DDR SDRAM

DDR geheue, met bo 512MB en onder 256MB.

DDR SDRAM (vanuit Engels vir double-data-rate synchronous dynamic random access memory) of dubbele datasnelheid sinkrone dinamiese ewetoeganklike geheue is 'n soort geïntegreerde stroombaangeheue wat in rekenaars gebruik word. Dit behaal 'n hoër bandwydte as gewone SDRAM deur data oor te dra op die stygende asook vallende rande van die kloksein. Dit verdubbel byna die oordragstempo sonder om die frekwensie van die voorste bus te verhoog. Sodoende kan 'n 100 MHz DDR-stelsel 'n effektiewe kloktempo van 200 MHz hê in vergelyking met die ekwivalente SDRAM.

Met data wat in 8 grepe op 'n slag oorgedra word gee DDR RAM 'n data-oordragstempo van die (geheuebus-kloktempo) × 2 (vir dubbelle datasnelheid) × 8 (aantal grepe oorgedra). As die voorste busfrekwensie dus 100 MHz is gee DDR-SDRAM 'n maksimum oordragstempo van 1600 MG/sekonde.

JEDEC het standaarde vir DDR SDRAM-spoed in twee dele daargestel: Die eerste spesifikasie is vir geheueskyfies en die tweede vir die geheuemodules.

Skyfspesifikasie

DDR-200: DDR-SDRAM geheuskyfies wat gespesifiseer is om teen 100 MHz te werk.
DDR-266: DDR-SDRAM geheuskyfies wat gespesifiseer is om teen133 MHz te werk.
DDR-333: DDR-SDRAM geheuskyfies wat gespesifiseer is om teen 166 MHz te werk.
DDR-400: DDR-SDRAM geheuskyfies wat gespesifiseer is om teen 200 MHz te werk.

Modulespesifikasie

PC-1600: DDR-SDRAM geheuemodule wat gespesifiseer is om teen 100 MHz te werk met DDR-200 skywe en 'n bandwydte van 1,600 GB/s.
PC-2100: DDR-SDRAM geheuemodule wat gespesifiseer is om teen 133 MHz te werk met DDR-266 skywe en 'n bandwydte van 2,133 GB/s.
PC-2700: DDR-SDRAM geheuemodule wat gespesifiseer is om teen 166 MHz te werk met DDR-333 skywe en 'n bandwydte van 2,667 GB/s.
PC-3200: DDR-SDRAM geheuemodule wat gespesifiseer is om teen 200 MHz te werk met DDR-400 skywe en 'n bandwydte van 3,200 GB/s.

Let wel: Alle RAM-snelhede tussen die bogelyste spesifikasies voldoen nie aan JEDEC spesifikasies nie. Dikwels is hierdie skywe bloot 'n vervaardiger se eie optimisering deur gebruik te maak van hoër toleransie skywe of skywe wat teen 'n hoër spanning bedryf word.

JEDEC standaarde bepaal ook die paketgroottes waarin DDR SDRAM vervaardig word.

Daar is geen argitektuurverskille tussen die DDR SDRAM wat ontwerp is vir verskillende klokfrekwensies nie, bv. PC-1600 (ontwerp om teen 100 MHz te werk) en PC-2100 (ontwerp om ten 133 MHz te werk). Die getal dui eenvoudig op die oordragstempo waarteen die skyf gewaarborg is om te werk. Dit is dus moontlik om DDR SDRAM teen laer klokfrekwensies te loop (klokvertraging/underclocking) as waarvoor dit vervaardig is of soms selfs teen hoër klokfrekwensies (klokversnelling/overclocking). Laasgenoemde hou egter risiko's in en moet met omsigtigheid hanteer word.

DDR SDRAM DIMM's het 184 penne (teenoor die 168 penne van SDRAM of 240 penne van DDR-2 RAM) en kan onderskei word van SDRAM DIMMs deur die aantal kepies (DDR SDRAM het een, SDRAM het twee). DDR word bedryf by 'n spanning van 2,5 V, vergeleke met 3,3 V vir SDRAM. DDR bring dus ook 'n kragbesparing mee.

Baie nuwe skyfstelle gebruik hierdie geheuetipes in dubbelkanaal of soms selfs vierkanaal konfigurasies, wat 'n verdubbeling of 'n vervierdubbeling van die effektiewe bandwydte meebring.

Alternatiewe

DDR word tans met DDR2 SDRAM vervang, wat etlike modifikasies bevat om 'n hoër klokfrekwensie toe te laat maar steeds op dieselfde beginsel as DDR werk. Rambus XDR-DRAM kompeteer tans met DDR2-tegnologie. Daar word verwag dat DDR2 die nywerheidstandaard gaan word, aangesien QDR SDRAM (vierdubbele datatempo) te kompleks is om te implementeer terwyl XDR min ondersteuning geniet. DDR se Prefetch-bufferwydte is 2 bisse, terwyl DDR2 4 bisse gebruik.

Vervaardigers van geheueskywe beweer dat dit nie prakties is om DDR1-geheue met kloksnelhede groter as 400 MHz op groot skaal te vervaardig nie. RDRAM is 'n besondere duur alternatief tot DDR SDRAM en die meeste vervaardigers het ondersteuning daarvoor in hul moederbord-skyfstelle gestaak.

Sien ook

Eksterne skakels