Linux

Linux
	Tux係Linux官方嘅吉祥物，喺1996年由Larry Ewing創造
開發者	網民，包括創始人Linus Torvalds
程式語言	C語言同埋少量匯編語言
作業系統類型	類Unix系統
運作狀態	仲用得
原始碼模式	開源軟件
初始版本	1991年嘅0.01版（代號“Freax”）
市場取向	桌上電腦、手提電話、手提電話、智能電視等等
支援嘅語言	好多種
支援平台	Alpha, ARC, ARM, C6x, H8/300, Hexagon, Itanium, m68k, Microblaze, MIPS, Nios II, OpenRISC, PA-RISC, PowerPC, RISC-V, s390, SuperH、SPARC, Unicore32、x86（含x86-64）, Xtensa等
核心類別	整塊性核心
授權條款	GPL等多種（"Linux"商標由Linus Torvalds持有，由Linux基金會管理。）
官方網站	www.kernel.org

Linux係一種電腦作業系統同埋佢嘅內核嘅名。佢亦係自由軟件同開放原始碼發展之中最出名嘅例子。

嚴格嚟講，Linux呢個詞本身齋表示Linux核心，但係實際上大家已經慣咗用Linux嚟形容成個基於Linux核心，同埋使用GNU 工程各種工具同資料庫嘅作業系統（即GNU/Linux）。基於呢啲組件嘅Linux系統叫做Linux發行版。一般嚟講，一個Linux發行套件包含大量嘅軟件，比如軟件開發工具，資料庫，Web伺服器（好似Apache），X Window，桌面環境（比如GNOME同埋KDE），辦公套件（比如OpenOffice.org），等等。

Linux核心最初係為英特爾 386 微處理器設計嘅。而家Linux核心支援由個人電腦去到大型主機甚至包括嵌入式系統在内嘅各種硬件設備。

喺開始嗰陣，Linux只係個人狂熱愛好嘅一種產物。但係而家，Linux已經成為咗一種受到廣泛關注同支持嘅一種作業系統。包括IBM同惠普在內嘅一啲電腦業巨頭亦都開始支持Linux。好多人覺得，同其他嘅商用Unix系統以及微軟 Windows相比，作為自由軟件嘅Linux具有低成本、安全性高同埋更可靠嘅優勢。

畫面

Debian 7.3 (wheezy) 運行緊amd64 同埋 GNOME 3.4.2 嘅截圖

screenshot of Debian 7.3 (wheezy) amd64 with GNOME 3.4.2 with theme Clearlooks-Phenix

開放源代碼嘅辦公軟件LibreOffice 3.5.4.2運行喺GNOME 3.4.2桌面環境同埋Debian 7.3 (wheezy) amd64同埋Clearlooks-Phenix佈景主題上邊

Linux 發行版

Linux 發行版係種預先整合好Linux核心、GNU架撐同一啲軟件，基於Linux核心嘅作業系統，等用家一裝好就用得。大多數都用咗好多GNU軟件，包括shell程序、工具、程序庫、編譯器，仲有好多其他程序，好似Emacs。就係因為噉，GNU計劃嘅開創者理察·馬修·斯托曼博士提議將Linux作業系統改叫GNU/Linux^[3]，但係有啲人齋叫佢做「Linux」。

大多數系統仲包括好似提供GUI界面嘅XFree86之類嘅曾經行喺BSD嘅程序。

除咗部分專家之外，大多數人都唔會自己裝每一個組件或者自行設定，而係直接用Linux套件。

歷史

Linux核心創立者尼紐·拖華特

Linux內核最初係由芬蘭人尼紐·拖華特（Linus Torvalds）喺赫爾辛基大學返學嗰陣出於個人愛好而編寫。最初嘅設想中，Linux係一種類似Minix嘅一種操作系統。Linux嘅第一版1991年9月喺互聯網發布，隨後喺10月發布第二版。

Linux嘅歷史同GNU有緊密聯繫。喺1983年開始嘅GNU計劃致力開發一個自由並且完整嘅類Unix操作系統，包括軟件開發工具同各種應用程序。到1991年Linux內核發布嗰陣，GNU已經幾乎整曬除系統內核之外嘅各種必備軟件嘅開發。喺Linus Torvalds同其他開發人員嘅努力下，GNU組件可以喺Linux內核之上運行。成個內核係基於GNU通用公共許可，亦即係GPL（General Public License）嘅，但Linux內核並唔係GNU 計劃嘅一部分。

Linux標誌同吉祥物係一隻叫Tux嘅企鵝，Linux嘅註冊商標係Linus Torvalds擁有。噉係因為喺1996年，一個叫William R. Della Croce嘅律師開始向各個Linux發行商發信，聲明佢擁有Linux商標嘅擁有權，並要求各個發布商畀版稅，呢啲發行商集體進行上訴，要求將個註冊商標重新分配畀Linus Torvalds。

