥ syāt tasya bhedān nibodhata |
vācikaś ca upāṁśuś ca mānasaś ca tridhā mataḥ |
trayāṇāṁ japa-yajñānāṁ śreyān syād uttarottaraḥ ||155||
yad ucca-nīca-svaritaiḥ spaṣṭa-śabdavad-akṣaraiḥ |
mantram uccārayed vyaktaṁ japa-yajñaḥ sa vācikaḥ ||156||

ucca-nīca-svaritaiḥ uccena nīcena tvaritena vā udāttānudātta-svarita-saṁjñaiḥ svarair ity arthaḥ |

svareṇa yuktaiḥ spaṣṭa-śabdavadbhir akṣaraiḥ | ata eva vyaktaṁ mantram uccārayed yat ||156||

śanair uccārayen mantram īṣad auṣṭhau pracālayet |

kiñcic chabdaṁ svayaṁ vidyād upāṁśuḥ sa japaḥ smṛtaḥ ||157||

svayam eva vidyāj jānīyāt śṛṇuyād ity arthaḥ ||157||

dhiyā yad akṣara-śreṇyā varṇād varṇaṁ padāt padam |

śabdārtha-cintanābhyāsaḥ sa ukto mānaso japaḥ ||158||

varṇād ekasmāt krameṇānya-varṇaṁ vyāpya | evaṁ padāt padaṁ vyāpya | itthaṁ śabdasya
arthasya ca yac cintanam anusandhānaṁ tasya abhyāsaḥ punaḥ punar āvṛttiḥ ||158||

tatra ca yājñavalkyaḥ—
upāṁśu-japa-yuktasya tasmāc-chata-guṇo bhavet |
sahasro mānasaḥ prokto yasmād dhyāna-samo hi saḥ ||159||

upāṁśu-japa-yuktasya japaḥ śata-guṇaḥ syād vācikāj japāc chata-guṇo bhaved ity arthaḥ ||159||

mantrārṇave—
paśu-bhāve sthitā mantrāḥ kevalaṁ varṇa-rūpiṇaḥ |
sauṣumṇādhvany uccaritāḥ prabhutvaṁ prāpnuvanti hi ||160||

sauṣumṇye suṣumṇākhya-nāḍī-sambandhini adhvani cchidra-mārge uccāritāḥ santaḥ |

prabhutvaṁ sāmarthyam ||160||

na doṣo mānase japye sava-deśe’pi sarvadā |

japa-niṣṭho dvija-śreṣṭhāḥ sarva-yajña-phalaṁ labhet ||161||

ata eva mānaso japaḥ paramottama ity āha—na doṣa iti | dvija-śreṣṭhā iti tatratya-viprāṇāṁ
sambodhanam | dvija-śreṣṭha ity eka-vacanānta-pāṭho’pi kvacit ||161||

aśucir vā śucir vāpi gacchaṁs tiṣṭhan svapann api |

mantraika-śaraṇo vidvān manasaiva sadābhyaset ||162||

mantraika-śaraṇa ity anena puraścaraṇādi-paras tu yathokta-deśa-kālādāv evābhyased ity

abhipretam ||162||
 kiṁ cānyatra—
mānasaḥ siddhi-kāmais tu puṣṭi-kāmair upāṁśukaḥ |
vāciko māraṇoccāṭe praśasto japa īritaḥ ||163||

atha japa-māhātmyam

yājñavalkya-saṁhitāyām—
pāka-yajñāś ca catvāro vidhi-yajña-samanvitāḥ |
sarve te japa-yajñasya kalāṁ nārhanti ṣoḍaśīm ||164||

pāka-yajñā brahma-yajña-vyatiriktā deva-yajñādayaḥ | vidhi-yajñā jyotiṣṭomādayaḥ ||164||

padmanābhīye—
yāvantaḥ karma-yajñāś ca pradīptāni tapāṁsi ca |
sarve te japa-yajñasya kalāṁ nārhanti ṣoḍaśīm ||165||
japena devatā nityaṁ stūyamānā prasīdati |
prasannā vipulān bhogān dadyān muktiṁ ca śāśvatīm ||166||

śāśvatīṁ muktim | śrī-vaikuṇṭha-loka-prāpti-lakṣaṇām ||166||

tatra japa-prakāra-viśeṣeṇa phala-viśeṣāḥ

trailokya-saṁmohana-tantre śrī-mahādevomā-saṁvāde—
athedānīṁ pravakṣyāmi mantra-japya-vidhiṁ priye |
kevalaṁ japa-mātreṇa yasya sidhyanti siddhayaḥ ||167||

kevalaṁ pūjādikaṁ vināpīty arthaḥ ||167||

śrī-bīja-puṭitaṁ mantraṁ yadi japyeta mantravit |

kamalā tad-vaśe tiṣṭhed yathā kṛṣṇe rameta sā ||168||

kamalā—sarva-sampattir ity arthaḥ ||168||

kāmena puṭitaṁ mantraṁ prajaped yadi bhāmini |

mohayaty eva sakalaṁ jagad eva na saṁśayaḥ ||169||

kāmena—tad-bījena ||169||

māyā-bījena puṭitaṁ mantraṁ yadi japyed mahā-manum |

aṣṭaiśvaryāṇi sambhūya tasya pāde gatāni vai ||170||
vāg-bhavenāpi puṭitaṁ yadi japyet sa mohitaḥ |
veda-vedāṅga-pārajñaḥ sarvajño bhavati dhruvam ||171||

vāg-bhavena—sarasvatī-bījena ||171||

dhruveṇa puṭitaṁ mantraṁ yadi japyen maheśvari |

bījaṁ kūṭaṁ vicchidya mukti-bhāgī bhaven naraḥ ||172||
dhruveṇa praṇavena | bīja-rūpaṁ kūta-rūpaṁ ca karma vicchidya nirasya ||172||

