Steve Irwin

Steve Irwin
Steve Irwin
	Steve Irwin in 2005
Gebore	Stephen Robert Irwin; 22 Februarie 1962; Essendon, Victoria, Australië
Sterf	4 September 2006 (op 44); Batt Reef, Victoria, Australië
Nasionaliteit	Australië
Beroep	Natuurkundige, bioloog, natuurbewaarder, TV-persoonlikheid, herpetoloog
Bekend vir	The Crocodile Hunter
Termyn	1996–2006
Eggenoot	Terri Raines (1992–2006; sy dood)
Kinders	Bindi Sue (* 1998); Robert Clarence (* 2003)
Ouer(s)	Lyn en Bob Irwin
Webwerf	crocodilehunter.com

Stephen Robert "Steve" Irwin (22 Februarie 1962 – 4 September 2006), met die bynaam The Crocodile Hunter, was 'n Australiese wildkenner, TV-persoonlikheid en omgewingsbewaarder. Irwin het wêreldwye roem verwerf met die TV-reeks The Crocodile Hunter - 'n dokumentêre reeks wat internasionaal uitgesaai is en waarin hy as mede-gasheer saam met sy vrou Terri opgetree het. Die egpaar het ook Australia Zoo besit en bedryf, wat gestig is deur Irwin se ouers in Beerwah, sowat 80 kilometer (50 myl) noord van Queensland se hoofstad Brisbane.

Vroeë lewe

Irwin is die seun van Lyn en Bob Irwin van Essendon, 'n voorstad van Melbourne, Victoria. Hy is van Ierse afkoms aan vaderskant. Hy het saam met sy ouers na Queensland verhuis in 1970 waar hy Landsborough State School en Caloundra State High School bygewoon het. Irwin het sy pa beskryf as 'n wildkenner met 'n belangstelling in herpetologie, terwyl sy ma, Lyn, 'n wild-rehabiliteerder was. Na hul verhuising na Queensland het Bob en Lyn Irwin begin met die klein Queensland Reptiel- en Faunapark waar Steve grootgeword het tussen krokodille en ander reptiele.

Op sy sesde verjaarsdag het hy 'n 12-voet (4 m) luislang gekry. Hy het begin met die hantering van krokodille op die ouderdom van nege nadat sy pa hom sedert 'n vroeë ouderdom opgevoed het met betrekking tot reptiele. Op negejarige ouderdom het hy onder toesig van sy pa met sy eerste krokodil gestoei. Hy het as 'n vrywilliger gewerk vir Queensland East Coast Crocodile Management program en meer as 100 krokodille gevang; waarvan sommige hervestig is of na die familie se park geneem is. Irwin het die bestuur van die park oorgeneem in 1991 en die naam verander na Australia Zoo in 1992.

Loopbaan

Huwelik en gesin

Terri Raines Irwin, die weduwee van Steve Irwin

Irwin het Terri Raines in 1991 ontmoet. Sy was 'n Amerikaanse natuurkenner van Eugene, Oregon, wat op besoek was aan rehabilitasiefasiliteite vir wilde diere in Australië en ook die dieretuin besoek het. Volgens die egpaar was dit liefde met die eerste oogopslag. "Hulle vier maande later verloof geraak en is in Eugene getroud op 4 Junie 1992. Saam het hulle het twee kinders: 'n dogter, Bindi Sue Irwin (gebore 24 Julie 1998), en 'n seun, Robert Clarence "Bob" Irwin (genoem na Irwin se pa) gebore op 1 Desember 2003. Irwin was so entoesiasties oor sy familie as wat hy oor sy werk was. Hy het eenkeer sy dogter, Bindi, beskryf as die rede waarom hy op die aarde is.