Linux嘅某啲版本唔使裝就用得，佢哋稱為LiveCD。

用家

傳統嘅Linux使用者一般都要自己裝同埋設置作業系統，相比起其他作業系統使用者，好似微軟 Windows同Mac OS嘅用户更加有電腦知識。呢啲使用者有陣會畀人叫做「黑客」或者「極客」（geek）。但係隨住Linux越嚟越流行，越嚟越多原始設備制造商（OEM）開始喺佢哋銷售嘅電腦上面預裝Linux，Linux亦有普通電腦用家，開始慢慢搶佔桌面電腦作業系統嘅市場。同時Linux亦係最受歡迎嘅伺服器作業系統之一。Linux亦都喺嵌入式電腦市場上面擁有優勢，低成本嘅特性令到Linux深受使用者歡迎。用Linux主要嘅成本係移植、培訓同埋學習嘅費用，早期由於識Linux嘅人比較少，呢一方面嘅費用比較高，但呢方面嘅費用已經隨住Linux嘅日益普及同埋Linux上面嘅軟件越嚟越多、越嚟越方便而降低。

KDE同GNOME等桌面系統令Linux更加似係一個Mac或者Windows之類嘅作業系統，提供完善嘅圖形用户界面，同其他用命令行（指令行，Command Line）界面嘅類Unix作業系統唔同。

未來軟件界嘅方向

使用Google Android嘅智能電話

Linux作為比較早嘅原始碼開放操作系統，將引領未來軟件發展嘅方向。原因好簡單，就似而家嘅wiki會好快展示出佢嘅魅力。

基於 Linux 開放源碼嘅特性，越嚟越多大中型企業同政府投入更多資源嚟開發 Linux。現今世界上，好多國家逐漸將政府機構內部門嘅電腦轉移到 Linux，呢個情況仲會一直持續。Linux 嘅廣泛使用為政府機構慳返唔少經費，亦降低對封閉源碼軟件潛在嘅安全性憂慮。目前由Google負責開發嘅Android，作為最多人用嘅流動操作系統（包括智能電話同平板電腦），都係基於Linux。

Linux嘅英文發音

根據Torvalds嘅說法，Linux嘅發音係同「Minix」押韻。

參照[1]，「Li」之中「i」嘅發音類似「Minix」之中「i」嘅發音，而「nux」之中「u」嘅發音類似英文單詞「profess」之中「o」嘅發音。依照國際音標應該係['linэks]。

此外喺[2]有一份Torvalds本人講嘢嘅音頻，音頻內容為「Hello, this is Linus Torvalds, and I pronounce Linux as Linux.」（音頻文件）。

應用

GNU/Linux愛好者設計嘅宣傳圖，並使用GPL授權

GNU/Linux社群設計嘅立體圖，並使用GPL授權

以往，Linux主要被用作伺服器嘅操作系統，但因為平，高靈活性同Unix背景令佢好啱作更廣泛嘅應用。傳統上，以Linux為基礎嘅過去，以Linux為基礎嘅「LAMP（Linux, Apache, MySQL, Perl/PHP/Python嘅組合）」技術，除咗已經喺開發者群體中廣泛流行，佢亦係依家提供網站服務供應商最常使用嘅平台。

基於佢低廉成本同高度可設定性，Linux經常被應用於嵌入式系統，例如機頂盒、流動電話同流動裝置等。喺流動電話上，Linux已經成為Symbian OS嘅主要競爭者；而喺流動裝置上，就成為Windows CE同Palm OS之外另一個選擇。目前流行嘅TiVo數碼攝影機用咗經過客製化後嘅Linux。此外，仲有唔少硬件式嘅網絡防火牆同路由器，例如部份LinkSys嘅產品，都係用Linux嚟驅動、並採用咗系統提供嘅防火牆同路由功能。

採用Linux嘅超級電腦亦愈嚟愈多，根據2005年11月號嘅TOP500超級電腦列表，依家世上最快嘅兩組超級電腦都係用Linux作業系統。而喺表列嘅500套系統之中，用Linux嘅佔371組（即74.2%），其中喺頭十位，有7組喺用Linux嘅。

2006年開始發售嘅SONY PlayStation 3都用Linux。Sony曾經為佢哋嘅PlayStation 2推出過一套叫PS2 Linux嘅DIY組件。至於遊戲開發商雅達利（Atari）同id Software，都有為旗下遊戲推出過Linux桌面版本。此外，Linux Game Publishing亦有專門為Linux平台撰寫遊戲，並致力將其他喺Windows平台編撰嘅遊戲程式碼轉攜至Linux平台，並為轉攜遊戲提供使用授權。

而一個打算對所有生活喺發展中國家嘅細路提供手提電腦嘅名為「每孩子皆有一部手提電腦」（OLPC）嘅項目，正係用Linux作為預設嘅作業系統。