idānīṁ śṛṇu devi tvaṁ kevalasya manor vidhim |

daśa-kṛtvo japen mantram āpat-kalpena mucyate ||173||

āpat-kalpena sarvopadraveṇa ||173||

viṁśatyā japa-mātreṇa rakṣayen mantra eva hi |

śata-japtena mantreṇa dina-pāpaiḥ pramucyate ||174||

viṁśatyā viṁśati-vārān ity arthaḥ | mantra eva rakṣayed iti dvāra-pāla-yāmikādi-vyatirekeṇāpi

tasya sarvatra duṣṭādibhyo rakṣā syād ity arthaḥ ||174||

sahasra-japtena tathā mucyate mahatainasā |

ayutasya japenaiva mahā-pātaka-nāśanam ||175||
atha lakṣa-japān mantrī devavan modate divi |
koṭi-japtena mantreṇa mukti-bhāgī bhaven naraḥ ||176||
ahar-niśaṁ japed yas tu mantrī niyata-mānasaḥ |
sa paśyati na sandeho gopa-veśa-dharaṁ harim ||177||
athavā yāni mantrasya padāni kathitāni te |
teṣām anyatamaṁ japyād yatra vai rocate manaḥ ||178||

teṣāṁ madhye yatra yasmin pade mano rocate, tad-anyatamam ekaṁ padaṁ japet ||178||

bījaṁ japtvā viśālākṣi bhaumaiśvaryeṇa yujyate |

dvitīyena sukhāsvādaṁ kurute mantri-sattamaḥ ||179||

sukhāsvādaṁ svarga-bhogam ||179||

jñānavān syāt tṛtīyena turīyeṇa jagad-guruḥ |

bhavet pañcama-japyena mukti-bhāgī na saṁśayaḥ ||180||

turīyeṇa caturthena | jagad-guruḥ sarva-śāstrārtha-tattvopadeṣṭā ||180||

ajñānī ca japed vāpi nija-rucy-anusārataḥ |

prathamaṁ jñāna-siddhiṁ tu dvitīyaṁ tv aṇimādikam ||181||

prathamaṁ jñāna-siddhiṁ prayacchatīty uttareṇānvayaḥ | evam agre’pi ||181||

tṛtīyaṁ sarva-saukhyaṁ ca caturthaṁ devatātmatām |

pañcamaṁ vaiṣṇavaṁ lokaṁ ṣaṣṭhaṁ muktiṁ prayacchati ||182||

devatātmatāṁ śrī-kṛṣṇa-sārūpyaṁ tad-eka-cittatāṁ vā ||182||

atha japa-vidhiḥ
 guruṁ sampūjya viprāṁś ca santarpyānna-rasādibhiḥ |
mārabheta japaṁ kāle maṅgale’nujñayā guroḥ ||183||

puraścaraṇa-karmārambhe prathamaṁ śrī-guru-pūjāṁ brāhmaṇa-bhojanādikaṁ ca likhati—

gurum iti | maṅgale śubhe kāle guror anujñayā japam ārabheta | tathā coktam—
viprān santarpayed anna-bhojanācchādanādibhiḥ |
bahubhir vastra-bhūṣābhiḥ sampūjya gurum ātmanaḥ |
ārabheta japaṁ paścāt tad-anujñā-puraḥsaram || iti ||183||

prātaḥ snānādikaṁ kṛtvā dattvā cārghyaṁ vivasvate |

ācamya japa-saṅkalpaṁ vidadhīta yathā-vidhi ||184||

tatra nitya-kṛtyaṁ likhati—prātar iti pañcabhiḥ | yathā-vidhīty asya pūrveṇāpi sarveṇa

sambandhaḥ | tatra saṅkalpa-vidhiś cāyam—adyāṣṭādaśākṣara-saṁmohana-mantrasya siddhi-
kāma iyat-sāṅkhya-japa-tad-daśāṁśāmukadravyaka-homa-tad-daśāṁśāṁśāmuka-tarpaṇa-tad-
daśāṁśa-brāhmaṇa-bhojanātmaka-puraścaraṇaṁ kariṣye iti ||184||

vidhāya vidhinā pūrvaṁ likhitenārcanaṁ prabhoḥ |

ātmārpaṇāntraṁ śaktyātha japaṁ pūrāṅgam ācaret ||185||

pūrvaṁ nitya-kṛtya-likhane likhitena vidhinā prabhoḥ śrī-kṛṣṇa-devasyārcanam ātmārpaṇāntaṁ

vidhāya pūjāyā āṅga-bhūtaṁ japam ācaret | sva-mantraṁ japet | śaktyā yathā-śaktīty arthaḥ | tataś
ca śaktau satyām aṣṭottara-sahasram anyathāṣṭottara-śatam | tathā śaktau saptāvaraṇa-sahitasya |
anyathāvaraṇa-sahitasya kevalasya dhyāna-mātreṇa vety ādikam ūhyam | etac cāgre spaṣṭaṁ
bhāvi ||185||

samarpya taṁ ca dattvārghyaṁ kṛtvā puṣpāñjaliṁ punaḥ |

stutvā kṛṣṇaṁ praṇamyātha prāśnāyāc caraṇāmṛtam ||186||

taṁ ca japam ||186||

kṣamasveti vadan prārthya ced udvāsyaṁ hṛd-ambuje |

udvāsya vidhivan mānasopacārair yajet punaḥ ||187||
kṛṣṇe samarya cātmānam ṛṣy-ādi-nyāsa-pūrvakam |
nijaṁ mantraṁ japed bhaktyā sampradāyānusārataḥ ||188||

agni-purāṇe—
darbha-hastas tathāsīno darbheṣūdaka-pāṇinā |
prāṅ-mukhodvartayen mālāṁ sahasraṁ śatam eva vā ||189||

darbheṣu āsīnaḥ prāṅ-mukhaḥ san | udaka-yukta-pāṇinā mālam udvartayet parivartayet | visarga-

lope’pi sandhir ārṣaḥ sahasraṁ vārān | aśaktau ca śataṁ vā | etac ca pūrjāṅga-nitya-
japābhiprāyeṇoktam | darbha-hastatvādikaṁ ca samānam evety atra likhitam ||189||

