Hillary Clinton

Hillary Clinton
Hillary Clinton in 2009
67ste Minister van Buitelandse Sake
Ampstermyn 21 Januarie 2009 – 1 Februarie 2013
Vise	James Steinberg William Joseph Burns
President	Barack Obama
Voorafgegaan deur	Condoleezza Rice
Opgevolg deur	John Kerry
Senator vir die deelstaat New York
Ampstermyn 3 Januarie 2001 – 21 Januarie 2009
Voorafgegaan deur	Daniel Patrick Moynihan
Opgevolg deur	Kirsten Gillibrand
Eerste Dame van die Verenigde State
Ampstermyn 20 Januarie 1993 – 20 Januarie 2001
President	Bill Clinton
Voorafgegaan deur	Barbara Bush
Opgevolg deur	Laura Bush
Eerste Dame van Arkansas
Ampstermyn 11 Januarie 1983 – 12 Desember 1992
Voorafgegaan deur	Gay Daniels White
Opgevolg deur	Betty Tucker
Ampstermyn 9 Januarie 1979 – 19 Januarie 1981
Voorafgegaan deur	Barbara Pryor
Opgevolg deur	Gay Daniels White
Persoonlike besonderhede
Gebore	26 Oktober 1947 (1947-10-26) Chicago, Illinois
Politieke party	Demokraat (sedert 1968) Republikein (tot 1968)
Eggenoot/-note	Bill Clinton
Kind(ers)	Chelsea Clinton
Alma mater	Wellesley College Yale-universiteit
Religie	Methodisme
Handtekening

Hillary Diane Rodham Clinton (* 26 Oktober 1947 in Chicago, Illinois, as Hillary Diane Rodham) is ’n suksesvolle regsgeleerde en politikus wat in 2001 die Demokratiese senator vir New York geword het. Sy is getroud met oudpres. Bill Clinton en het van 1992 tot 2000 as Amerikaanse presidentsvrou gedien. In 2008 het sy self die president probeer word, maar Barack Obama is as die party se kandidaat benoem. In 2009 het pres. Obama haar as minister van buitelandse sake in sy kabinet aangestel. In 2016 was sy die Demokratiese Party se amptelike presidentskandidaat, maar die verkiesing is deur die Republikeinse kandidaat Donald Trump gewen.

Lewensloop

Die Clinton-familie arriveer by die Withuis in 1993

Die Clinton-familie tydens Bill Clinton se tweede inhuldiging in 1997

Hillary Clinton ontmoet met die Mianmarese politikus Aung San Suu Kyi in 2011

Sy het in 1973 'n graad aan die Yale-universiteit se regsskool behaal en daarna 'n loopbaan as advokaat begin. In 1975 het sy na Arkansas verhuis en met Bill Clinton getrou. Sy was in 1979 die eerste vroulike vennoot van Rose Law Firm en is in die tydperk tussen 1988 en 1991 as een van die eenhonderd mees invloedryke advokate in die Verenigde State gelys.

In die periodes tussen 1979 en 1981 en tussen 1983 en 1992 was sy die Eerste Dame van die deelstaat Arkansas. Sy was 'n aktiewe lid van organisasies wat hulle vir die welsyn van kinders beywer en het ook as bestuurslid van maatskappye soos Wal-Mart gedien.

As die Eerste Dame van die Verenigde State het sy 'n prominente posisie in politieke debatvoerings beklee. Haar belangrikste inisiatief vir die daarstelling van 'n nasionale gesondheidsstelsel is deur die Amerikaanse Kongres in 1994 verwerp. Sy het nogtans in 1997 daarin geslaag om 'n mediese fondsprogram vir kinders en wetgewing ten opsigte van aanneming van stapel te stuur.

Tydens die Whitewater-skandaal was sy in 1996 die enigste Eerste Dame van die Verenigde State wat ooit deur 'n jurie verhoor is, maar is nooit skuldig bevind nie. Die toestand van haar huwelik met Bill Clinton was ná die Lewinsky-skandaal in 1998 'n onderwerp van bespreking in die media.

Ná haar verhuising na New York in 2000 is Clinton as senator vir hierdie deelstaat verkies. Sy was in die tydperk tussen 2001 en 2009 die Junior Senator in die Amerikaanse Senaat uit die deelstaat New York. Dit was die eerste keer in die Amerikaanse geskiedenis dat 'n Eerste Dame vir 'n politieke amp as kandidaat gestaan het, en sy was ook die eerste vroulike senator uit New York.

In die Amerikaanse Senaat het sy aanvanklik die buitelandse beleid van die Republikeinse president George W. Bush in gevalle soos die beslissing oor oorlogvoering in Irak gesteun, maar later begin om die Bush-administrasie vir sy optrede in dié land en sy binnelandse beleid skerp te kritiseer. In 2006 is sy met 'n groot meerderheid van die uitgebragte stemme as senator herverkies. In die Demokratiese presidensiële voorverkiesings is beweer dat sy die eerste vrou in die Amerikaanse geskiedenis is wat op nasionale vlak vir die nominasie as presidensiële kandidaat staan. Dit is egter onwaar, omdat Victoria Woodhull in 1872 die eerste vrou was om as Amerikaanse presidentskandidaat te staan.

Op 20 Januarie 2007 het Clinton die oprigting van 'n verkenningskomitee vir die 2008-verkiesing aangekondig: die eerste amptelike tekening van 'n kandidaatstelling vir die Amerikaanse presidentskap. Op 3 Junie het dit egter geblyk dat haar mededinger, Barack Obama, die steun van sóveel gedelegeerdes gehad het (ruim 2100), dat sy Demokratiese kandidaatskap 'n uitgemaakte saak was. Clinton het twee dae later aangekondig dat sy aan Obama se oorwinning sou toegee; sy het op 7 Junie haar stryd om kandidaatskap amptelik beëindig en haar steun vir Obama aan die publiek uitgespreek.

Vervolgens is sy deur president Barack Obama as die 67ste Amerikaanse Minister van Buitelandse Sake benoem. Sy het hierdie amp gedurende Obama se eerste regeringstermyn beklee en het voor die president se herverkiesing op 6 November 2012 aangekondig dat sy nie vir 'n tweede ampstermyn sou staan nie.

In April 2015 het Clinton haar kandidatuur vir die Amerikaanse presidentskap van November 2016 aangekondig en is veral meegeding deur Bernie Sanders. Op 26 Julie 2016 is sy amptelik deur die Demokratiese Party as die party se presidentskapskandidaat benoem.

In November 2016 kompeteer sy in die Amerikaanse presidentsverkiesing teen die Republikeinse Party se kandidaat Donald Trump en verloor.

Eksterne skakels

• Wikimedia Commons het meer media in die kategorie Hillary Clinton.
• (en) Hillary Clinton se amptelik webwerf
• (en) Amptelike webwerf van die Clinton-stigting