Gewigloosheid

Streng gesproke beteken die term gewigloos dat daar geen gravitasiekrag op 'n liggaam inwerk nie. Tog word die term dikwels gebruik om die oënskynlike gewigloosheid te beskryf wat ruimtevaarders ervaar (die gevoel dat hulle dryf). Wat eintlik gebeur, is dat die ruimtetuig en die ruimtevaarders dieselfde gravitasieversnelling ondervind en dus kan die ruimtevaarder in die tuig ronddryf. As die ruimtetuig se motore egter ontbrand, sal die tuig begin versnel en die ruimtevaarders binne-in sal 'n drukkrag vanaf die vloer van die tuig ondervind. Traagheid of inersie sal hom teen die vloet vasgedruk hou en dus sal hy weer 'n gevoel soortgelyk aan gewig ervaar. Voorwerpe in 'n hysbak wat in vrye val in 'n hysskag is, sal dieselfde gewigloosheid ervaar.