mantra-deva-prakāśinyām—

sūryasyāgre guror indor dīpasya ca jalasya ca |

viprāṇāṁ ca gavāṁ caiva sannidhau sammukhe japet ||190||
 nārada-pañcarātre ca—
śanaiḥ śanaiḥ suvispaṣṭaṁ na drutaṁ na vilambitam |
na nyūnaṁ nādhikaṁ vāpi japaṁ kuryād dine dine ||191||

kiṁ ca—
samūjyātha japaṁ kuryād vāvad vai prahara-dvayam |
tad ūrdhvaṁ pūrvavat snātvā viśeṣeṇa vidhāna-vit ||192||

atha snānānantaram ||192||

nyāsāvasānam akhilaṁ sarvaṁ kuryāt puroditam |

pūjāgni-homa-paryantaṁ tataś ca japam ācaret ||193||
yāvad dināvasānaṁ tu bhūyaḥ snāyāt tato dvija |
upāsya vidhivat sandhyāṁ deveśaṁ pūjayet punaḥ ||194||
visarjya bhojanaṁ kuryāt satataṁ tārakodaye |
bhuktvā śayīta śayane mṛt-snigdhe vātha bhūtale ||195||

visarjya devam ||195||

ardha-rātre samutthāpya pāda-śaucaṁ cared dvija |

ācamya devaṁ saṁsmṛtya śīghraṁ sampūjya pūrvavat |
japaṁ kuryād yathā-śatki arpayec ca tatheśvare ||196||

prātaḥ-kālam ārabhya madhyāhna-paryantaṁ japaṁ kuryād ity atroktam | nārada-pañcarātre ca

śrī-bhagavatoktam—madhyāhnāt parato na hi ity ādi bhedo mantra-bhedena śakty-ādi-bhedena vā
draṣṭavyaḥ ||196||

anyatra ca—
nairantarya-vidhiḥ proktas tad-dinaṁ nātilaṅghayet |
divasātikramāt teṣāṁ siddhi-rodhaḥ prajāyate ||197||

kiṁ ca—
ananya-mānasaḥ prātaḥ kālān madhyandināvadhi ||198|| iti |

ataḥ kuryāj japaṁ nityaṁ śaktyā niyata-saṅkhyayā |

saṅkhyā-pūrtau ca kurvīta prāṇāyāmaṁ punaḥ kṛtī ||199||

śaktyā yathā-śakti | yā niyatā nitya-niyamitā japa-saṅkhyā, tayaiva nityaṁ japaṁ kuryāt | na

nyūnaṁ nādhikaṁ vāpi japaṁ kuryāt dine dine ity ādy ukteḥ | saṅkhyāyās tasyāḥ pūrtau ca
samāptau satyām ||199||

atha homa-niyamaḥ

nārada-pañcarātre—
japasya tu daśāṁśena homaḥ kāryo dine dine |
athavā lakṣa-paryantaṁ homaḥ kāryo vipaścitā ||200|| iti |
lakṣa-saṅkhyāyāṁ pūrṇāyām ekaika-lakṣa-jape sampūrṇe sati | etac ca phala-viśeṣārtha-lakṣa-
catuṣṭayādi-japābhiprāyeṇa ||200||

home ca kuṇḍa-nirmāṇādikasya likhito vidhiḥ |

pūrvaṁ dīkṣā-vidhāv atra viśeṣaḥ ko’pi likhyate ||201||

pūrvaṁ dīkṣā-vidhau likhitaḥ | atra ca puraścaraṇa-vidhau ko’pi viśeṣo likhyate ||201||

kuryād raktāmbujair homaṁ guḍājya-madhu-samplutaiḥ |

tad-alābhe pāyasena sitāsarpir yutena hi ||202||

tad eva likhati kuryād iti | tad-alābhe raktāmbujādy-aprāptau satyām ||202||

homāśaktau japaṁ homa-saṅkhyās tu caturguṇam |

ṣaḍ-guṇaṁ cāṣṭa-guṇitaṁ yathā-saṅkhyaṁ dvijātayaḥ ||203||

mukhya-kalpāśaktau gauṇa-kalpaṁ likhati—homāśaktāv iti | trayo dvijā vipra-kṣatriya-vaiśyāḥ |

kramāt homa-saṅkhyāyāḥ | homasya yāvatī saṅkhyā likhitā japa-daśamāṁśa-rūpā | tasyāś
caturguṇaṁ japaṁ vipraḥ | ṣaḍ-guṇaṁ kṣatriyaḥ | aṣṭa-guṇaṁ vaiśyaḥ kuryād ity arthaḥ | tathā
coktam—homāśaktau japaṁ kuryāt homa-saṅkhyā caturguṇam | ṣaḍ-guṇaṁ cāṣṭa-guṇitaṁ yathā-
sāṅkhyaṁ dvijātayaḥ || iti ||203||

kecic cāhuḥ—
homa-karmaṇy aśaktānāṁ viprāṇāṁ dviguṇo japaḥ |
itareṣāṁ tu varṇānāṁ triguṇo hi vidhīyate ||204||

itareṣāṁ kṣatriya-vaiśya-śūdrāṇāṁ triguṇādiḥ | kṣatriyasya triguṇaḥ | vaiśyasya caturguṇaḥ |

