UCCP LAOAG

ANNIVERSARY SERMON 2022

"Rebuilding and Restoring with Hope: Heralding the Full Life"

“Panangbangon Manen ken Panangisubli a buyogan ti Namnama:

Panangipakaammo iti Naan-anay a Biag”

Ezekiel 37:1-14

Greetings!

Bayat ti pananglagiptayo kadagiti tawen a naglabas, nasaplittayo kadagiti

adu a karit ken isyu ti kagimongan a nakaro ti epektona iti inaldaw a

panagbiagtayo kas komunidad ti pammati.

Numanpay saan a ditoy ti kapilya a dimmakkelak, nagbalin daytoy a iglesia

a paset iti biag ken maikadua a kapilyak idi agbasbasaak iti kolehiyo. Iti

unos iti 119 years, ammok a saan met a nakaliklik daytoy nga Iglesia
kadagiti naduma-duma a pannubok a pakairamanan iti panangilabantayo

kadagiti karbengantayo,kasta met kadagiti pannubok iti nagbabaetan dagiti

miembro ken no dadduma pakairamanan dagiti papanguluen.

Iti naglabas a tawen, nagdaliasattayo pay iti pannubok nga no sadinno

naawanantayo iti gundaway a makastrek iti uneg ti kapilya gapu iti

pandemya. Awan ti socialization ken nainget ti panaggaraw gapu idi iti

lockdown a nakaapektar met kadagiti personal a laban ken karit.

Manipud kadagitoy a kasasaad, sadino ti pakasarakantayo iti namnama?

Ania kadi ti kaipapanan ti panangnamnama? Kasano tayo a bumangon

manen nga addaan iti namnama bayat iti panangipakaammotayo iti naan-

anay a biag?

Adu la ketdin ti nangngegtayo a banag maipapan iti namnama kas

inkasaba dagiti papastortayo ken uray dagiti makaparegta a mensahe

manipud kadagiti lidertayo iti kapilya wenno laiko ken uray pay dagiti
dadduma nga impluensia iti social media.

Ikagkagumaan ti dadduma nga ti namnama ket just a mindset, positive

thinking.
Nupay mabalin a balido dayta agingga iti sumagmamano a tukad, kas

Kristiano, ipakpakaunatayo a ti namnama ket saan laeng a maysa a

panagpampanunot no di ket maysa nga aramid.

Ti namnama ket maysa a sao a kadawyan a mangyeg kadatayo iti

masakbayan ken mangiturong kadatayo iti biag. Biag a napno iti

kaipapanan ken biag a nagbiag nga agang-anges a normal ken naragsak

kas iti dinisenio ken inkeddeng ti Namarsua kadatayo a Dios. Daytat’

mangpabara kadatayo nga agtultuloy iti biag a kas inkari nga aramiden ken

tungapalen ni Yahweh, kas nailanad iti naibasa a nasantoan a surat iti libro
ni Ezekiel. Napasamak daytoy ken Ezekiel bayat nga adda kenkuana iti

Espiritu ken pannakabalin ti Apo— ti naimpadtuan a sirmata.

Ti tanap dagiti namaga a tulang ket estoria ti namnama. Estoria dayta ti
kari. It’s a story about a people who have a future. “Agbiagkanto” ti tema

nga agtartaray iti ginget dagiti namaga a tulang.

“Anak ti tao, mabalin kadi nga agbiag dagitoy a tulang?” saludsod ti Apo

ken ni Ezekiel. Simmungbat ni Ezekiel ngem kunana laeng, “Apo a Dios, sika
laeng ti makaammo iti dayta.”

Apresiarek unay ti kinamapagpiaran ti ibagbaga ni Ezekiel. Mangngegko ti

kinaawan ti kinasiguradona. Mariknak ti riknana nga awan ti

pannakabalinna. Kasta ti mariknak tunggal mabasa wenno mangngegko iti

news dagiti maipapan iti didigra, ipapatay, injustice, pinansial a rigat ken
naduma-duma pay a saan a makaay-ayo a pasamak wenno damag. Ket I’m

guessing mabalin a kasta met ti mariknayo. Ita nga aldaw datayo amin ni
Ezekiel.