The Crocodile Hunter en verwante werk

Steve en Terri het hul wittebrood spandeer deur saam krokodille te vang. Beeldmateriaal van hul wittebrood, wat geneem is deur John Stainton, het die eerste episode van The Crocodile Hunter geword. Die program het sukses behaal in die Verenigde State, die Verenigde Koninkryk, en het 500 miljoen mense in meer as 130 ander lande bereik. Irwin se uitbundige en entoesiastiese aanbiedingstyl, Sy Australiese aksent, kenmerkende kakiekortbroek en slagspreuk "Crikey!" het wêreldwyd bekend geword. Sir David Attenborough het Irwin geprys omdat hy talle mense aan die natuurlike wêreld bekendgestel het.

Die Amerikaanse satelliet- en kabel-TV-kanaal Animal Planet het die Crocodile Hunter-reeks afgesluit met 'n slot getiteld Steve's last adventure. Die laaste Crocodile Hunter dokumentêr was meer as drie ure lank met beeldmateriaal van Irwin se avonture in plekke soos die Himalajas, die Yangtzerivier, Borneo en die Nasionale Krugerwildtuin. Irwin het ook verskyn in ander Animal Planet dokumentêre programme, insluitend Croc Files, The Crocodile Hunter Diaries en New Breed Vets.

Mediaveldtogte

Irwin het entoesiasties met die Australian Quarantine and Inspection Service saamgewerk om Australië se streng kwarantyn/doeane-vereistes te bevorder. Sy inkomste uit hierdie advertensieveldtogte is gebruik vir sy wildlewefonds.

Irwin was 'n ywerige voorstaander van Australiese toerisme in die algemeen en Queensland se toerisme in die besonder. In 2002 is die Australiese Dieretuin aangewys as Queensland se top toeriste-aantreklikheid.

Eerbewyse

In 1997, terwyl hy saam met sy pa vis gevang het teen die kus van Queensland, het Irwin 'n nuwe skilpadspesie ontdek. Hy het die nuutontdekte spesie Irwin se skilpad (Elseya irwini) genoem na sy familie. 'n Ander nuutontdekte Australiese dier – 'n slakspesie wat op land leef, Crikey steveirwini, is in 2009 na Irwin genoem.

In 2001 ontvang Irwin die Eeufees-medalje van die Australiese regering vir sy "diens aan globale bewaring en Australiese toerisme". In 2004 ontvang hy erkenning as Toerisme-uitvoerartikel van die Jaar. Hy is ook in 2004 genomineer vir die Australiër van die Jaar. Kort voor sy dood sou Irwin benoem word as ereprofessor aan die Universiteit van Queensland se School of Integrative Biology. Op 14 November 2007 is die professoraat postuum aan Irwin toegeken.

Omgewingsake

Irwin was 'n passievolle natuurbewaarder en het omgewingsake bevorder deur sy opgewondenheid oor die natuurlike wêreld met mense te deel eerder as om vir mense te preek. Hy was betrokke by die bewaring van bedreigde diere en besorg dat die ontbossing van grond lei tot die verlies van habitat. Hy het bewaring beskou as die belangrikste deel van sy werk: "ek beskou myself as 'n wildvegter. My doel is om die wêreld se bedreigde spesies te red. "Irwin het groot dele grond aangekoop in Australië, Vanuatu, Fidji en die Verenigde State, wat hy beskryf het as "soos nasionale parke". Hy beklemtoon die belangrikheid daarvan dat mense besef hulle kan elkeen 'n verskil maak.

Irwin was die stigter van die Steve Irwin Conservation Foundation. Hy was ook behulpsaam met die stigting van International Crocodile Rescue, die Lyn Irwin Memorial Fund en die Iron Bark Station Wildlife Rehabilitaiton Facility.

Na Irwin se afsterwe het die omgewingaksiegroep Sea Shepherd Conservation Society die MV Robert Hunter herdoop na MY Steve Irwin. Kort voor sy dood het Irwin dit oorweeg om aan te sluit by Sea Shepherd se 2007–2008 reis na Antarktika om die Japannese walvisjag te ontwrig. Die naamsverandering van die vaartuig het Terri Irwin se steun geniet en sy het gesê: "As Steve nog gelewe het, sou hy saam met die aksiegroep aan boord wees".