śūdrasya pañca-guṇa ity arthaḥ ||204||

atha japa-saṅkhyā-niyamaḥ

sa-homas tu trivarṇānāṁ tulya eva japaḥ smṛtaḥ |

japo yo homa-rahitas teṣāṁ tad-yoṣitāṁ hi saḥ ||205||

evaṁ homāsamarthasya varṇa-trayasya homa-parivartakṛtyaṁ japa-bhedaṁ likhitvedānīṁ homa-

samarthasya tat-trayasya japaḥ samāna eveti japa-niyamaṁ likhati—sa-homaś ceti | tri-varṇānāṁ
homa-rahito yo japaś caturguṇādi-rūpaḥ saḥ | tad yoṣitām api | vipra-strīṇāṁ viprataś caturguṇo
japas, tathā kṣatriya-strīṇāṁ ṣaḍ-guṇo, vaiśya-strīṇāṁ cāṣṭa-guṇa iti | tathā ca krama-dīpikāyāṁ
(5.11)—
aśaktānāṁ home nigama-rasanāgendra-guṇito
japaḥ kāryaś ceti divja-nṛpa-viśām āhur apare |
sahomaś ced eṣāṁ sama iha japo homa-rahito
ya ukto varṇānāṁ sa khalu vihitas tac-cala-dṛśām || iti |
asyārthaḥ—home asamarthānāṁ vipra-kṣatriya-vaiśyānāṁ yathā-sāṅkhyaṁ nigamā vedāś
catvāraḥ rasāḥ ṣaṭ nāgendrā aṣṭau etair guṇito japaḥ kāryaḥ | tv-arthe vā-śabdaḥ | apara iti—homa-
karmaṇy asugamam eveti ||205||

svāmi-striyā japo yaś ca śūdrasya vihitaḥ sa hi |

 evam aṣṭādaśārṇas tu mantro japyo’yuta-dvayam ||206||

śūdrasya japa-niyamaṁ likhati—svāmīti | svāmī bhartā gurur vā | tasya striyā yaṁ japaḥ | sa eva
śūdrasya vihita ācāryaḥ | tathā ca krama-dīpikāyāṁ (5.12)—
yaṁ varṇam āśrito yaḥ śūdraḥ sa ca tan-nata-bhruvām |
vidadhīta japaṁ vidhivac chraddhāvān bhakti-bharāvanamra-tanuḥ || iti |
evaṁ varṇādi-bhedena japa-saṅkhyā-bhedaṁ likhitvedānīṁ pauraścaraṇika-mūla-mantra-japa-
niyamaṁ likhati—evam iti | likhitam asaṅkhyā-bhedena—ayuta-dvayaṁ viṁśati-sahasrāṇi | tathā
ca krama-dīpikāyāṁ (5.6)—
prajaped ayuta-catuṣkaṁ daśākṣaraṁ manu-varaṁ pṛthak kramaśaḥ |
aṣṭādaśākṣaraṁ ced ayuta-dvayam ity udīritā saṅkhyā || iti |
atra ca kramaśaḥ iti yatrokteṣv adri-śṛṅgādy-aṣṭa-sthāneṣu kramāj japed ity arthaḥ | tatra ca
pratisthānam ayuta-dvayaṁ japed iti na mantavyaṁ, kintu tatra tatrādri-śṛṅga-krameṇa tathā
japtavyam | yathā sarvatra kṛtena taj-japenāyuta-dvaya-saṅkhyā syāt | anyathāṣṭa-sthāneṣu
śrityekam ayuta-dvaya-japena ṣoḍaśāyuta-japaḥ syāt | sa ca sāradādi-mūla-granthoktena
virudhyata iti dik ||206||

tathā ca sāradāyāṁ—
mantram etaṁ yathā-nyāyam ayuta-dvitayaṁ paṭhet |
juhuyād aruṇāmbhojais tad-daśāṁśaṁ samāhitaḥ ||207||

ata eva sāradādy-uktaṁ likhati—mantram iti sārdhena ||207||

prapañca-sāre’pi—
japaḥ syād asamarthasya ayuta-dvitayāvadhiḥ ||208|| iti |

śrīmat-sanat-kumārādi-proktasya tv anusārataḥ |
mantraṁ phala-viśeṣāya japel lakṣa-catuṣṭayam ||209||

evaṁ mahā-mantra-varasyāsyāyuta-dvayenaiva puraścaraṇa-siddhir bhaved eva, tathāpi phala-

viśeṣārtham adhikādhikam api japed iti likhati—śrīmad ity ādinā pañcakam ity antena | mantram
aṣṭādaśākṣaram ||209||

tathā ca sanat-kumāra-kalpe—

uktaṁ lakṣaṁ kṛta-yuge tretāyāṁ tu dvayaṁ smṛtam |

lakṣa-trayaṁ dvāpare ca caturlakṣaṁ kalau yuge ||210||

trailokya-saṁmohana-tantre ca—

veda-lakṣaṁ japen manum ||211|| iti |

nigadena—sākṣād uktyā | etac ca sarva-yuge krameṇaiva jñeyam ||211||

ata evoktam—
yasmiṁś ca nigadenaiva japa-saṅkhyā vidhīyate |
tatra sarvatra mantrāṇāṁ saṅkyā-vṛddhir yuga-kramāt ||212||
kalpoktaiva kṛte saṅkhyā tretāyāṁ dviguṇā smṛtā |
dvāpare triguṇā jñeyā kalau saṅkhyā caturguṇā ||213|| iti |
 sadyaḥ phala-viśeṣārthaṁ japed vā lakṣa-pañcakam |
homaṁ kuryāt tad-daśāṁśaṁ vidhinā likhitena hi ||214||

sadyaḥ acirād eva phala-viśeṣa-siddhy-artham | vā-śabdo lakṣa-catuṣṭayāpekṣayā | vikalpe lakṣa-

pañcakaṁ japet | tasya lakṣa-catuṣṭayasya lakṣa-pañcakasyāpi daśānām aṁśānām ekam aṁśaṁ
likhitena kuryād raktāmbujaiḥ ity ādi-vidhinaiva kuryāt | tatra lakṣa-catuṣṭaye catvāriṁśat-
sahasrāṇi, lakṣa-pañcake cārdha-lakṣam iti | tathā ca krama-dīpikāyāṁ (5.10)—
śuṣira-yugala-varṇaṁ cen manuṁ pañca-lakṣaṁ
prajapatu juhuyāc ca prokta-kḷptyārdha-lakṣam | iti |
asyārthaḥ—śuṣira-yugala-varṇam aṣṭādāśākṣaraṁ mantraṁ yadi japet tadā lakṣa-pañcakaṁ japatu
| pūrvokta-vidhinā ardha-lakṣaṁ juhuyāc ca, homasya japa-daśāṁśakatvād iti ||214||

