Gundahar
Dr Gundahar († 436) isch im früeche 5. Joorhundert König vo de Burgunder gsi.
Wo ane 406 d Burgunder bi Mainz übere Rhy is Gebiet vom Römische Rych ggange sind, isch dr Gundahar vermuetlech scho ire Häuptling gsi.
Im Gschichtsbuech vom Griech Olympiodor, wo i dere Zyt gläbt het, stoot, dr Gundahar heig ane 411 zäme mit em Gallier Jovinus und em Alaan Goar bim ene Uufstand gäge Rom mitgmacht. Au no dr Gregor von Tours schrybt vo dere Sach. Dr römisch Kaiser Honorius het aber dere Revolte es Änd gmacht, und jetz sind d Burgunder als Verbündeti vo de Römer am Rhy agsidlet worde. Ane 435 isch dr Gundahar mit sine Burgunder gäge Weschte uf Gallie zoge, wo se dr römisch General Flavius Aëtius gschlage het. Im Chrieg isch dr Gundhar ane 436 ums Läbe cho. Und drufabe het s Volch vo de Burgunder uf Gheiss vo de Römer is Gebiet vo dr Rhone rund um Gämf müesse goo.
D Literaturforscher dänke, ass d Gschicht vom Gundahar törft eis Grundmotiyv vo dr Saag vo de Nibelunge sy.
Literatur
[ändere | Quälltäxt bearbeite]- Reinhold Kaiser: Die Burgunder. Stuttgart 2004, ISBN 3-17-016205-5.