Wes-Armenië

Armenië en Wes-Armenië volgens die Verdrag van Sèvres in 1920.

Die moderne konsep van 'n verenigde Armenië volgens die Armeense Revolusionêre Federasie

Wes-Armenië is 'n term wat veral deur Armeniërs gebruik word om na die gebiede van die Armeense Hoogland te verwys wat oorspronklik deur Armeniërs bewoon is en in die 16de eeu onder die bewind van die Ottomaanse Turke gekom het. Hulle maak tans deel uit van Turkye.

In die laat 19de en vroeë 20ste eeu het die Armeense bevolking in die Ottomaanse Ryk slagoffers van stelselmatige menseslagtings geword soos die Hamidiaanse menseslagting (1894-1896), die Adana-menseslagting in 1909 en die Armeense volksmoord (1915-1923). Die meeste Armeniërs is vermoor, het na Rusland gevlug of is na die Siriese woestyn gedeporteer.

Tans word Wes-Armenië hoofsaaklik deur Koerde en Turke bewoon, met klein minderhede van Azerbeidjanners (Azeri's), Laz (etniese Georgiërs wat die Islamitiese geloof aangeneem het) en Hamsjeni's (Islamitiese Armeniërs wat in die Swartsee-kusgebied woon).