kecic ca pūrva-sevākhyaṁ śuddhy-arthaṁ taj-japaṁ puraḥ |

ayuta-dvayam ante ca manyante lakṣa-pañciakam ||215||

tatraiva sadyaḥ phala-viśeṣāpekṣayā matāntaraṁ likhati—kecic ceti | ayuta-dvayaṁ likhitam,

tasya vāṣṭādaśākṣara-mantrasya japaṁ śuddhy-arthaṁ mantrādi-śuddhaye punaḥ puraścaraṇādau
manyante | ataḥ pūrva-sevety ākhyā yasya tam | ante ca tat-samāptau lakṣa-pañcakaṁ manyante |
tathā ca krama-dīpikāyāṁ (5.7)—ekaṁ caiṣām aśaktau gaditam iha mayā pūrva-sevā-vidhānam |
kiṁ ca--nirvṛtte’smin punaś ca prajapatu vidhivat siddhaye sādhakeśaḥ ity ādi | asyārthaḥ—
aśaktau pūrvoktādri-śṛṅgādy-aṣṭa-sthāna-gamanāsāmārthye tathā tatra tatra krameṇokta-śākādy-
aṣṭāhārm āśritya japaṁ kuryāt | anena ca prakāreṇa iha granthe prakāra-viśeṣeṇa vā pūrva-
sevābhidhānaṁ puraścaraṇa-karma | yad vā, pūrva-seveti nāma-vidhānaṁ mayoktam | asmin
pūrva-sevākhya-karmaṇi nivṛtte samāpte satu siddhaye viśiṣṭa-phala-siddhy-arthaṁ punaḥ
prajapatu | puraścaraṇa-japa-viśeṣaṁ karotu | tac ca yugala-śuṣira-varṇam ity ādi vakṣyamāṇaṁ
likhitam eveti ||215||

ante mahotsavaṁ kurvan kṛṣṇaṁ bhaktyārcayen mahat |

guruṁ santoṣayed viprān bhojayet prīṇayet parān ||216||

evaṁ puraścaraṇe sampūrṇe ca kṛtyaṁ likhati—anta iti | yathā likhita-japa-samāptau satyām,

mahad yathā syāt tathā, parān duḥkhitān dīnān, te cāgre lekhyāś ca dināndhety ādinā ||216||

puraścaraṇam evaṁ hi sidhyed iti mataṁ budhaiḥ |

tathāpi kuryāt pūrveṣāṁ sammataṁ tarpaṇādikam ||217||

evaṁ tarpaṇādi-niyamaṁ vināpi kevala-homa-mahitena homāśaktau ca caturguṇādinā japenaiva

puraścaraṇa-siddhiḥ syād iti keṣāṁcit prāmāṇikānām ācāryāṇāṁ matam aṅgīkṛtya bahula-sādhu-
kula-sammata-tarpaṇādi-niyamaṁ ca likhati—pura iti | evaṁ lihita-prakāreṇaiva, pūrveṣāṁ
purātanānāṁ sādhu-janānām ||217||

atha tarpaṇādi

trailokya-sammohana-tantre—
akhaṇḍair aruṇāmbhojair madhuroktair daśāṁśataḥ |
pāyasena ghṛtāktena tilair ārapyakaiś ca vā ||218||
juhuyāt tad-daśāṁśena tarpayec chuddha-vāriṇā |
viprāṁś ca bhojayet paścād guruṁ santoṣayet tataḥ ||219||
 anyatra ca—
homād daśāṁśataḥ kuryāt tarpaṇaṁ devatā-mukhe |
tarpaṇasya daśāṁśena mārjayed ātma-mūrdhani |
mārjanasya daśāṁśena kuryād brāhmaṇa-bhojanam ||220||

atha tatra tarpaṇam

tarpayec ca vidhānena śrī-kṛṣṇaṁ śuddha-vāriṇā |

puṣpākṣatādi-yuktena jale saṁjapya pūrvavat ||221||

pūrvavad iti | pūrvaṁ prātaḥ-snāne yathā likhitaṁ tathety arthaḥ ||221||

atha mārjanam

toyair añjalinā śuddhair abhiṣiñcet sva-mūrdhani |

daśāṁśaṁ devatā-buddhyā tarpaṇasya tataḥ param ||222||

devatā-buddhyeti | nijeṣṭa-deve svātmānaṁ samarpyety arthaḥ ||222||

atha brāhmaṇa-bhojanam

pādyārghyair arcayed iṣṭa-deva-buddhyā hi bhūsurān |

bhakṣyair nānā-rasopetair bhojayed bhakti-bhāvitaḥ ||223||
kiṁ ca—
evaṁ pratidinaṁ kuryād yāvat saṅkhyā prapūryate |
tad-ante mahatīṁ pūjāṁ kuryād viprāṁś ca toṣayet ||224||

evaṁ tarpaṇādikaṁ homavat tāvat pratidinaṁ kuryāt | yāvaj japokta-saṅkhyā-pūrtir bhavati | tad-
ante saṅkhyā-pūrtau ca satyām ||224||

gandha-mālyāmbaraiś caiva bhakṣya-bhojyaiḥ sadakṣiṇaiḥ |

dīnāndha-kṛpaṇā-nāthān prīṇayed bhojanādinā ||225||
go-bhū-hiraṇya-vastrādyaiḥ sampūjya gurum ātmanaḥ |
miṣṭānnaṁ bandhubhiḥ sārdhaṁ bhuñjītotsāha-pūrvakam ||226||
kecij japād daśāṁśaṁ hi manyante tarpaṇaṁ budhāḥ |
apekṣyo’nyo viśeṣo’tra jñeyo’nya-granthataḥ sa ca ||227||

homa-daśāṁśaṁ tarpaṇaṁ likhitam | tatra matāntaraṁ likhati—kecid iti | nanu puraścaraṇa-

kartuḥ sandhyādi-samaye katamaḥ kṛtya-viśeṣaḥ ? ity apekṣāyāṁ likhati apekṣya iti | atra
puraścaraṇa-japādi-vidhau | yo’nyo viśeṣaḥ kaścid apekṣyaḥ syāt | sa cānya-granthataḥ sāradā-
tilakādi-pañcarātrādi-śāstrebhyo’pi jñeyaḥ | atra ca grantha-vistara-bhayān na vistārya likhita iti
bhāvaḥ ||227||

