Location via proxy:   [ UP ]  
[Report a bug]   [Manage cookies]                
Gaan na inhoud

Engelse Rugbyvoetbalunie

in Wikipedia, die vrye ensiklopedie
Engelse Rugbyvoetbalunie
Kenteken van die Engelse Rugbyvoetbalunie
Kenteken van die Engelse Rugbyvoetbalunie
Engelse naam Rugby Football Union
Afkorting RFU
Land Vlag van Engeland Engeland
Sportsoorte Rugby, Sewesrugby
Gestig op 26 Januarie 1871
Gestig in Londen, Engeland
Lid van Wêreldrugby
Aangesluit in 1890
Vastelandse beheerliggaam Rugby Europa
Patroon Catherine, Prinses van Wallis
Voorsitter Tom Ilube
President Tom Ilube
Setel Twickenham-stadion, Londen, Engeland
Amptelike taal Engels
Amptelike webwerf englandrugby.com

Die Engelse Rugbyvoetbalunie (Engels: Rugby Football Union, afgekort “RFU”) is die bestuursliggaam wat rugby en sewesrugby in Engeland beheer. Die beheerliggaam is in 1871 gestig en by Twickenham gesetel. Sedert 1890 verteenwoordig dit Engeland by Wêreldrugby en sedert 1999 ook by Rugby Europa (“RE”).

Geskiedenis

[wysig | wysig bron]
Die Webb Ellis Rugby Football Museum in die Engelse dorp Rugby
Gedenkplaat by die plek, waar die Engelse Rugbyvoetbalunie op 26 Januarie 1871 gestig is

Die Engelse Rugbyvoetbalunie is op 26 Januarie 1871 gestig.[1] Daarmee is dit die oudste rugbybeheerliggaam ter wêreld en het in 1890 by die Internasionale Rugbyvoetbalraad (IRVR, nou Wêreldrugby) aangesluit.[2] In 1999 het England met die aansluiting van die Fédération Internationale de Rugby Amateur (FIRA; nou Rugby Europa) by die IRVR ook ’n lid van dié kontinentale beheerliggaam geword.[3]

Taak

[wysig | wysig bron]
Setel van die Engelse Rugbyvoetbalunie in Londen

Die Engelse Rugbyvoetbalunie organiseer verskeie nasionale spanne, insluitend Engeland se nasionale seniormansrugbyspan (die Rooi Rose), vroue en jeug. Die RFU hou ook toesig oor sewesrugby in Engeland en aangesien dit ’n Olimpiese sportsoort is, werk hulle met die Britse Nasionale Olimpiese Komitee saam. Naas die amptelike nasionale span roep die RFU ook ander keurspanne byeen. Die England Saxons is die tweede nasionale span van Engeland.[4] Daarbenewens bestuur die beheerliggaam kinder- en jeugrugby in Engeland. Kinders en jongmense word reeds op skool aan rugby bekend gestel en na gelang van hul belangstelling en talent begin hul met hul afrigting. Engeland beskik oor ’n nasionale span vir studente, die Schoolboys, wat as ’n voorbereiding op die Engelse nasionale rugbyspan dien.[5] Net soos ander rugbylande beskik Engeland oor ’n o/20-nasionale span wat aan die o/20-Sesnasies-toernooi en die Wêreldrugby o/20-kampioenskap deelneem.[6][7]

Die beheerliggaam reël ook die plaaslike kompetisies. Die hoogste rugbyliga in die land is die Engelse Premierskap, waaraan twaalf klubs deelneem.[8] Bo die nasionale kampioenskap word jaarliks saam met klubs uit Frankryk, Ierland, Italië, Skotland, Suid-Afrika en Wallis die Europese Rugbykampioenskapbeker en die Europese Rugby-uitdaagbeker uitgespeel.

Die Engelse Rugbyvoetbalunie organiseer ook gereeld internasionale toernooie. Hulle het al opgetree as gasheer van die rugbywêreldbekertoernooie in 1991 en 1999 (albei saam met die ander destydse Vyfnasies), asook 2015 (saam met Wallis). Saam met die Franse Rugbyfederasie, die Ierse Rugbyvoetbalunie, die Italiaanse Rugbyfederasie, die Skotse Rugbyunie en die Walliese Rugbyunie organiseer hulle die jaarlikse Sesnasies-toernooi, die vernaamste rugbytoernooi in die Noordelike Halfrond. Daarbenewens word die Londen Sewes jaarliks beslis.

Dit word as ’n groot prestasie beskou om saam met die Britse en Ierse Leeus na die Suidelike Halfrond te toer, waar hulle sowat al om die vier jaar teen die Nieu-Seelandse All Blacks, die Suid-Afrikaanse Springbokke of die Australiese Wallabies speel.[9]

Kenteken

[wysig | wysig bron]

Die embleem op die trui is ’n rooi roos, pleks van die drie leeus op die truie van die sokkerspan en die krieketspan. Die Rugbyvoetbalunie het die nasionale span se embleem voor die eerste wedstryd teen Skotland in Edinburg in 1871 ontwerp. ’n Rooi roos – glo dié van die Huis van Lancaster – is as die span se embleem gekies.[10] Die nasionale span se wit trui is ontleen aan dié wat by die Rugby-skool gedra is.[10] Die ontwerp en standardisering van die roos – wat tot 1920 in verskeie variasies uitgebeeld is – word aan Alfred Wright, ’n werknemer by die Rugbyvoetbalunie, toegeskryf.[10] Wright se ontwerp is glo tot in die laat 1990’s met min veranderinge gebruik.[10] Die roos is eers in 1997 verander, toe Nike die amptelike truiverskaffer geword het.

Sien ook

[wysig | wysig bron]

Verwysings

[wysig | wysig bron]
  1. ↑ (en) "History". Rugbyvoetbalunie. Besoek op 28 Maart 2024.
  2. ↑ (en) "England". Wêreldrugby. Besoek op 28 Maart 2024.
  3. ↑ (en) "About us". Rugby Europa. 2020. Besoek op 28 Maart 2024.
  4. ↑ (en) "England A becomes England Saxons". Rugbyvoetbalunie. 18 Mei 2006. Geargiveer vanaf die oorspronklike op 27 September 2012. Besoek op 27 September 2012.
  5. ↑ (en) "Schools". Rugbyvoetbalunie. Besoek op 28 Maart 2024.
  6. ↑ (en) "England U20". Sesnasies. Geargiveer vanaf die oorspronklike op 31 Oktober 2023. Besoek op 31 Oktober 2023.
  7. ↑ (en) "World Rugby U20 Championship". Wêreldrugby. Besoek op 28 Maart 2024.
  8. ↑ (en) "FAQs". Premiership Rugby. Besoek op 28 Maart 2024.
  9. ↑ (en) "British & Irish Lions". Britse en Ierse Leeus. Besoek op 28 Maart 2024.
  10. ↑ 10,0 10,1 10,2 10,3 (en) the Museum of Rugby, Twickenham (3 Junie 2005). "England's Rose – The Official History". Unofficial England Rugby Union. Besoek op 28 Maart 2024.

Eksterne skakels

[wysig | wysig bron]
Ontsluit van "https://af.wikipedia.org/w/index.php?title=Engelse_Rugbyvoetbalunie&oldid=2667458"