Coelestin I.

Dr Coelestin I. (lat. dr Himmlisch; † 27. Juli 432) isch vum 10. Septämber 422 bis zum 27. Juli 432 Papscht un Bischof vu Rom gsii. Är zellt zue dr Hailige un het di chilchli Lehr vu dr Maria as „Die, wu Gott uf Wält brocht het“ noohaltig gferderet.

Lääbe

Di eltscht Darstellig vu dr Chryzigung vum Christus, wu mer chännt, an dr remische Chilche Santa Sabina, us dr Zyt vum Papscht Coelestin I.

Dr Coelestin I. isch vor syre Wahl zum Papscht Diakon z Rom gsii. In syre ganze Amtszyt het er versuecht, in Froge vu dr Jurisdiktion s remisch Appellationsrächt gege di nordafrikanische Chilche durezsetze, die hän si aber erfolgrych widersetzt. Dr Konflikt isch in dr Hauptsach doderdur zum Änd chuu, wel d Vandale Nordafrika eroberet hän. Dr Bischof Augustinus vu Hippo isch vum Coelestin unterstitzt wore gege dr Semipelagianismus.

Im Stryt mit em Nestorius un syne Aahänger het si dr Bischof Kyrill vu Alexandria an dr Coelestin gwändet, wu im Augschte 430 uf ere remische Sinod d Lehr vum Nestorius abglähnt het un sällem d Exkommunikation aadroht het. S Konzil vu Ephesos, Ändi Juni 431, wu di drei Legate vum Coelestin presidiert hän, het dr Nestorianismus mit dr uusdrucklige Zuestimmig vum Papscht verurdailt.

Dr Coelestin het si vor allem in dr Mission (au dr innerchilchlige) verdient gmacht. Wel si dr Pelagianismus in dr Zwischezyt au uf Britannien uusdehnt ghaa het, het er anne 429 dr Bischof Germanus vu Auxerre in di nerdli Provinz gschickt. Zwai Johr speter isch dr domolig Diakon Palladius zur Mission ins haidnisch Irland gschickt un zum Missionsbischof ernännt wore. Vum Coelestin sin 16 Brief iberliferet. Är isch e Verdrätter vu dr chilchlige Primatsidee gsii, wänn au vor allem z Afrika ohni großi Erfolg.

Unter em Papscht Coelestin I. isch di beriemt remisch Chilche Santa Sabina böue wore, wu no ne Zedereholzdiire us sym Dodesjohr 432 mit dr eltschte Darstellig vum gchryzigte Chrischtus uswyst.

Dänkdäg

kadolisch: 27. Juli
orthodox: 8. April

Literatur

Adolf Jülicher: Caelestinus 4. In: Paulys Realencyclopädie der classischen Altertumswissenschaft (RE). Band III,1, Stuttgart 1897, Sp. 1247.
Welchering: Zwischen Christologie und Kirchenpolitik. Eine Untersuchung der Briefe von Papst Coelestin I. und der an ihn gerichteten Schreiben im Vorfeld des ephesinischen Konziles, in: Ders., Die theologische Brücke (= Pons theologiae; 1), München 2009. ISBN 3-89975-929-X
Friedrich Wilhelm Bautz: Coelestin I.. In: Biographisch-Bibliographisches Kirchenlexikon (BBKL). Band 1, Hamm 1975, Sp. 1077.
Ytrag in d Catholic Encyclopedia, Robert Appleton Company, New York 1913 (änglisch)

Weblink

Commons: Coelestin I. – Sammlig vo Multimediadateie

Gsamtwärch vu Migne Patrologia Latina mit Inhaltsverzaichnis

Vorgänger	Amt	Nachfolger
Bonifatius I.	Papscht 422–432	Sixtus III.

Dä Artikel basiert uff ere fräie Übersetzig vu dere Version vum Artikel „Coelestin_I.“ vu de dütsche Wikipedia. E Liste vu de Autore un Versione isch do z finde.