atha tatra rikta-pūraṇam

 uktaṁ ca—
yad yad aṅgaṁ vihīyeta tat-saṅkhyād dviguṇo japaḥ |
sāṅgatā-siddhyai kartavyas tac cāśaktyā na bhaktitaḥ ||228||

aṅgaṁ tarpaṇādi | tasya aṅgasya saṅkhyāyāḥ dviguṇaḥ sāṅgasya puraścaraṇasya siddhy-arthaṁ

japaḥ kartavyaḥ | tac ca dviguṇa-japa-karaṇaṁ tatra tatrāśaktyaiva, na ca bhaktitaḥ | bhaktyā ca
prayatnataḥ sarvam anuṣṭheyam evety arthaḥ | śaktita iti pāṭhe’pi śaktau satyāṁ mukhya-kalpa-
tarpaṇādi-parityāgena pravṛtter agre doṣoktyā prayatnato mukhya-kalpena sāṅgaṁ kuryād evety
arthaḥ ||228||

sarvathā bhojayed viprān kṣata-sāṅgatva-hetave |

viprārādhana-mātreṇa vyaṅgaṁ sāṅgatvam āpnuyāt ||229||

nanu rikta-nivāraṇārthaṁ japāśakty-ādau kiṁ kāryam ? tatrāha—sarvatheti | vyaṅga-

sāṅgaatārthaṁ sadyaḥ phala-viśeṣa-siddhy-artham evety ādi-sarva-prakāreṇa | viśeṣataś ca
kṣatasya vyaṅgasya sāṅgatva-hetave | yad vā, sarvatheti bhakṣya-bhojyādi-nānā-prakāreṇety
arthaḥ ||229||

anyatra ca—
yad yad aṅgaṁ vihīyeta japas tad dviguṇo mataḥ |
tāvat puṣpa-pradānaṁ vā tāvatī vā namaskriyā ||230||

tatrāpy aśaktau likhati—yad yad iti | namaskriyā praṇāmaḥ ||230||

atha saṅkṣipta-puraścaraṇam

tad uktam—
pūjāṁ vistarataḥ kartuṁ yo na śaknoti sādhakaḥ |
sa vināṅgendra-vajrādyaiḥ pūjayed iṣṭa-daivatam ||231||

aṅgādyāvayavair vinā nijeṣṭa-deva-mātraṁ pūjayet ||231||

athavā devatā-mātraṁ dhyātvā samyak prapūjayet |

athavā mānasīṁ kuryāt pūjām ātmārpaṇāvadhi ||232||

devatā-mātraṁ kevala-nijeṣṭa-devam eva dhyātvā, na tu tat-tad-upacāra-samarpaṇādy-ukta-tat-

tad-dhyānaṁ kṛtvā ||232||

athavā kevalāṁ pūjāṁ bāhyaṁ kuryād vicakṣaṇaḥ |

sampūjyaivaṁ japaṁ kuryān na mantraṁ kevalaṁ japet ||233||

kevalāṁ—mānasika-pūjā-vyatiriktām ||233||

pūrva-pūrvasya cāśaktāv uttarottaram ācaret |

prabhuḥ prathama-kalpasya yo’nukalpena vartayet |
na sāmparāyikaṁ tasya durmater jāyate phalam ||234||

prathama-kalpasya mukhya-pakṣasya prabhus tatra samarthaś cet, anukalpena gauṇa-pakṣeṇa

vartayet karma kuryāt | sāmparāyikaṁ pāralaukikam ||234||
 athavānya-prakāreṇa puraścaraṇam iṣyate |
grahaṇe’rkasya cendor vā śuciḥ pūrvam upoṣitaḥ ||235||

pūrvam upoṣitaḥ | grahaṇa-pūrva-dine kṛtopavāsaḥ san ||235||

nadyāṁ samudra-gāminyāṁ nābhimātrodake sthitaḥ |

grahaṇādi-vimukty-antaṁ japen mantraṁ samāhitaḥ ||236||
anantaraṁ daśāṁśena kramād dhomādikaṁ caret |
tad-ante mahatīṁ pūjāṁ kuryād brāhmaṇa-bhojanam ||237||
tato mantra-prasiddhy-arthaṁ guruṁ sampūjya toṣayet |
evaṁ ca mantra-siddhiḥ syāt devatā ca prasīdati ||238||
athavānya-prakāro’yaṁ pauraścaraṇike vidhau |
candra-sūryoparāge tu snātvā prayata-mānasaḥ ||239||

athavānya-prakāro’yam ity atra samudra-gāmi-nadī-jalāntaḥ-sthiti-vyatirekeṇa | saṅkṣepe pūrvato

viśeṣaḥ ||239||

sparśād vimukta-paryantaṁ japen mantraṁ samāhitaḥ |

sarvaṁ pūrvavad evātha kuryād dhomādikaṁ kṛtī ||240||

sparśāt grāsam ārabhya ||240||

athavā devatā-rūpaṁ guruṁ dhyātvā pratoṣayet |

tasya cchāyānusārī syād bhakti-yuktena cetasā ||241||

kevala-śrī-guru-prasādenaiva puraścaraṇa-siddhiḥ syād iti prakārāntaram āha—athaveti tribhiḥ ||

