John Malkovich
| John Malkovich | |
| |
Malkovich in 2009.
| |
| Geboortenaam | John Gavin Malkovich |
|---|---|
| Geboorte | 9 Desember 1953 |
| Aktiewe jare | 1976-tans |
John Gavin Malkovich (gebore op 9 Desember 1953) is ’n Amerikaanse akteur en rolprentregisseur wat in meer as 70 rolprente gespeel het. Hy het Oscar-benoemings gekry vir Places in the Heart en In the Line of Fire.
Loopbaan
[wysig | wysig bron]Malkovich het op skool in verskeie toneelstukke verskyn en was lid van ’n folk-gospelgroep. Hy het daarna toneelspel studeer. In 1976 was hy ’n medestigterslid van die Steppenwolf-teatergeselskap in Chicago.[1] Hy het in 1980 na New York verhuis om in die Steppenwolf-produksie True West te verskyn; hy het daarvoor ’n Obie-prys gewen.[2] Vroeg in 1982 het hy in A Streetcar Named Desire van Chicago se Wisdom Bridge Theatre gespeel.
Hy het in 1984 ’n Steppenwolf-medeproduksie, Balm in Gilead, geregisseer en daarvoor ’n tweede Obie-prys asook ’n Drama Desk-prys gewen.[2] Sy debuut op Broadway was daardie jaar in Death of a Salesman saam met Dustin Hoffman. Malkovich het ’n Emmy gewen[3] nadat die toneelstuk in 1985 vir televisie aangepas is.
Hy het sy rolprentdebuut in 1984 gemaak as Sally Field se blinde loseerder in Places in the Heart en daarvoor sy eerste Oscar-benoeming vir beste manlike byspeler gekry. Hy was ook Al Rockoff in The Killing Fields. Ander prente sluit in Empire of the Sun en The Glass Menagerie (albei 1987). Die volgende jaar het hy ’n ster geword vir sy uitbeelding van die sinistere en sensuele Valmont in Dangerous Liaisons (1988).[4]
Malkovich het in 1992 in Of Mice and Men gespeel en is in 1994 vir nog ’n Oscar benoem vir sy rol on In the Line of Fire. Hoewel hy die titelrol vertolk het in Charlie Kaufman se Being John Malkovich, het hy ’n effense variasie van homself gespeel, soos aangedui deur die karakter se tweede naam, "Horatio". Hy het ook ’n kameerol gehad in die fliek Adaptation, ook deur Kaufman – hy het homself gespeel tydens die verfilming van Being John Malkovich.
Sy regisseursdebuut was in 2002 met The Dancer Upstairs. In dieselfde jaar het hy die titelrol vertolk in Ripley's Game. Ander prente sluit in The Man in the Iron Mask (1998), The Hitchhiker's Guide to the Galaxy (2005), Eragon (2006), Beowulf (2007), Changeling (2008), Red (2010), Transformers: Dark of the Moon (2011) en Red 2 (2013).
Malkovich het ook sy eie kleremaatskappy, Mrs. Mudd, in 2002 gestig. Die maatskappy het die John Malkovich-mansklereversameling "Uncle Kimono" in 2003 uitgereik[5] en ’n tweede reeks, "Technobohemian," in 2010.[6] Malkovich het self die klere ontwerp.[7]
Hy het in 2008 die titelrol vertolk in die prent The Great Buck Howard. Hy was ook Quentin Turnbull in Jonah Hex (2010).[8] Malkovich is bekend vir sy kenmerkende stem, wat The Guardian beskryf as "’n skril, effens orgasmiese, dralerige stemtoon".[9]
Verwysings
[wysig | wysig bron]- ↑ Wood, Gaby (30 September 2001). "A multitude of Malkovich". The Guardian (in Engels). Londen. Geargiveer vanaf die oorspronklike op 12 Oktober 2007. Besoek op 22 Desember 2008.
- ↑ 2,0 2,1 "John Malkovich – Biography". Yahoo! Movies (in Engels). Geargiveer vanaf die oorspronklike op 14 Januarie 2012. Besoek op 22 Desember 2008.
- ↑ "John Malkovich Emmy Nominated". Academy of Television Arts & Sciences. Besoek op 9 Maart 2012.
- ↑ Documentary The Paradox of John Malkovich on Eurochannel
- ↑ "John Malkovich Trunk Show at The Royal Court Theatre" (in Engels). Royal Court Theatre. 30 April 2005. Geargiveer vanaf die oorspronklike op 3 Oktober 2016. Besoek op 9 Maart 2012.
- ↑ "John Malkovich launches clothing line for wealthy guys" (in Engels). New York Post. 17 Februarie 2010. Geargiveer vanaf die oorspronklike op 16 Maart 2013. Besoek op 9 Maart 2012.
- ↑ "John Malkovich: The Invisible Man" (in Engels). Boston. 17 Maart 2010. Geargiveer vanaf die oorspronklike op 6 Januarie 2012. Besoek op 9 Maart 2012.
- ↑ Creepy, Uncle (10 Junie 2010). "Dozens of Images from Jonah Hex". Dread Central. Besoek op 9 Maart 2012.
- ↑ Gaby Wood (30 September 2001). "A multitude of Malkovich". Londen: Guardian. Besoek op 25 April 2010.
Eksterne skakels
[wysig | wysig bron]- John Malkovich in die Internet-rolprentdatabasis
Wikimedia Commons het meer media in die kategorie John Malkovich.
Hierdie artikel is vertaal uit die Engelse Wikipedia
Normdata  |
|
|---|