Gemini 1

Gemini 1 word lanseer

Gemini 1 was die eerste sending van NASA se Gemini-program. Dit was 'n onbemande toetssending van die Gemini ruimtetuig met die doelwit om die strukturele integriteit van die nuutontwerpte ruimtetuig en die verbeterde Titan II vuurpyl te toets. Dit was ook die eerste keer dat die nuwe opsporing- en kommunikasiestelsels vir die Gemini-program getoets is. Dit is ook gebruik om die grondbeheerpersoneel op te lei vir die bemande Gemini-sendings.

Gemini 1 se lansering was aanvanklik geskeduleer vir Desember 1963 maar probleme tydens die ontwikkeling van die ruimtetuig en die vuurpyl het die lansering met vier maande vertraag. Gemini 1 is gelanseer vanaf lanseringsplatform 19 by Kaap Kennedy op 8 April 1964. Die ruimtetuig was bo-op die stadium twee vuurpyl geïnstalleer. Die sending was beplan vir drie omwentelings van die aarde terwyl datatoetswerk gedoen is. Die ruimtetuig het egter in die ruimte gebly vir 64 omwentelings totdat atmosferiese weerstand dit na die aarde laat terugval het. Die ontwerpfilosofie was dat die ruimtetuig nie herwin kan word nie en gate is in sy hitteskild geboor om te verseker dat dit sal uitbrand in die atmosfeer wanneer dit terugval na die aarde.