241||

guru-mūlam idaṁ sarvaṁ tasmān nityaṁ guruṁ bhajet |

puraścaraṇa-hīno’pi mantrī siddhyen na saṁśayaḥ ||242||

yathā coktam—
yathā siddha-rasa-sparśāt tāmraṁ bhavati kāñcanam |
sannidhānād guror eva śiṣyo viṣṇumayo bhavet ||243||

atha tatraiva-prakārāntaram

gautamīye—
gavānugamanaṁ kāryaṁ go-grāsaṁ go-pradakṣiṇam |
nityaṁ tāsu prasannāsu gopālo’pi prasīdati ||244||

atha siddha-mantrasya lakṣaṇam

uktaṁ ca bodhāyanena—
siddhasya trīṇi cihnāni dātā bhoktāpy ayācakaḥ |
siddha-mantrasya tantroktāḥ pravartante’tra siddhayaḥ ||245||
dātā bhoktāpi san ayācakaḥ kam ai na yācata ity arthaḥ | na caitan-mātram eva, kintu
sarvajñatvādi-siddhayo’pi tasya syur ity āha—siddeti | atra asminn eva loke dehe vā ||245||

nārada-pañcarātre ca śrī-bhagavatā—
mantrārādhana-śaktasya prathamaṁ vatsara-trayam |
jāyante bahavo vighnā niyamas tasya nārada ||246||
nodvegaṁ sādhako yāti karmaṇā manasā yadi |
tṛtīyād vatsarād ūrdhvaṁ rājānaś ca mahī-bhṛtaḥ ||247||
prārthayante’nurodhena garvitā api māninaḥ |
prasādaḥ kriyatāṁ nātha mamoddharaṇa-kāraṇam ||248||

anurodhena ānukūlyenaiva prārthayante ||248||

prajvalantaṁ prapaśyanti tejasā vibhavena ca |

atas te muni-śārdūla niṣṭhuraṁ vaktum akṣamāḥ ||249||
navamād vatsarād ūrdhvaṁ nānāścaryāṇi paśyati |
ātmānanda-pradāny āśu pratyakṣeṇa bahis tathā ||250||

kiṁ ca—
balena paripūrṇaś ca tejasā bhāskaropamaḥ |
pūrnendu-sadṛśaḥ kāntyā gamane viahgopamaḥ ||251||
svalpāśane’py akṛśatā bahunā na ca khidyate |
viṇ-mūtrayor athālpatvaṁ bhaven nidrā-jayas tathā ||252||

bahunāśanena ||252||

japa-dhyāna-rato maunī na khedam adhigacchati |

vinā bhojana-pānābhyāṁ pakṣa-māsādikaṁ mune ||253||
ity evam ādibhiś cihnair mahā-vismaya-kāribhiḥ |
pravṛttaiḥ sampraboddhavyaṁ prasanno mantra-rāḍ iti ||254||
mantra-prasāda-janitaṁ liṅgaṁ ca na guror vinā |
prakāśanīyaṁ viprendra kasyacit siddhim icchatā ||255||

liṅgaṁ cihnam ||255||

siddha-mantra-kṛtyam

tac coktam—
siddha-mantro’pi nityaṁ hi trisandhyaṁ kṛṣṇam arcayet |
niyamenaika-sandhyaṁ vā japed aṣṭottaraṁ śatam ||256||

ekasandhya vā arcayet | atra cāṣṭottara-śata-vārān nija-mantraṁ japed ity arthaḥ ||256||

athāsiddha-sādhanopāyāḥ

te coktāḥ—
anuṣṭhito yathānyāyaṁ yadi mantro na sidhyati |
punas tāvat prajaptavyas tataḥ siddho bhaved dhruvam ||257||
 punaḥ so’nuṣṭhito mantro yadi siddho na jāyate |
upāyās tatra kartavyāḥ sapta śaṅkara-bhāṣitāḥ ||258||

śaṅkara-bhāṣītāḥ | tac ca sarvaṁ śaṅkareṇoditam iti yāvat ||258||

rudreṇa dahanāntaṁ ye kathitā mantra-siddhaye |

saptopāyā budhair jñeyās te’nya-mantreṣ siddhidāḥ ||259||

dahanāntam iti drāvaṇam ārabhya dahanāvadhi upāyaṁ kuryāt ||259||

śrīmad-gopāla-mantro’yaṁ naiva kiñcid apekṣate |

hṛn-mātra-spṛk phalaty eva spṛṣṭo hi dahano yathā ||260||

te copyāyā mantrāntareṣv eva, na tv asmin mohanākhyāṣṭādaśākṣara-mantra iti likhati—śrīmad iti

| kiṁcit saṁskārādikaṁ, kintu hṛn-mātraṁ spṛśatīti tathā sann api phalaty eva | tatra
dṛṣṭāntatvenārthāntaram upanyasyati—spṛṣṭo hīti | yathā kathañcit sparśa-mātreṇa dahano dhaed
eva, tac-chaktes tathātvād iti bhāvaḥ | etac ca pūrvaṁ māhātmya-likhane vyaktībhūtam evāsti ||
260||

atha yantram

sanat-kumāra-kalpe–
arcanārthe mune vakṣye yantraṁ śrī-karam uttamam |
sva-gṛhe vā vane cātha viṣṇor āyatane’thavā ||261||

śālagrāme manau yantre ity ādinā pūrvaṁ pūjā-sthāneṣu yantram ullikhitam | tan-mantraṁ yantra
ālikhety ādinā sādhya-sādhanopāyeṣu ca mantram uddiṣṭam | ato’pekṣitaṁ yantrasya lakṣaṇaṁ
likhan kevala-yantra-dhāraṇa-mātreṇaiva sarva-siddhiḥ syād ity antena tad-dhāraṇa-māhātmyaṁ
ca pramāṇayan likhati—arcanārtham ity ādinā yāvat samāptiḥ | mune—he nārada ! śrīkaraṁ
vibhūti-sampādakam ||261||

sthānam ekāntam āśritya śodhayed gomayāmbhasā |

tatra saṁsthāpayet pīṭhaṁ kṣālitaṁ śuddha-vairiṇā ||262||

ekāntaṁ nirjanam ||262||

vilikhya gandha-paṅkena likhed aṣṭa-dalāmbujam |

karṇikāyāṁ likhed vahni-puṭitaṁ maṇḍala-dvayam ||263||

vahni-puṭitaṁ maṇḍala-dvayaṁ ṣaṭ-koṇam ity arthaḥ | agre ṣaṭkoṇeṣv ity ukteḥ | tathā ca krama-
dīpikāyāṁ—karṇikāyāṁ tu ṣaṭ-koṇaṁ sa-sādhyaṁ tatra manmatham [7.25] iti | kāmaṁ kāma-
bījaṁ | śiṣṭaiḥ avaśiṣṭaiḥ saptadaśabhir varṇaiḥ | tathā ca krama-dīpikāyāṁ—
śiṣṭais taṁ saptadaśabhir akṣarair veṣṭayet smaram [7.26] iti ||263||

