Jan Kemp

Generaal Jan Christoffel Greyling Kemp (Amersfoort, Transvaal, 1872 - 1946) was 'n Suid-Afrikaanse soldaat en kabinetsminister.

Jan Christoffel Greyling Kemp
Geboortedatum	10 Junie 1872
Sterfdatum	31 Desember 1946 (74 jaar oud)
Lojaliteit	Zuid-Afrikaansche Republiek en Unie van Suid-Afrika
Rang	Veggeneraal
Poste beklee	Luitenant van Krugersdorp
Veldslae/oorloë	Magato-oorlog Slag van Pietershoogte Slag van Nooitgedacht Slag van Rooiwal Slag van Tweebos
Ander werk	Klerk; Landbouer; Parlementslid; Kabinetsminister

Kemp ontvang sy skoolopleiding aan die Staatsgimnasium in Pretoria en bekwaam hom in 1889 as onderwyser. Twee jaar later aanvaar hy 'n betrekking in die onderwysdepartement van die Z.A.R. en word ook luitenant in die vrywilligers vir die distrik Krugersdorp. Hy dien in verskeie veldtogte teen inboorlingstamme en ook in die Jameson-inval. Hy onderskei hom in die Anglo-Boereoorlog en vorder tot die rang van generaal. Met die oprigting van die Unie-Verdedigingsmag in 1912 word hy offisier, maar sluit hom aan by die 1914-Rebellie, waartydens hy 'n geskiedkundige trek deur die Kalahariwoestyn onderneem saam met sy eenheid en ná die rebelle verslaan is, Duits-Suidwes bereik. Hy het hom later aan die Suid-Afrikaanse owerheid oorgegee. Hy is tronkstraf opgelê, maar in 1916 vrygelaat.

In 1920 word Kemp Volksraadslid vir Wolmaransstad en in 1924 minister van landbou in genl. J.B.M. Hertzog se kabinet ná die bewindsoorname deur die Pakt-regering. Hy dien ook as minister van lande van 1936 tot 1939 tydens die bewind van die Verenigde Party. Sy outobiografie het onder die titel Vir vryheid en vir reg verskyn.

Jan Kempdorp is na hom vernoem.

Bronne

• Visser, Rud. P. (samesteller). 1957. Die Vaderland-Gedenkalbum. Johannesburg: Afrikaanse Pers-Boekhandel.