Damokles

Die Swaard van Damokles

Damokles is 'n karakter in 'n Griekse legende wat vertel van die Swaard van Damokles. Die verhaal het blykbaar sy oorsprong in die verlore geskiedenis van Sisilië deur die romeinse geskiedskrywer Timaeus. Die Romeinse verteller Cicero het dit moontlik gelees in werke deur Diodorus Siculus. Hy het daarvan gebruik gemaak in sy werke en dit is hoe die verhaal deel geword het van die Europese kultuur. Die verhaal vertel van 'n howeling aan die hof van Dionysius die Tweede van Syracuse in Sisilië. Damokles het Dionysius gevlei en vertel hoe bevoorreg hy is om soveel mag en gesag te kan hê. Dionysius het toe aangebied dat Damokles vir 'n dag plekke met hom ruil sodat hy daardie voorreg vir homself kon smaak. Daardie aand is 'n banket vir Damokles gehou en het Damokles dit baie geniet om soos 'n koning behandel te word. Na aan die einde van die maal het Damokles opgekyk en 'n swaard bo sy kop sien hang wat aan 'n enkele perdehaar vasgemaak was. Damokles het toe dadelik sy aptyt verloor en versoek om te gaan. Dionysius het daarmee die konstante vrees waarmee 'n magtige man moet leef doeltreffend oorgedra.

Cicero het hierdie verhaal gebruik in 'n werk waarin hy beklemtoon het dat deugsaamheid voldoende is vir 'n gelukkige lewe.