tasya madhye likhed bījaṁ sādhyākhyaṁ karma-saṁyutam |

tataḥ śiṣṭair manor varṇais taṁ kāmaṁ veṣṭayet sudhīḥ ||264||
śriyaṁ ṣaṭ-koṇa-koṇeṣv aindra-nairṛta-vāyuṣu |
ālikhya ca likhen māyāṁ vahni-vāruṇa-śūliṣu ||265||
ṣaṭkoṇasya tasya koṇeṣu aindrādiṣu śriyaṁ lakṣmī-bījam ālikhya vahny-ādi-koṇeṣu triṣu māyāṁ
bhuvaneśvarī-bījaṁ likhet | tathā ca krama-dīpikāyāṁ—prāg-rakṣo’nila-koṇeṣu śriyaṁ śiṣṭeṣu
sadmasu1 [7.26b] iti ||265||

mantraṁ ṣaḍ-akṣaraṁ tatra vilikhet ṣaṭsu sandhiṣu |

akṣaraiḥ kāma-gāyatryā veṣṭayet keśare sudhīḥ ||266||

tatra ṣaṭkoṇe bahir ye ṣaṭ sandhayas teṣu ṣaḍ-akṣaraṁ mantraṁ likhet | ekaikasmin sandhau
ekaikākṣaraṁ likhet ity arthaḥ | ṣaḍ-akṣaraś cātra kāma-bījena sahitaś caturthy-anto naty-antaś ca
kāma-gāyatryāś caturviṁśatibhir akṣaraiḥ pratyekaṁ keśaram akṣara-trayam ity evam aṣṭa-dala-
kamalasya keśarāṣṭakaṁ veṣṭayed ity arthaḥ | tathā ca krama-dīpikāyāṁ—ṣaḍ-akṣaraṁ sandhiṣu
ca keśareṣu triśas triśaḥ | vilikhet smara-gāyatrīṁ [7.27] iti ||266||

kāma-mālā-manor varṇair daleṣv aṣṭasu mantra-vit |

likhed guhānanair bhaktair māntrikāṁs tad-bahir likhet ||267||

kāma-mālā-mantrasya varṇān aṣṭa-catvāriṁśad-akṣarāṇi pratyeka-dalaṁ ṣaḍ-varṇān ity evam

aṣṭa-daleṣu likhet | tathā ca krama-dīpikāyāṁ—mālā-mantraṁ dalāṣṭake ṣaḍśaḥ saṁlikhya [7.27-
28] iti | kair likhet ? bhadrair uttamair gṛhāñjanaiḥ samī-viśeṣaiḥ | tebhyo’ṣṭa-dalebhyo bahir
mātṛkām eva pañcāśad-akṣarātmikāṁ sabindukāṁ krameṇa likhec ca | tathā ca krama-dīpikāyāṁ
— tad-bāhye veṣṭayen mātṛkākṣaraiḥ [7.28] iti ||267||

bhū-bimbaṁ ca likhed bāhye śrī-māyāṁ dig-vidiksu ca |

evaṁ yantraṁ samālikhya jāta-rūpa-maye paṭe ||268||

tad-bāhye mātṛkāto bahir bhū-bimbaṁ bhū-maṇḍalaṁ parito likhet | tasya dikṣu prācyādi catsṛṣu
śriyaṁ lakṣmī-bījaṁ vidikṣu ca āgnyādi-catuṣkoṇeṣu mayā-bījaṁ ca likhed ity arthaḥ | tathā ca
krama-dīpikāyāṁ—bhū-bimbaṁ ca likhed bāhye śrī-māye dig-vidikṣv api [7.28] ity arthaḥ | tad-
bahiś catuṣkoṇaṁ koṇa-catuṣṭaye vajra-catuṣṭayam etaṁ lekhyam iti sat-sampradāyaḥ ||268||

rājate tāmra-paṭṭe vā bhūrje kṣauma-maye’pi vā |

sūkṣma-tantu-paṭe vāpi pratiṣṭhāpya samīraṇam ||269||

samīraṇaṁ pratiṣṭhāpya prāṇa-pratiṣṭhāṁ kṛtvety arthaḥ ||269||

hutvā sahasram ājyena yantre sampātapūrvakam |

arcayitvāyutaṁ japtvā dhārayed yantram uttamam ||270||
trailokyaiśvaryam āpnoti devair api supūjitaḥ |
ākarṣaṇaṁ sura-strīṇāṁ nāga-loka-nivāsinām ||271||

nāga-lokaḥ pātālam | tad-vāsinām api strī-janānām iti śeṣaḥ ||271||

piśācayakṣa-rakṣāṁsi krūra-bhūta-gaṇāś ca ye |
duṣṭa-sarpādayaḥ sattvā hy apasarpanti dūrataḥ ||272||
antra-rāja-dharaṁ dṛṣṭvā vidravanti ca bibhyati |
bahunā kim ihoktena sarva-loka-sukhāvaham ||273||
strīṇām ākarṣaṇaṁ sadyo rājñāṁ vaśyakaraṁ bhuvi |

1 Correct should be saṁvidam = bhuvaneśvarī bīja.

 yoga-siddhi-karaṁ puṁsāṁ bhava-sāgara-tārakam |
bhukti-mukti-pradaṁ divyam iti proktaṁ ca vedhasā ||274||

divyaṁ śrī-vaikuṇṭha-loke prāpakaṁ cety arthaḥ ||274||

iti śrī-gopāla-bhaṭṭa-vilikhite śrī-bhagavad-bhakti-vilāse

pauraścaraṇiko nāma
saptadaśo vilāsaḥ
|| 17 ||