Mainaig daytoy a topiko iti agdama a kasasaadtayo gapu kadagiti

makakarit a kapadasan a nasabattayo itay nabiit. Dagiti nagango a tulang

isimsimbolona iti depression, kinaawanan gaway, bitterness wenno aniaman

a negatibo a rikna.

Isuro kadatayo ti Libro ni Ezekiel a ti Naespirituan ket napateg a kas met

laeng iti pisikal. Ti pannakabalin ken plano ti Dios para kadagiti tattaona ket

lab-awanna dagiti pisikal a limitasion ti biagtayo ditoy daga, ket

aramidennanto manen dagiti banbanag a baro—kas kadagiti nagango a

tulang a naikkan anges ken biag.

Isuronatayo ti pammatitayo a nasken ti namnama. Mabalin a makita ti

namnama. Kas kunak itay, ti namnama ket saan laeng a maysa a

panagpampanunot, no di ket maysa a banag a mabalintayo nga iggaman

ken aramiden. Kayattayo a padasen, marikna, ken makita ti namnama. Kas

dagiti liriko daytay nalatak a kanta a Kristiano, "In Christ Alone", adda

napigsa a mensahe a mangibagbaga kadatayo a ti namnamatayo ket ni

Jesus—ni Jesus, ti kaindaklan a sagut ti Dios kadagiti tattao.

In Christ alone my hope is found

He is my light, my strength, my song

This cornerstone, this solid ground

Firm through the fiercest drought and storm

What heights of love, what depths of peace

When fears are stilled, when strivings cease

My comforter, my all in all

Here in the love of Christ I stand

Bayat ti panangpadastayo a mangawat iti daytoy a kanta, ammotayo a ti

Dios, babaen kenni Jesus, ti pudno a pannakaiparangarang ti namnama. Isu

a pagyamantayo gapu ta ti ayat ti Dios kadatayo, inbaonna ti anakna a

pangnamnamaan ken immay nangimustra iti dayta a makunkuna a

namnama.
Pagaammotayo nga dagiti Kristiano ket dagiti tattao ti namnama, kas
mayanninaw iti pammatitayo ken ti napagungar a Cristo. Patientayo a

posible ti namnama, ket nasken a mapasaran ti kinaan-anay ti biag. Nupay

kasta, dagiti komunidad ti pammati itatta marigatanda a pagbalinen a

pudno ken mainaig kadagiti tattao ti mensahe ti namnama. Adu a tattao ti

mapukpukawan iti namnama gapu kadagiti ulbod a propeta, panangallilaw,

kinaawan hustisia, ken kinapanglaw. Gapuna, ti karittayo ita ket ti

panangaramid iti namnama a makita ken makita dagiti gagangay a tattao.

Ania ti langa ti namnama? Ti pammatitayo ken Jesu-Kristo ket masapul a

mangpataud iti namnama iti tengnga dagiti di masigurado. Kas met laeng
iti panangkitatayo iti namnama iti panangitandudo iti pannakasalaknib

dagiti kalintegan ken pagimbagan dagiti ubbing; no kasano a makitatayo ti

namnama iti pannakidangadang dagiti agtutubo para iti libre ken de

kalidad nga edukasion; no kasano a makitatayo ti namnama iti ministerio ti

komunidad ti pammati a mangibabalaw kadagiti pagalagadan ti kinaawan

hustisia, liberalisasion, ken pananggundaway, ken no kasano a makitatayo ti

namnama iti panangipaay kadagiti natauan a serbisio ken panangsungbat

kadagiti emerhensia iti didigra iti tengnga dagiti natural wenno inaramid ti
tao a didigra.
Iti ministerio ni Jesus, konkreto nga impakitana ken impaganetgetna

kadagiti adalanna no ania ti namnama. Makita ti namnama iti panangpakan

kadagiti rinibu a mabisin a tattao; ti pannakaagas dagiti masakit;

panangbisita kadagiti kaptibo ken mairurrurumen; mangted iti lawag

kadagiti bulsek; panangarakup kadagiti nailaksid; panangipakita iti asi

kadagiti managbasol; ken panangngaasi kadagiti tattao manipud iti amin a

benneg ti panagbiag. Awan ti sabali a wagas tapno makita a sibibiag ti

namnama no di babaen ti kinaimbag ken ayat ni Jesus nga inranudna

kadagiti tattao. Saan laeng nga imbaga ni Jesus nga isu ket namnama no di

ket impakitana dayta babaen kadagiti aramidna, a mamagbalin kenkuana a

naan-anay a pannakaiparangarang ti namnama para kadagiti tattao ken iti

intero a lubong.

