The Sims
| The Sims | |
|---|---|
| Ontwikkelaar | Maxis |
| Uitgewer | Electronic Arts |
| Uitgereik | Februarie 2000 |
| Genre | Strategie / Simulasie |
| Modus | Enkele speler |
| Platform | Microsoft Windows, Mac OS X |
| Amptelike webtuiste | [1] |
The Sims is ’n strategie/simulasie-spel van Maxis. Nes ander speletjies deur Maxis, soos SimCity, beskik die speler oor ’n virtuele wêreld.
In plaas daarvan om ’n spel te wen of verloor, bepaal die speler die aksies van die karakters, of Sims. Sims het wel ’n "vrye wil" en hoewel die speler hom of haar iets kan laat doen, kan die karakter besluit om eers iets anders te doen of om die opdrag te ignoreer. Die speler besluit hoeveel tyd die Sim moet bestee aan verskillende aktiwiteite, soos lees, kook, redeneer, ens. Daar moet ook in die karakter se basiese behoeftes voorsien word, soos slaap, eet en persoonlike higiëne anders kan die Sim depressief raak, weier om te reageer of selfs doodgaan.
The Sims gebruik ’n kombinasie van 3D- en 2D-tegnieke. Die Sims self is 3D, terwyl die huise en voorwerpe 2D is.
Die karakters het agt behoeftes en dit kan gesien word deur die kleur op ’n kleurbalk. Hoe groener die balk, hoe gelukkiger is die Sim; hoe rooier die balk hoe ongelukkiger is hy of sy.
Die behoeftes is as volg (Afrikaans tussen hakies):
- Hunger (Honger)
- Energy (Energie)
- Comfort (Gemak)
- Fun (Plesier)
- Hygiene (Higiëne)
- Social (Sosiaal)
- Bladder (Blaas)
- Room (Omgewing)
Op ’n balk kan gesien word hoe goed een Sim met ’n ander oor die weg kom (met ’n punt van -100 tot +100). Deur te gesels en saam pret te hê, kry hulle punte by en kan later selfs op ’n ander Sim verlief raak. Hulle kan ook vriende of kwaaivriende maak.
In September 2004 is The Sims 2 uitgereik, waarin die hele omgewing 3D is. ’n Ander toevoeging tot die spel was die moontlikheid om kinders te laat opgroei tot volwassenes, Sims te laat ouer word, naweke vir kinders en vakansiedae vir volwassenes. ’n "Wensmeter" is ook bygevoeg waarmee begeertes en vrese vervul kan word. Sims kan belonings kry as baie van hul wense vervul word.
’n Derde spel in die reeks, The Sims 3, word in Junie 2009 uitgereik nadat dit aanvanklik vir Februarie 2009 beplan is.[1][2] Daarin sal die buurt nie meer opgedeel word in erwe nie, maar die karakters sal vrylik kan rondbeweeg. Die behoeftes is so aangepas dat die speler eerder op sosiale situasies en verhoudings sal kan konsentreer as op die behoeftes van die Sims. Sims sal ook geskep kan word wat heel anders lyk as in The Sims 2.[3] Hulle kan maer of vet wees, kort of lank, en die liggaamsdele kan apart gekies word. Die speler kan ook die velkleur na hartelus verander.
Verwysings
[wysig | wysig bron]- Hierdie artikel is merendeels vertaal vanaf die Nederlandse Wikipedia-artikel nl:The Sims
- ↑ Thorsen, Tor (2 November 2006). "Sims 3, next-gen Black, new SimCity & LOTR coming". GameSpot (in Engels). Geargiveer vanaf die oorspronklike op 26 Maart 2009. Besoek op 4 April 2007.
- ↑ Orry, James (11 Maart 2006). "Three new Sims games in development". Pro-G Media, UK (in Engels). Geargiveer vanaf die oorspronklike op 11 Oktober 2007. Besoek op 4 April 2007.
- ↑ KurBozKurov (15 Junie 2012). "Diablo 3 Guide". Pro-G Media, EU (in Indonesies). Geargiveer vanaf die oorspronklike op 21 Oktober 2016. Besoek op 15 Mei 2012.
Eksterne skakel
[wysig | wysig bron]- Die amptelike Sims-webtuiste Geargiveer 3 Junie 2002 op Wayback Machine