Afsterwe

Op 4 September 2006 was Irwin besig met buiteopnames en die produksie van die dokumentêre reeks Ocean's Deadliest by Batt Reef, naby Port Douglas, Queensland. Tydens 'n onderbreking in die verfilming, wat veroorsaak is deur gure weer, het Irwin besluit om in die vlak water te gaan snorkel terwyl hy verfilm word in 'n poging om materiaal te bekom vir sy dogter se TV-program (Bindi the Jungle Girl).

Terwyl hy in borsdiep water geswem het, het Irwin 'n pylstertvis genader op 'n afstand van ongeveer twee meter (6,5 voet). Hy het die vis van agter benader om dit te verfilm terwyl dit weggeswem het.

Die voorval se enigste ooggetuie beskryf die voorval so: "Ewe skielik het die pylstertvis hom op sy voorpunt gestut en wild begin steek met sy stert. Honderde steke in 'n paar sekondes". Irwin het aanvanklik geglo het hy het net 'n gat in sy longe opgedoen; maar die vis se pylpunt het sy hart deurboor, wat veroorsaak het dat hy doodgebloei het. Die pylstertvis se gedrag blyk 'n verdedigingsreaksie te wees omdat dit ingeperk was. Bemanningslede aan boord van Irwin se boot het noodhulp toegepas en met hom na die kus gejaag. Mediese personeel het hom op die toneel dood verklaar.

Irwin se dood blyk die enigste noodlottige aanval deur 'n pylstertvis te wees wat nog ooit op video vasgevang is.

Nadat die beeldmateriaal van die voorval deur die Queenslandse polisie ondersoek is, is alle kopieë van die materiaal vernietig op aandrang van Irwin se familie. Produksie van Ocean's Deadliest is voltooi en uitgesaai in die VSA op die Discovery-kanaal op 21 Januarie 2007. Die dokumentêr is voltooi met beeldmateriaal van die weke na die ongeluk, maar sonder enige vermelding van Irwin se onvoorsiene dood.

Begrafnis en gedenkdienste

Familie en vriende van Irwin het 'n private begrafnisdiens gehou in Caloundra op 9 September 2006. Irwin is later dieselfde dag tydens 'n privaatseremonie by die Australiese Dieretuin begrawe; die graf is nie toeganklik vir die dieretuin se besoekers nie. Eerste Minister Howard en Queensland Premier Beattie het aangebied om vir hom 'n staatsbegrafnis te hou, maar Irwin se familie het besluit dit sou nie gepas wees, en – in die woorde van sy vader – hy sou verkies het om onthou te word as 'n "gewone ou".

Filmografie

Jaar	Rolprent	Rol	Ander notas
1997–2004	The Crocodile Hunter	Homself
1999–2000	Croc Files	Homself
2001	Dr. Dolittle 2	Homself	Kameerol
2001	Steve Irwin's Ghosts of War	Homself
2002	Mystery Hunters	Homself	Een episode
2002–2004	The Crocodile Hunter Diaries	Homself
2002	The Crocodile Hunter: Collision Course	Homself
2002	Wiggly Safari	Homself
2005	New Breed Vets with Steve Irwin	Homself
2006	Steve Irwin's Great Escapes	Homself
2006	5 Takes: Pacific Rim	Homself	Een episode
2006	Happy Feet	Trev	(Stem); Postuum uitgereik.
2007	Ocean's Deadliest	Homself	Spesiale TV-uitsending. Postuum uitgereik.
2007–2008	Bindi the Jungle Girl	Homself	TV-reeks. Postuum vrygestel. Nuwe en argiefmateriaal.

Eksterne skakels

(en) Amptelike webtuiste
Steve Irwin in die Internet-rolprentdatabasis