Gagayyem, sibibiag unay ti mensahe ti namnama iti unegtayo. Kas maysa a

komunidad ti pammati, saantayo koma a mapukawan ti namnama.

Rumbeng nga adda namnama iti pusotayo tapno makapagtignaytayo iti

pammatitayo. Tapno maidaydayawtayo ti Dios, rumbeng nga adda

namnamatayo tapno masangotayo dagiti kasasaad iti biagtayo ken

sanguentayo dagiti kabusor a nangpasardeng kadatayo a mangitungpal iti

mision ni Jesucristo ditoy daga. No kunatayo a ni Jesus ti namnamatayo,

ngarud masapul nga iparangtayo dayta iti biagtayo a Kristiano a kas iti

impakita ni Jesus iti ministeriona. Ket utobentayo itan ti saludsod no kasano

a datayo, kas Kristiano, mailadawantayo ti panangbangon manen ken

panangisubli iti namnama iti kinaan-anay ti biag iti laksid ti

pannakadadaeltayo. Ipaawat ti pannakadadael dagiti panagsagaba ken

nalabit nadadael a relasion kadagiti pamilia ken dadduma a tattao,

nangruna iti komunidad ken uray iti uneg ti simbaan. Ti namnama ket

maysa a sibibiag nga espiritu a mangsustiner kadatayo iti panangibangon

manen ken panangisubli iti nadadaeltayo. Ti namnama ti lawag a mangted

kadatayo iti determinasion ken pigsa a manglaban iti nariribuk ken

mangirurumen a sistema iti kagimongantayo.

Gagayyem, kastoy ti panagtrabaho ti namnama kadatayo! Ti namnama ti

mangted iti biag! Iti daytoy a panawen ti krisis, ammotayo nga adu a tattao,
agraman dagiti ubbing ken agtutubo, ti makidangdangadang ken

mapukpukawen ti namnama. Para iti kaaduan kadatayo, ti krisis ket

nangyeg iti adu a panagbalbaliw, uray pay nakaro, iti biagtayo. Ken adu ti

saan a makabael a mangdaer kadagiti panagbalbaliw.

Iti daytoy a panawen ti kinaawan ti sigurado, ania ti maaramidtayo tapno

matulongantayo dagiti dadduma a makakita iti namnama iti tengnga dagiti

kinaawan ti sigurado iti panawentayo? Kas maysa a komunidad ti pammati,

ania ti mabalintayo nga aramiden tapno adda namnama para iti

nasaysayaat a biag inton bigat?

Ngarud, no addaanka iti pigsa, pammati, tured, ken tarigagay a

mangparmek ti maibusor iti dalluyon ti biag, ammom nga adda namnama.

No adda PANANGNAMNAMA iti pusotayo, uray kadagiti simple a wagas,

ammotayo a ti namnama ket mangted kadatayo iti pigsa nga umabante

ken mangbalbaliw iti biagtayo. Kas dumaliasattayo manen iti sabali a

tawen,kas maymaysa mabalintayo a parubuen manen ti namnama iti

tunggal maysa bayat ti panangsurottayo iti wagas ni Cristo a mangipakita

iti namnama iti ministeriona. Patiek a dagitoy dagiti naindaklan a karit a

masapul nga ibaklay dagiti agtutubo ken kadatayo amin bayat ti

panangawittayo iti krus ti biag ken ministerio ni Jesucristo iti

panangiyegtayo iti naimbag a damag ti namnama ken ti kinaan-anay ti biag

kadagiti amin a parsua. Amen!